Halldóra Guðjónsdóttir hótelstjóri og Bjarni Rúnar Bequette veitingamaður opna Hótel Vesturland fyrir gesti föstudaginn 1. mars næstkomandi. Halldóra og Bjarni eru í hlaupagöllum þessa daga að gera allt klárt fyrir opnun hótelsins sem fram undir þetta gekk undir nafninu B59 við Borgarbraut 59 í Borgarnesi.

„Við fengum rekstrarleyfið á föstudaginn síðasta og erum að bíða eftir skiltinu sem okkur var lofað fyrir helgi. Svo erum við að setja upp tölvukerfið, sjónvörp í herbergi og verðum með allt klárt á föstudaginn næsta,“ segir Bjarni í samtali við Skessuhorn. Halldóra er uppalin á Kleppjárnsreykjum í Borgarfirði en Bjarni er Grindvíkingur. Þau hafa bæði mikla reynslu úr hótel- og veitingarekstri. „Við höfum verið undanfarin sex ár með rekstur á Siglufirði. Þar vorum við með rekstur á veitingastaðnum Sunnu sem er á Sigló hóteli auk þess sem við vorum með rekstur á Rauðku og Hannesboy við höfnina á Siglufirði,“ segir Halldóra.

Rekstri B59 var hætt í nóvember á síðasta ári og hafa Halldóra og Bjarni ásamt iðnaðarfólki tekið til hendinni. „Það hefur verið tekið allt í gegn hér. Allt viðhald í kringum glugga á hótelinu er klárt, búið er að mála og það er búið að laga allt sem þurfti að laga. Heilsulindin er komin í lag þó svo að það vanti tvo varahluti í gufu-saunaklefann. Við erum svo komin með starfsfólk en okkur vantar, svona lykilstarfsmenn eins og í móttökuna og þjón með reynslu,“ segja Bjarni og Halldóra. Þau ætla að koma rekstrinum af stað í rólegheitunum. „Við ætlum að geta staðið undir þjónustunni sem við bjóðum upp á. Okkur langar til að taka á móti íslenskum og erlendum ferðamönnum; hópum, árgöngum, ráðstefnuhópum og halda vel utan um markhóp okkar. Morgun,- hádegis,- og kvöldverður verður í boði og svo eru gestir og gangandi sem geta komið við og fengið að borða hjá okkur. Við erum með 81 herbergi á þessu hóteli og okkur finnst mikilvægt að hér inni verði góður andi og frábær matur. Við erum gríðarlega spennt og ánægð með að vera komin hingað í Borgarnes og við hlökkum til að taka á móti gestum,“ segja Bjarni og Halldóra.

Hótel Vesturland opnað í Borgarnesi