Mótanefnd KSÍ hefur staðfest niðurröðun leikja í Lengjubikarnum árið 2024. Lengjubikarinn hefur síðustu ár fest sig í sessi sem helsta undirbúningsmót liða fyrir Íslandsmótið í knattspyrnu. Skessuhorn tekur hér saman það helsta af leikjum liðanna af Vesturlandi.

Skagamenn leika í A-deild karla og eru með Aftureldingu, Dalvík/Reyni, Leikni R., Víkingi R. og KA í riðli 4. Fyrsti leikur Skagamanna er gegn Aftureldingu fimmtudaginn 8. febrúar í Akraneshöllinni og hefst klukkan 20. Fimmti og síðasti leikur ÍA í riðlinum verður svo sunnudaginn 3. mars gegn Leikni á útivelli og hefst klukkan 13. Miðvikudaginn 13. mars verða undanúrslitin spiluð þar sem efstu lið riðlanna fjögurra etja kappi og úrslitaleikurinn í A deild karla er svo áætlaður sunnudaginn 17. mars.

Víkingur Ólafsvík og Kári leika í B deild karla. Víkingur er með Árbæ, Elliða, KV, Vængjum Júpiters og Þrótti V. í riðli 2. Fyrsti leikur Víkings er á móti Vængjum Júpiters laugardaginn 17. febrúar á Fjölnisvelli og hefst klukkan 14. Síðasti leikur Víkings verður laugardaginn 23. mars gegn KV á KR-velli og hefst klukkan 14.

Kári er með Hvíta riddaranum, KFG, KFK, Sindra og Ægi í riðli 3. Fyrsti leikur Kára er á móti KFK föstudaginn 16. febrúar í Akraneshöllinni og hefst klukkan 20. Síðasti leikur Kára í riðlinum er laugardaginn 23. mars á móti Ægi í Akraneshöllinni og hefst klukkan 14. Undanúrslitin í B deild karla verða 19. og 20. apríl og úrslitaleikurinn sunnudaginn 28. apríl.

Skallagrímur leikur í C deild karla og er með KM, Kríu, Samherjum og Tindastóli í riðli 4. Fyrsti leikur Skallagríms í riðlinum er gegn Kríu laugardaginn 24. febrúar í Akraneshöllinni og hefst klukkan 18. Síðasti leikur Skallagríms er gegn KM laugardaginn 23. mars í Kórnum og hefst klukkan 16. Undanúrslitin verða 19. og 20. apríl og úrslitaleikurinn miðvikudaginn 1. maí.

ÍA leikur í B deild kvenna þar sem er einn riðill og sjö leikir á hvert lið. Liðin sem eru með ÍA í riðlinum eru Afturelding, FHL, Fram, Grindavík, Grótta, HK og ÍR. Fyrsti leikur ÍA er á móti ÍR laugardaginn 17. febrúar í Akraneshöllinni og hefst klukkan 11.30. Síðasti leikur ÍA í riðlinum er gegn Gróttu miðvikudaginn 17. apríl á Seltjarnarnesi og hefst klukkan 19.

Niðurröðun í Lengjubikarnum 2024 staðfest