Snæfell tók á móti Njarðvík í Subway deild kvenna í körfuknattleik í Stykkishólmi í gærkvöldi. Fyrir leik var staða liðanna nokkuð ólík í deildinni en Njarðvíkurkonur voru með 22 stig í öðru sætinu á meðan Snæfell var á botninum ásamt Fjölni með fjögur stig.

Heimakonur hófu leik ansi vel og staðan 9:2 fyrir Snæfelli eftir fjögurra mínútna leik. Gestirnir vöknuðu síðan loksins og voru komnir með fimm stiga forskot eftir fyrsta leikhluta, staðan 14:19 fyrir Njarðvík. Snæfellskonur náðu að hanga í þeim í öðrum leikhluta og þó að munurinn á milli liðanna hefði mest verið ellefu stig um tíma Njarðvík í vil þá var staðan í hálfleik 34:40 fyrir gestunum og heimakonur ennþá vel inni í leiknum.

En í stöðunni 41:44 í þriðja leikhluta náði Njarðvík svaka áhlaupi, þær skoruðu 18 stig í röð á fimm mínútna kafla og allt í einu var staðan 41:62 Njarðvík í vil. Lítið breyttist þessa einu og hálfu mínútu sem eftir var af leikhlutanum og staðan 48:66 fyrir síðasta fjórðunginn. Njarðvík skoraði fyrstu níu stigin í honum og staðan orðin ansi erfið fyrir Snæfellskonur. Þegar fjórar mínútur voru eftir af leiknum var staðan 52:80 fyrir Njarðvík og þessum tímapunkti var kannski eina spurningin hvað sigurinn yrði stór. Njarðvíkurkonur voru ekkert á því að gefa nein færi á sér undir lokin og þær unnu að lokum 33 stiga sigur, lokatölur 59:92 Njarðvík í hag.

Mammusu Secka var stigahæst hjá Snæfelli með 21 stig, Eva Rupnik var með 16 stig og Shawnta Shaw með 13 stig. Hjá Njarðvík var Selena Lott með 26 stig og 11 fráköst, Emilie Hesseldal og Ena Visa voru með 15 stig hvor og Hulda María Agnarsdóttir með 10 stig.

18. og síðasta umferðin í Subway deild kvenna verður í lok janúar. Síðan verður deildinni skipt í efri og neðri hluta. Í efri hlutanum, A deild, eru Keflavík, Njarðvík, Stjarnan, Grindavík og Þór Akureyri. Í neðri hlutanum, B deild, eru lið Hauka, Vals, Fjölnis og Snæfells. Þegar þessum leikjum lýkur verður úrslitakeppni átta liða en það eru þau fimm lið sem skipa A deild og þrjú efstu liðin úr B deild. Öll liðin sem fara í úrslitakeppnina eiga þá möguleika á að verða Íslandsmeistarar. Það lið sem endar í fjórða sæti B deildar fer í umspil með 2., 3. og 4. sæti fyrstu deildar um laust sæti í úrvalsdeild á næstu leiktíð.

Fyrsti leikur Snæfells í B deildinni sem lýkur í byrjun apríl er á móti Haukum þriðjudaginn 6. febrúar í Stykkishólmi.

Snæfell tapaði stórt fyrir Njarðvík