Segja hjónin Steini og Ella sem ætla að hætta rekstri í vor

Fyrirtækið Rammar og myndir á Akranesi hefur verið starfrækt frá árinu 1997 eða í næstum 27 ár. Hjónin Steinn Mar Helgason og Elín Klara Svavarsdóttir hafa verið eigendur Ramma & mynda frá upphafi. Þau keyptu núverandi húsnæði á Skólabraut 27 árið 1998 en voru fyrsta árið í húsi sem heitir Ásgarður á Kirkjubraut 17. Blaðamaður Skessuhorns kom við hjá Steina og Ellu á dögunum og tók þau í spjall. Á síðasta ári var fyrirtækið sett á sölu og segja þau að enn hafi enginn sýnt áhuga á því að taka við rekstrinum. En hvað kom til að þau tóku þá ákvörðun að setja fyrirtækið á sölu?

Steini er fyrri til svars og segir: „Við erum bæði orðin gömul, Ella varð sjötug í fyrra á Þorláksmessu og ég verð 70 ára um miðjan febrúar næstkomandi. Heilsan er heldur ekki upp á það besta hjá mér, ég er búinn að vera glíma við krabbamein í sjö ár og það gengur sæmilega að kljást við það. Þegar ég byrjaði með þetta fyrirtæki þá var það gert með það í huga að geta verið hérna sem gamall maður að dúlla sér. Svo loks þegar maður er orðinn gamall þá er maður hættur, svona breytist allt með heilsunni. Maður hefur ekki mikla orku en það er dagamunur á manni og auðvitað hefði maður kannski átt að vera löngu hættur að vinna.“

Hvenær haldið þið að þið hættið með búðina? „Ég hugsa að það verði í vor,“ segir Steini. „Við erum að fara til Kanarí í febrúar í tilefni af afmælinu mínu og verðum þar allan mánuðinn. Við fórum með alla fjölskylduna yfir jól og áramót til Tenerife í tilefni af gullbrúðkaupi okkar Ellu 29. desember. Við vorum 24 talsins og við buðum öllum með okkur. Við ákváðum þetta mjög tímanlega svo enginn hafði afsökun um að komast ekki og þetta var dásamleg ferð í faðmi fjölskyldunnar.“

*Óvíst er hvað tekur við í húsnæðinu í vor.*

Margir sem halda að búið sé að loka

Helstu verkefnin síðustu misserin segja þau vera að ramma inn myndir, þau fara í hús, taka mál og setja upp gardínur og taka passamyndir á stofunni. Þau voru með umboðið fyrir SÍBS happdrættið öll árin en hættu með það um síðustu áramót. En hver er aðal munurinn á því þegar þið voruð að byrja og svo á síðustu árum? „Fólk er nánast alveg hætt að setja myndir í innrömmun eða það hefur minnkað alveg svakalega,“ segir Steini. „Nú er allt keypt í tilbúnum ramma, hérna stóð maður á haus í rammagerð á árum áður. Fólk kaupir þetta bara tilbúið núna en kemur svo oft til mín með Ikea rammana til að láta laga þá og setja gler í þá því það er oft plast í þeim. Svo kemur svolítið af viðgerðum inn hérna, við gerum ýmislegt og yfirleitt bara það sem við erum beðin um að gera.“ Ella bætir við: „Það eru voða margir sem halda að við séum búin að loka, það hefur eitthvað misskilist þessi auglýsing sem fór hérna um daginn. Svo erum við enn að taka passamyndir og það gengur bara vel. Það hefur alltaf verið hægt að fara í Kringluna og taka passamyndir en það er gott fyrir fólk á Skaganum að geta gert þetta hér, sérstaklega eldra fólkið. Nú er að hópast inn til okkar þeir sem eru að verða sjötugir á árinu því þeir þurfa að endurnýja ökuskírteinin sín. Það er nýr hópur á hverju ári sem þarf að gera það til að fá endurnýjun í fimm ár og svo koma þeir til okkar sem eru að taka bílprófið í fyrsta skipti.“

