Sérstaða svæðisins þó ótvíræð

Í síðustu viku greindi Skessuhorn frá fundi sem Umhverfisstofnun (UST) hélt í félagsheimilinu Lyngbrekku á Mýrum mánudaginn 12. febrúar. Var hann haldinn vegna tillögu um svæðið Mýrar-Löngufjörur til framkvæmdaáætlunar náttúruminjaskrár og til hans boðað til að upplýsa hlutaðeigandi landeigendur og fá endurgjöf áður en ákveðið væri hvort svæðið héldi áfram í lögbundið kynningarferli vegna áætlunarinnar.

Til fundarins voru boðaðir landeigendur innan svæðisins Löngufjörur og Langárós að Hjörsey auk fulltrúa viðkomandi sveitarfélaga; Borgarbyggðar, Eyja- og Miklaholtshrepps og Snæfellsbæjar. Talsverðar umræður urðu á fundinum og fram kom að fundargestir töldu málið ekki hafa verið unnið í nægilegu samráði við heimaaðila.

Málinu frestað

UST hefur nú tilkynnt að stofnunin hafi unnið úr því sem fram kom á fundinum ásamt umræðum á fjarfundi sem haldinn var um sama málefni í janúar. Niðurstaðan sem liggur fyrir að því loknu er að svæðið Löngufjörur og Langárós að Hjörsey fari ekki í lögbundið kynningarferli fyrir tillögu framkvæmdaáætlunarinnar að svo stöddu.

Fram kemur einnig að ástæða þess að Náttúrufræðistofnun Íslands leggi til að viðkomandi svæði fari á framkvæmdaáætlun náttúruminjaskrár sé sú að það hafi hátt verndargildi vegna ríkulegs lífríkis og verðmætis m.t.t. líffræðilegrar fjölbreytni. Það er alþjóðlegt mikilvægt fuglasvæði og mikilvægur viðkomustaður margra fuglategunda allt árið um kring. Þar er einnig fjöldi vatna, tjarna, votlendis, sjávarfitja og leira sem falla undir 61. gr. náttúruverndarlaga nr. 60/2013 um sérstaka vernd vistkerfa og jarðminja. Sérstaða svæðisins vegna líffræðilegrar fjölbreytni er því ótvíræð.

Svæðið Mýrar-Löngufjörur ekki á framkvæmdaáætlun að sinni

Sérstaða svæðisins þó ótvíræð

Sérstaða svæðisins þó ótvíræð