Sveitarstjórn Dalabyggðar hefur sent ítrekaða umsögn við tillögu Matvælaráðuneytisins um framkomin reglugerðardrög um sjálfbæra landnýtingu. Einnig hefur Björn Bjarki Þorsteinsson sveitarstjóri vakið athygli á ýmsum vanköntum málsins í greinaskrifum. Hvetur hann til þess að Matvælaráðuneytið hugsi sinn gang og dragi áform sín til baka.  Drögin birtust fyrst í samráðsgátt stjórnvalda í september 2021 og barst þá fjöldi umsagna. Ný drög voru birt í janúar sl. með tímafresti til 20. febrúar og telur sveitarstjórn Dalabyggðar þau hafa tekið sorglega litlum breytingum frá fyrri stigum þrátt fyrir ábendingar. Í nýrri umsögn hennar er farið yfir fjölmörg atriði, enda vísað til þess að meirihluti íbúa sveitarfélagsins sé með landbúnað og afleidd störf að megin atvinnu.