Í þessum lið leggjum við fyrir tíu spurningar til íþróttamanna úr alls konar íþróttum á öllum aldri á Vesturlandi. Íþróttamaður vikunnar að þessu sinni er Baldur frá Búðardal en hann stundar knattspyrnu og frjálsar íþróttir.

Nafn: Baldur Valbergsson

Fjölskylduhagir? Ég bý heima hjá foreldrum mínum og stóra bróður.

Hver eru þín helstu áhugamál? Fótbolti og frjálsar íþróttir.

Hvernig er venjulegur dagur hjá þér um þessar mundir? Vakna um svona hálf átta og græja mig fyrir skóla. Síðan kem ég heim um um hálf fjögur, fæ mér að borða og græja mig svo fyrir æfingu á Akranesi. Ég fer að heiman um svona sex á Skagann og kem heim klukkan ellefu um kvöldið.

Hverjir eru þínir helstu kostir og gallar? Mínir helstu kostir eru að ég er yfirleitt alltaf í stuði og kátur en minn helsti galli er að ég er ofboðslega þrjóskur.

Hversu oft æfir þú í viku? Ég fer á Skagann tvisvar til þrisvar í viku á fótboltaæfingu.

Hver er þín fyrirmynd í íþróttum? Fyrirmynd mín í frjálsum er Usain Bolt.

Af hverju valdir þú knattspyrnu? Ég veit ekki af hverju ég valdi fótbolta. Ég man bara að ég æfði smá bara svona hérna heima en vinur minn, hann Grétar, var að æfa svo ég bað um að fá að æfa með honum þar.

Hver er fyndnastur af þeim sem þú þekkir? Það eru þrír sem eru svona jafn fyndnir og það eru þeir Ívar vinur minn, Siggi á Vatni, nágranni minn, og hann afi minn.

Hvað er skemmtilegast og leiðinlegast við þína íþrótt? Það er alltaf skemmtilegast að spila leiki í fótbolta, keppa á mótum og fara í ferðalög. Það leiðinlegasta er í rauninni ekkert en samt er það kannski styrktaræfingar en annars er allt við fótbolta skemmtilegt.

Íþróttamaður vikunnar er yfirleitt alltaf í stuði