medium

large

thumbnail

1536x1536

small

custom-size

Halla kjörin formaður VR

Fjölbreytt dagskrá Kirkjulistaviku í síðustu viku mars

Nokkuð um umferðaróhöpp samkvæmt dagbók lögreglu

Landlæknisembættið vill breyta mataræði landsmanna

2048x2048

Hrindir af stað átaki til jarðhitaleitar – kynning í streymi klukkan 13 í dag

Kristín er nýr formaður Kratlyftingafélags ÍA

core/paragraph

Húsfyllir var á fundi sem Umhverfisstofnun (UST) hélt í félagsheimilinu Lyngbrekku á Mýrum í gær, mánudag. Til fundarins voru boðaðir landeigendur innan tillögusvæða á framkvæmdaáætlun náttúruminjaskrár, allt frá Langárósi og vestur á Snæfellsnes. Miklar og heitar umræður urðu á fundinum og landeigendur telja enn margra svara vant.

Fyrri fundur var 18. janúar

Í fundarboði UST kemur fram að fundurinn væri kynningarfundur um tillögu að framkvæmdaáætlun náttúruminjaskrár; hvernig kynningarferlinu yrði háttað, hvaða áhrif þetta hefði á landeigendur, réttaráhrif og fleira. Farið yrði yfir tillögu að framkvæmdaáætlun náttúruminjaskrár og hvað það feli í sér að svæði fari inn á hana. Einnig yrði boðið upp á spurningar og umræður. Áður hafði verið boðað til fundar um sama málefni 18. janúar sl. og þá sem fjarfundar á Teams. Þar mætti aðeins lítill hluti landeigenda og fóru þeir eindregið fram á að haldinn yrði staðfundur um málið. Boð um þann fund var sent í bréfpósti föstudaginn 2. febrúar sl. og hefur því borist til ábúenda á svæðinu á bilinu 7. til 9. febrúar miðað við póstsamgöngur eins og þær eru í sveitum í dag. Engu að síður var afar vel mætt til fundarins þótt ekki væru í raun allir hagsmunaaðilar þar staddir því einhverja þeirra hafði þegar til kom vantað á útsendingarlista UST. Það var Ingibjörg Marta Bjarnadóttir sérfræðingur hjá stofnuninni sem hafði framsögu um málið ásamt Þórhildi Maríu Kristinsdóttur landverði.

Frá Langárósi vestur á Snæfellsnes

Á vef Umhverfisstofnunar kemur fram að svæðið liggur innan tillögusvæðisins Mýrar-Löngufjörur og liggur að stórum hluta út í sjó og yfir láglend og lífrík votlendissvæði, sjávarlón og fjörur. Á grunnsævi er mikill fjöldi eyja, hólma og skerja og við vogskorna ströndina er fjörubeðurinn ýmist víðáttumiklar leirur, sandfjörur eða sjávarfitjar. Einnig eru selalátur landsels og útsels innan svæðisins sem og lífríkar sjávarfitjar og leirur og Langárós er einn lengsti og frjósamasti árós landsins eða um tíu km að lengd.

Fram kemur að ekki er gert ráð fyrir að heimalönd jarða og athafnasvæði liggi innan afmörkunar vegna verndunar svæðisins sem er hluti af alþjóðlega mikilvægu fuglasvæði. Spurt var nánar út í það á fundinum hvað þetta þýddi en svör voru lítil og loðin. Mikið varp vatnafugla er á svæðinu og það er mikilvægur viðkomustaður margra tegunda. Votlendissvæðin, vötn og tjarnir, sjávarfitjar og leirur á svæðinu falla undir ákvæði 61. gr. náttúruverndarlaga um sérstaka vernd.

Heitar umræður urðu á fundinum og ljóst var að fundargestir höfðu margar athugasemdir og töldu málið frá upphafi ekki hafa verið unnið í nægilegu samráði við heimaaðila. Sveitarfélögin sem þetta snertir eru þrjú; Borgarbyggð, Eyja- og Miklaholtshreppur og Snæfellsbær og þótt ferlið sé búið að vera í gangi síðan árið 2018 hafði ekkert þeirra fengið formlega kynningu á málinu áður. Skessuhorn hafði samband við einn fundargesta, Laufeyju Bjarnadóttur bónda á Stakkhamri, en sú jörð liggur að sjó vestan Straumfjarðar. Hún segir ferlið komið langt og að þetta sé í raun fyrsta skrefið að friðlýsingu. Fólk væri óhresst með að þurfa nú á tímum að verjast ágangi ríkisins í þessu formi, því að eftir að svæðið er komið inn á náttúruminjaskrá er öll landnotkun háð samráði við og leyfi UST. Slíkt tæki óheyrilegan tíma og nefndi hún að það hefði tekið um tíu ár að fá í gegn að byggja við Hótel Búðir vegna friðlýsingarákvæða og ekki mætti gera þar bílaplan vegna friðlýsingar hraunsins.

