Þegar snjó tók að kyngja niður í Grundarfirði fóru skíðaþyrstir íbúar að gjóa augunum upp í fjall til að gá hvort snjótroðarinn væri kominn á stjá. Það lyftist brúnin á þeim á laugardagskvöldið þegar ljósin frá troðaranum sáust færast upp og niður skíðabrekkuna enda var töluvert af snjó komið í brekkuna. Búið var að troða fyrir hádegi í gær og upp úr hádeginu hófust sjálfboðaliðar handa við að koma öllu í lag svo hægt væri að opna lyftuna. Það gekk allt upp og lyftan var ræst klukkan 15:45 og var opin frameftir degi. Frítt var í lyftuna þennan fyrsta opnunardag og var góð mæting enda skíðafærið mjög fínt. Nú binda menn vonir til að hægt verði að hafa opið áfram en því stýra jú veðurguðirnir.