Íbúar í Borgarbyggð geta farið að reima á sig leikhússkóna því nú standa yfir stífar æfingar hjá nemendum Menntaskóla Borgarfjarðar, við uppfærslu verksins Rocky Horror Show – sem hefur verið þýtt af nemendum sem „Sjúskað Sjobbí Sjóv.“

Blaðamaður greip Rebekku Magnúsdóttur leikstjóra þar sem hún var að skipuleggja rennsli í Hjálmakletti í Borgarnesi. „Við erum í ferlinu núna að tína sama búninga og muni til að nýta í sýningunni,“ segir Rebekka. Nemendur skólans, auk nemenda úr Grunnskóla Borgarness, taka þátt í uppfærslunni en alls eru það um 20 nemendur sem sjá um sýninguna. „Boðið var upp á námskeið, sem er metið hér í MB. Alls um tíu tímar þar sem nemendur gerðu æfingar og leystu leiklistartengd verkefni. Í lok námskeiðs voru áheyrnarprufur sem endaði á því að ráða í þessi tíu talandi hlutverk í verkinu, en þau sem ekki eru með talandi hlutverk eru gríðarlega mikilvæg þar sem þau eru að sjá um dansa, senuskipti og láta sýninguna flæða, sem gerir þetta eina stóra og góða heild,“ segir Rebekka en bætir því við að nemendur á námskeiðinu ákváðu sjálfir hvaða leikrit þeir vildu setja upp. „Þau langaði að hafa leikrit sem hefur eitthvað að segja. Mikið af persónum í þessari sýningu eru mikið að leita að sjálfum sér og nemendunum fannst það mjög áhugaverður vinkill og því var ákveðið að setja upp Rocky Horror Show eða „Sjúskað Sjobbí Sjóv.“

Á meðan blaðamaður ræðir við Rebekku gengu inn leikarar, sumir hverjir í karakter og sjást góðir taktar frá Erni Daða Arnberg Sigurðssyni sem leikur Dr. Frank-N-Furter en auk þess er Þorsteinn Logi Þórðarson og Edda María Jónsdóttir sem fara með hlutverk Brad og Janet. Frumsýning á leikritinu er fyrirhuguð 14. mars og verða sýningar auglýstar nú á næstu dögum og vikum.

Æfingar í fullum gangi við Sjúskað Sjobbí Sjóv