core/image

<figure class="wp-block-image size-large is-style-default"><img src="https://umsjon.skessuhorn.is/wp-content/uploads/2024/02/Hitafundur-um-fridlysingarmal_2-1200x800.jpg" alt="" class="wp-image-74691"/><figcaption>Úr Akrafjöru. Ljósm. gj</figcaption></figure>

Faglegar mætti standa að málum

Fólk skildi ekki hvers vegna verið væri að fara í þessa vegferð núna. Laufey tók fram að bændur á svæðinu væru samt fylgjandi náttúruvernd og tækju margir þátt í ýmsum verkefnum á því sviði nú þegar, t.d. varðandi fuglalíf. Það væri því skilningur fyrir hendi á því að vistkerfi sem þarna eru séu mikilvæg á heimsvísu og beri að vernda. En allt málið væri illa unnið og ófaglega auk lítils samráðs. Töluvert væri líka um missagnir og misskilning vegna vöntunar á þekkingu á staðháttum. Undirskriftalista hefur verið komið á framfæri bæði við umhverfis- og auðlindaráðuneytið og þingmenn kjördæmisins.

Varðandi kynninguna á fundinum í Lyngbrekku sagði Laufey að fá svör hefðu fengist og t.d. hafi ítrekað verið spurt um hvers vegna stór svæði væru undanskilin því að fara á framkvæmdaáætlun náttúruminjaskrár, en ekki hefði verið hægt að svara því. Næsta skref í þessu væri átta vikna kynningarferli þar sem hægt væri að senda inn athugasemdir, en ekki hefði verið hægt að svara til um hvenær það tímabil hæfist. Landeigendur hafa að undanförnu rætt mikið saman og komið skoðunum sínum á framfæri við viðkomandi sveitarfélög sem hafa hafnað öllum framkomnum tillögum.

Yfirlýsing landeigenda

Landeigendur jarða á Löngufjörum og á svæðinu frá Langárósi að Hjörsey hafa sent frá sér tilkynningu þar sem þeir hafna alfarið þeim tillögum sem kynntar voru á fjarfundinum 18. janúar. Þar kom fram að til stæði að setja umrædd svæði á framkvæmdaáætlun náttúruminjaskrár. Í tilkynningu sinni lýsa landeigendur yfir vonbrigðum sínum og furðu yfir því vinnulagi að á þeim tíma hafi ekki verið haft samband við landeigendur strax. Tillögum Náttúrufræðistofnunar Íslands til framkvæmdaáætlunar náttúruminjaskrár hafna landeigendur alfarið og ljúka erindi sínu á að fara fram á að vinna sem miði að því að setja áðurnefnd svæði á framkvæmdaáætlun náttúruminjaskrár verði lögð niður hið fyrsta svo tími og fjármunir allra nýtist í þarfari hluti. Þeir hafa tilnefnt fjóra úr sínum hópi til að halda utan um næstu skref, þau Laufeyju Bjarnadóttur Stakkhamri, Nellý Pétursdóttur Sveinsstöðum, Sigurð Jóhannsson Stóra Kálfalæk og Gísla Guðmundsson í Hömluholti. Þau héldu utan um undirskriftasöfnunina og koma erindum áfram fyrir hópinn.

Sveitarstjórnir sem tillögurnar snertir hafa sent UST erindi þess efnis að þær styðji afstöðu landeigenda til ofangreindra áforma Umhverfisstofnunar.

Tilgangurinn að fá fram sjónarmið

Að sögn Ingibjargar Mörtu komu margar góðar spurningar fram á fundinum í Lyngbrekku, sem og athugasemdir og umræður frá landeigendum um málið. Tilgangur fundarins hafi einmitt verið að fá fram sjónarmið landeigenda vegna þessa. Í kynningunni hefði komið fram að formlegt kynningarferli væri næsta skref, en sú kynning fer fram eftir að unnið hefur verið úr niðurstöðum funda með landeigendum. Varðandi fundi með sveitarfélögunum þá hafi Umhverfisstofnun fundað tvisvar sinnum með Borgarbyggð og Eyja- og Miklaholtshreppi vegna málsins, í nóvember og í febrúar og einu sinni með Snæfellsbæ í janúar. Hún nefndi einnig fundinn með landeigendum 18. janúar. Upptöku af kynningu fundarins, glærur, vinnukort og frekari upplýsingar megi nálgast á eftirfarandi slóð á vef Umhverfisstofnunar: <a href="https://ust.is/nattura/framkvaemdaaaetlun-natturuminjaskrar/longufjorur/">https://ust.is/nattura/framkvaemdaaaetlun-natturuminjaskrar/longufjorur/</a>

Fréttaveita Vesturlands

Hitafundur um friðlýsingarmál