Hafa alltaf verið mjög samrýmd

Hvernig hefur þessi tími verið öll þessi ár? „Þetta er búið að vera alveg meiriháttar, reksturinn hefur gengið alla vega og þetta hefur þvælst.“ En hvernig er að vinna saman næstum alla daga? Ella svarar því: „Það hefur bara gengið vel, stundum fer í ég í fýlu út í hann og hann út í mig. Þetta er bara eins og gengur og gerist, svo er það bara leyst í rólegheitunum. Við erum mikið saman, það hefur alltaf verið þannig og höfum alltaf verið mjög samrýmd.“ Eruð þið með svipað skap? „Nei, Steini er svo aumingjagóður, segir Ella og hlær. „Nei, við erum ekki með sama skap, langt í frá en það hefur ekki komið að sök því við pössum vel saman. Steini er vatnsberi og ég steingeit og það hefur smollið ágætlega saman hjá okkur, alla vega í meira en 50 ár.“

Steini og Ella eiga fimm börn, tíu barnabörn og eitt barnabarnabarn. Svo það er nóg að gera hjá þeim hjónum. „Við erum reyndar alveg hætt að passa, við erum orðin svo gömul að við erum ekki beðin lengur,“ segir Ella og glottir. „Börnin okkar eru orðin svo fullorðin, elsta barnabarnið er að verða 29 ára núna í febrúar en það yngsta er sex ára. Sá er á Húsavík svo það er langt að fara og við því ekki spurð en barnabarnabarnið er í Keflavík og er orðið tveggja ára. En það er dásamlegt að eiga stóra fjölskyldu og gefur lífinu lit.“

Blaðamaður fann viðtal við þau hjónin í Skessuhorni fyrir nákvæmlega tíu árum síðan og þar var ósögð saga um ellefu snuð. Blaðamaður spyr þau út í þetta. „Dótturdóttir okkar, María Mist dóttir Steindóru, var svo lengi með snuð. Pabbi, Helgi Dan, sagði eitthvað við hana á þá vegu að ef hún myndi hætta með snuð þá mætti hún fara í Kringluna og velja sér hvað sem var þar. Sú stutta fór með langafa sínum í Kringluna og keypti eitthvað risastórt eldhús og pabbi sagði eftir það: „Ég ætla aldrei að skipta mér af því hvað börn eru lengi með snuð.“ Við ætluðum að ramma snuðin inn og gefa henni þau en svo var þeim óvart hent í einni tiltektinni.“

*Tilbúin innrömmuð mynd sem fer upp á Höfða.*

Á fullu í golfið

Steini og Ella eiga til mikið af dóti í versluninni eftir allan þennan tíma þrátt fyrir tiltekt af og til. Sumt af því hefur aldrei verið sótt og þau stefna á að losa sig við þetta allt saman. „Þau komu hérna frá Grundaskóla um daginn og fengu að gjöf um 20 gyllta ramma til að nota í leiksýningunni Úlfur úlfur. Við hefðum hent þessu hvort sem er, við erum hvort eð er að fara hætta.“ Hvað tekur svo við hjá ykkur hjónum í vor þegar þið hættið þessu? „Ég ætla að fara að spila golf næsta sumar,“ segir golfarinn Steini. „Ég keypti mér golfbíl fyrir nokkrum árum síðan og er búinn að spila í 20 ár, ég byrjaði um fimmtugt og það er alltof seint. Ég á erfitt með að labba, annars mundi ég gera það. Ég væri hættur í golfi ef ég hefði ekki keypt mér bíl, það er einfalt mál. Svo ætlum við bara að dúlla okkur. Ella ætlar að dekra meira við mig eftir að hún hættir að vinna, meira en hún hefur vanalega gert. Ég held að það sé ekki hægt en ég bíð bara spenntur.“

