Liðin af Vesturlandi héldu áfram leik í Lengjubikarnum í knattspyrnu um helgina og var niðurstaðan tveir sigrar, eitt jafntefli og eitt tap eftir leiki helgarinnar.

Skagamenn með stórsigur

Skagamenn tóku á móti Dalvík/Reyni í 3. umferð A deildar karla í Lengjubikarnum í riðli 4 í Akraneshöllinni á laugardaginn. Ingi Þór Sigurðsson kom ÍA yfir í leiknum á 19. mínútu og eftir rúman hálftíma skoraði Hinrik Harðarson annað mark heimamanna. Undir lok fyrri hálfleiks skoruðu þeir Hinrik og Ingi Þór aftur með stuttu millibili og staðan var 4-0 í hálfleik fyrir ÍA. Í byrjun seinni hálfleiks bætti Steinar Þorsteinsson fimmta markinu við fyrir ÍA og tíu mínútum síðar komst Viktor Jónsson á markalistann með marki úr vítaspyrnu. Ekki voru fleiri mörk skoruð síðasta hálftímann og lokatölur 6-0 fyrir ÍA. Með sigrinum komst ÍA í annað sætið í riðlinum og er með sex stig. Næsti leikur Skagamanna er á móti Íslands- og bikarmeisturum Víkings í Akraneshöllinni á miðvikudaginn og hefst klukkan 20. Leikurinn verður sýndur í beinni útsendingu á Stöð 2 Sport.

Jafntefli hjá Víkingi

Á laugardaginn áttust við lið Víkings Ólafsvíkur og Þróttar Vogum í B deild karla á Leiknisvelli í riðli 2. Luke Williams kom Víkingi í forystu á 17. mínútu og staðan 1-0 í hálfleik. Ásgeir Marteinsson jafnaði hins vegar metin fyrir Þrótt korteri fyrir leikslok og þar við sat, 1-1. Næsti leikur Víkings er gegn liði Elliða næsta laugardag á Ólafsvíkurvelli og hefst klukkan 14.

Tap í fyrsta leik hjá Sköllunum

Skallagrímur hóf leik í Lengubikarnum þennan veturinn í C deild karla með tapi á móti liði Kríu en viðureignin var í Akraneshöllinni á laugardagskvöldið. Sölvi Snorrason kom reyndar Sköllunum yfir á 9. mínútu en í kjölfarið skoruðu gestirnir þrjú mörk fram að hálfleik. Fyrst Daði Már Jóhannsson, síðan Birkir Rafnsson úr víti og á lokamínútu fyrri hálfleiks Halldór K. Baldursson, staðan 1-3 fyrir Kríu. Ástráður Leó Birgisson skoraði fjórða mark Kríu um miðjan seinni hálfleikinn og það urðu lokatölur leiksins, 1-4 Kríu í vil. Næsti leikur Skallagríms er gegn Samherjum sunnudaginn 10. mars í Boganum á Akureyri og hefst klukkan 18.30.

Skagakonur sigruðu fyrir austan

Skagakonur héldu áfram sigurgöngu sinni í B deild Lengjubikarsins þegar þær mættu liði FHL í Fjarðabyggðarhöllinni á Reyðarfirði á laugardaginn. Erna Björt Elíasdóttir kom ÍA yfir á 9. mínútu en á lokamínútu fyrri hálfleiks jafnaði Björg Gunnlaugsdóttir metin fyrir FHL og staðan 1-1. Erna Björt var síðan aftur á ferðinni fyrir ÍA á 67. mínútu og kom þeim í 1-2 en fimm mínútum síðar fékk Selma Dögg Þorsteinsdóttir leikmaður ÍA að líta sitt annað gula spjald og þar með rautt sem þýddi að Skagakonur léku einum færri það sem eftir var. Þær héldu það út og gátu fagnað góðum sigri í leikslok. Næsti leikur ÍA er á móti Grindavík í Akraneshöllinni næsta laugardag og hefst klukkan tólf á hádegi.

Ágætis gengi í Lengjubikarnum um helgina