Mörg útivistarsvæði án viðunandi fjarskiptasambands

Nýútkomin er skýrsla sem unnin var af Þorsteini Gunnlaugssyni ráðgjafi hjá Gagna, fyrir Samtök sveitarfélaga á Vesturlandi. Þar var gerð samantekt á útbreiðslu fastaneta, farneta, útvarpsdreifingar og hvaða framkvæmdir væru væntanlegar.

Upplýsingar lágu fyrir seinnipart árs 2023 og tekur til stöðu farneta; farsímadreifikerfa, fastaneta; ljósleiðara og kopartenginga, Tetra; neyðarsamskiptakerfi Neyðarlínunnar og útbreiðslu FM útvarpsdreifikerfa. Í skýrslunni er að finna upplýsingar sem fengnar voru í gegnum viðtöl og gögn frá Fjarskiptastofu, Neyðarlínunni, Vegagerðinni og fjarskiptafélögunum Símanum, Sýn, Nova, Mílu, Ljósleiðaranum og nokkrum rekstraraðilum ljósleiðarakerfa á Vesturlandi. Send var út könnun til ýmissa heimaaðila svo sem lögreglu, björgunarsveita, slökkviliðs, Vegagerðarinnar, atvinnubílstjóra og aðila í ferðaþjónustu til að fá gleggri mynd af upplifun notenda.

Helstu niðurstöður skýrslunnar eru þær að mörg svæði á Vesturlandi, sem nýtt eru til útivistar af ýmsu tagi, lenda utan dekkingarkvaða frá Fjarskiptastofu. Þá kemur fram að í árslok 2027 verða 99% heimila og fyrirtækja í þéttbýli komið með háhraðatengingar um farnet og getur það verið leyst með 5G farneti. Staða fastanets er verst í minni þéttbýliskjörnum, þá sérstaklega á norðanverðu Snæfellsnesi; í Snæfellsbæ, Grundarfirði, Stykkishólmi auk Búðardals, en Míla hyggst fara í lagningu ljósleiðara til heimila og fyrirtækja í Grundarfirði og Stykkishólmi á þessu ári. Stór sumarhúsasvæði á Vesturlandi eru einnig með aðgang að ljósleiðara og þá er verið að leggja út ljósleiðara á vegum sumarhúsafélaga eins og t.d í Munaðarnesi.

Margar ábendingar eru í skýrslunni gerðar um svæði þar sem Tetra samband var ekki til staðar eða slitrótt og hefur það mikil áhrif á viðbrögð og störf löggæslu- og björgunaraðila. Svæðin þar sem Tetra samband er ekki til staðar eða lélegt eru oftast þau sömu og þar sem ekki er símasamband um farnet enda Tetrasendar og farnetssendar oft í sömu fjarskiptaaðstöðu.

Hægt er að finna frekari upplýsingar á heimasíðu Samtaka Sveitarfélaga á Vesturlandi, ssv.is, um niðurstöðu skýrslunnar.

Staða fjarskiptamála á Vesturlandi

Mörg útivistarsvæði án viðunandi fjarskiptasambands

Mörg útivistarsvæði án viðunandi fjarskiptasambands