Ljósmyndasafn Akraness heldur vikulega ljósmyndafundi á Dvalarheimilinu Höfða og núna í janúar er ár síðan fyrsti fundurinn var haldinn. Fundirnir eru haldnir einu sinni í viku af Héraðsskjalaverði Akraneskaupstaðar, Erlu Dís Sigurjónsdóttur, í samvinnu við starfsfólk í dagdvöl. Á fundina mæta íbúar Höfða, fólk í dagdvöl, gestir og starfsfólk.

Á hverjum fundi eru sýndar ljósmyndir úr bæjarlífinu og eru nöfn, hús og staðhættir greind. Á fundinum er farið yfir um 70-80 myndir og er mæting góð eða um og yfir 20 manns í hvert skipti. Fundirnir eru á hverjum fimmtudegi frá klukkan 10.30-11.30.

Fram kemur á vefsíðu Akraneskaupstaðar að þetta er ekki eina skemmtilega afmælisverkefni safnsins en verkefnið ,,Þekkir þú andlitin” hóf einnig göngu sína í janúar 2023. Þá geta bæjarbúar litið við á Bókasafni Akraness þar sem Ljósmyndasafnið hefur komið fyrir skjá með myndum til greiningar. Nýjar myndir birtast á hverjum mánudegi og eru þá á bilinu 70-80 andlit til greiningar. Hverju andliti fylgir númer og til hliðar er blað þar sem eigendur glöggra augna geta skrifað niður nöfn þeirra sem þau þekkja á myndunum.

Í fjöldamörg ár hafa einnig verið haldnir vikulegir ljósmyndafundir á Bókasafni Akraness þar sem fólk kemur saman og skoðar gamlar ljósmyndir og hjálpast að við að finna nöfnin á fólki á viðkomandi myndum. Þeir fundir eru öllum opnir og eru í Svöfusal á miðvikudögum milli klukkan 10 og 12.

*Hress hópur á Bókasafni Akraness í desember. Ljósm. FB síða Ljósmyndasafns Akraness*

Eitt ár frá fyrsta ljósmyndafundi á Höfða