Þriðji þáttur útsláttarkeppni Idol söngkeppninnar fer fram í kvöld í Idolhöllinni að Fossaleyni. Hann verður sýndur í beinni útsendingu á Stöð 2 klukkan 19 og stendur til rúmlega níu. Þema kvöldsins í þættinum er Hollywood og spreyta þátttakendur sig á lögum úr bandarískum bíómyndum.

Sex keppendur standa nú eftir og keppast um það að verða næsta Idolstjarna Íslands. Af þeim eru tveir af Vesturlandi, Björgvin Þór Þórarinsson og Jóna Margrét Guðmundsdóttir. Hin eru þau Anna Fanney Kristinsdóttir, Ólafur Jóhann Pétursson, Elísabet Björgvinsdóttir og Stefán Óli Magnússon. Spennan magnast og ljóst að keppnin verður harðari með hverri vikunni sem líður. Síðasta föstudag var það ísfirska söngkonan Birgitta Ólafsdóttir sem var send heim.

Í þætti kvöldsins er Björgvin Þór fjórði í röðinni og syngur lagið Accidentally In Love í flutningi hljómsveitarinnar Counting Crows. Jóna Margrét kemur síðan á eftir honum og flytur lagið The Story með Söru Ramirez. Um er að ræða tíunda Idol þáttinn af tólf og því gætu tveir keppendur dottið út í kvöld en það á eftir að koma í ljós.

Rétt eins og síðustu tvö föstudagskvöld eru örlög keppenda í höndum áhorfenda. Símakosning segir til um það hvaða keppendur halda áfram og hvaða keppandi verður sendur heim. Hvert atkvæði í símakosningunni kostar 169 krónur og einnig er hægt að kjósa í gegnum appið Plúsinn en þar verður hægt að fá magnafslátt af atkvæðum.

*Mynd frá síðasta þætti. Björgvin Þór með saxafóninn við höndina. Ljósm. stod2.is*

Björgvin Þór og Jóna Margrét í Idolinu í kvöld