Knattspyrnufélag ÍA og Norðurál hafa endurnýjað styrktarsamning sinn til næstu þriggja ára. Norðurál hefur síðan árið 2010 verið aðalstuðningsaðili félagsins og segir í frétt á FB síðu félagsins að það sé mikið gleðiefni að næstu þrjú árin hið minnsta muni merki Norðuráls prýða treyju félagsins.

Gunnar Guðlaugsson, forstjóri Norðuráls sagði við þetta tilefni: „Við hjá Norðuráli erum gríðarlega ánægð með að styðja við öflugt starf KFÍA og þá ekki síst við starf yngri iðkenda. Þar ber Norðurálsmótið hæst þar sem allir leggjast á eitt, félagið og íbúar Akraness, til að skapa glæsilega umgjörð fyrir yngstu iðkendurna og fjölskyldur þeirra. Sú breyting að bjóða yngstu stúlkunum að taka þátt í mótinu hefur mælst vel fyrir og erum við sannfærð um að það muni gera Norðurálsmótið enn betra.“

Eggert Hjelm Herbertsson, formaður KFÍA, er sömuleiðis ánægður með samninginn: „Það er okkur sönn ánægja að framlengja samstarfið við Norðurál sem hefur verið okkar helsti bakhjarl í yfir áratug. Með þessum samningi verður samstarfið farið að nálgast annan áratug og Norðurál því stutt við heila kynslóð knattspyrnuiðkenda á Akranesi. Það er Knattspyrnufélaginu mikill stuðningur í að bæði stór og smá félög á svæðinu styðji við starf félagsins og hefur Norðurál svo sannarlega staðið sína plikt í því undanfarin ár og verið öðrum fyrirtækjum góð fyrirmynd. Stuðningurinn hefur verið okkar félagi mikils virði og er Norðurálsmótið eitt þekktasta mót sem haldið er á landinu. Við erum afar þakklát þeim góða stuðningi og velvilja sem Norðurál sýnir Knattspyrnufélagi ÍA.“

Norðurál hefur frá upphafi samstarfsins stutt vel við bakið á Norðurálsmótinu sem er eitt stærsta knattspyrnumót landsins í yngri flokkunum. Á síðasta móti voru það samtals 301 lið sem tóku þátt, um 1.800 keppendur frá 35 aðildarfélögum á landinu.

KFÍA og Norðurál endurnýja samning til næstu þriggja ára