Síðastliðinn þriðjudag fór fram afhending verðlauna til Íþróttafólks HSH. Arnar Geir Diego Ævarsson var kjörinn Íþróttamaður HSH 2023 ásamt því að vera Skotíþróttamaður HSH. Að auki var dugnaðarforkum og sjálfboðaliðum HSH veittar viðurkenningar fyrir þeirra störf.

Arnar Geir hefur verið mjög virkur í starfinu hjá Skotfélagi Snæfellsness á nýliðnu ári og tekið þátt í fjölda móta. Hann varð Íslandsmeistari í PRS, en það er tiltölulega ný keppnisgrein á Íslandi þar sem keppt er í riffilskotfimi og keppendur þurfa að skjóta úr fjölbreyttum stellingum. Þetta er sex móta mótaröð þar sem keppt er um allt land og þrjú bestu mótin telja til stiga. Arnar Geir tók þátt í öllum mótum ársins og stóð uppi sem Íslandsmeistari í verksmiðjuflokknum, en keppt er í tveimur flokkum, opnum flokki og verksmiðjuflokki. Að auki hefur Arnar Geir staðið fyrir útbreiðslu PRS innan félagsins.

Eftirfarandi einstaklingar fengu verðlaun og viðurkenningar fyrir þeirra starf árið 2023.

Íþróttafólk HSH: Anna María Reynisdóttir – Blakíþróttamaður HSH, Aron Ingi Hinriksson – Körfuboltamaður HSH, Harpa Dögg Bergmann Heiðarsdóttir – Hestaíþróttamaður HSH Ingvar Freyr Þorsteinsson – Knattspyrnumaður HSH og Sigurþór Jónsson – Kylfingur HSH.

Sjálfboðaliðar HSH: Erna Sigurðardóttir, Gréta Sigurðardóttir, Helga Ingibjörg Reynisdóttir, Kristján Ágúst Magnússon, María Alma Valdimarsdóttir, Vignir Sveinsson og Ægir Ægisson.

Vinnuþjarkar HSH: Gunnhildur Gunnarsdóttir og Magnús Ingi Bæringsson.

*Íþróttafólkið, sjálfboðaliðar og vinnuþjarkar saman á mynd.*

Arnar Geir kjörinn Íþróttamaður HSH