Skelltu sér á úrslitaleik

Steini er mikill knattspyrnuáhugamaður og uppáhaldsliðið hans í enska boltanum er Tottenham Hotspur og hefur hann haldið með því síðan hann man eftir sér. Hann segir okkur söguna þegar hann sá Spurs vinna síðast bikar: „Við fórum á nýja Wembley í London árið 2008 og þetta var fyrsti úrslitaleikurinn í deildarbikarnum sem var spilaður þar. Það var þannig að ég var að setja upp eldhúsinnréttingu niður í bæ þegar þeir voru að spila undanúrslitaleikinn og horfði á sjónvarpið með öðru auganu. Þegar ég kom heim þá sagði ég við Ellu: „Eigum við ekki bara að skella okkur á úrslitaleikinn,“ jú sagði hún strax. Við pöntuðum flug og það var mjög erfitt að fá miða á leikinn, ég setti nokkra öngla út, hvort það væri möguleiki að fá miða einhvers staðar. Þetta leit ekki vel út, svo líður og bíður og nokkrum dögum áður en við áttum flug út og ekki komin með miða, segi ég við Ellu: „Við förum bara út og mætum fyrir utan Wembley og sjáum hvort við fáum miða, ekkert vesen.“ Svo er hringt í mig daginn eftir og þá er sagt: „Steini, varst þú ekki búinn að biðja um miða á leikinn?“ Jú, sagði ég. Það er búið að redda þessu fyrir þig! Allt í lagi segi ég, hvað kostar þetta? Við fengum þetta bara á eðlilegu verði, ég náði þessu í gegnum KSÍ og miðarnir biðu bara eftir okkur á vellinum en þetta var sko alveg þess virði.“

Steini segir að það sé búið að vera rússíbanareið að halda með þessu liði í allan þennan tíma. Svo eru ekki margir í fjölskyldunni sem halda með Tottenham, þetta eru aðallega Arsenal aðdáendur sem eru erkifjendur Tottenham. „Þetta getur verið erfitt að hafa alla þessa Nalla í kringum sig en samt skemmtilegt og það er ekki langt í næsta titil, það er ég viss um.“

Plata dagsins

Þeir sem eru vinir Steina á fésbókinni hafa tekið eftir því undanfarið að hann birtir mynd af plötu dagsins á síðunni sinni og er ansi skemmtilegt. Hvenær kviknaði sú hugmynd? „Ég veit það ekki, græjurnar mínar voru alltaf niðri í geymslu. Við vorum eitthvað að kíkja á Bang & Olufsen græjur frá 1978, þær höfðu verið niður í geymslu eftir að við fluttum af Reynigrundinni og svo er ákveðið að setja græjurnar upp. Þá datt mér þetta í hug að það væri gaman að hlusta á eina plötu á morgnana meðan ég borða morgunmatinn og hef hlustað alla daga síðan í byrjun september, nema þegar við vorum úti á Tene.“ Hvað áttu margar plötur? „Ég veit það ekki en ég er ekki hálfnaður með þær. Ég komst að því þegar ég byrjaði á þessu að ég fann ekki margar plötur sem ég átti, þá var ég líklega búinn að gefa eitthvað af þeim. Þá fór ég að kaupa þær plötur sem ég fann ekki, það er dýrt en mér er alveg sama. Við hlustum mikið á tónlist, við eigum mjög mikið af geisladiskum og nú erum við að leita að geislaspilara til að tengja við B&O græjurnar. Það var barningur hvar ég mátti setja græjurnar en svo keypti Ella handa mér þennan fína plötuskáp og allir sáttir. Lífið er núna og þá er bara að njóta þess,“ segir Steini og blaðamaður kveður þau hjónin með þessi orð í huga.

„Við ætlum bara að dúlla okkur“

Segja hjónin Steini og Ella sem ætla að hætta rekstri í vor

Segja hjónin Steini og Ella sem ætla að hætta rekstri í vor