Breið þróunarfélag við Bárugötu á Akranesi bauð í svokallað einyrkjakaffi sem haldið var í hádeginu síðasta föstudag. Markmiðið var að fá einyrkja í atvinnurekstri eða þá sem starfa einir til að koma í kaffispjall og fá smá félagsskap. Hátt í fjörutíu manns mættu og segir á FB síðu Breiðar þróunarfélags að viðburðurinn hafi verið vel heppnaður. „Frábær flóra af ólíku fólki sem átti frábæra stund saman.“

Á mánudaginn mættu svo á Breið Dalahvítlauksbændurnir og hjónin Þórunn Ólafsdóttir og Haraldur Guðjónsson til að afhenda seldar krukkur af 50 grömmum af hvítlauksflögusalti sem inniheldur hreint salt frá Reykhólum og 25% af hvítlauk. Vegna mikillar eftirspurnar hafa þau ákveðið að koma aftur á Skagann á morgun, fimmtudag, með fleiri krukkur sem kosta 1500 krónur stykkið. Þar geta þeir sem eiga eftir að sækja greiddar pantanir sótt þær á Breið og þá verða þau með aukalager og posa fyrir fólk sem vill koma og kaupa beint af þeim. Þau verða á 2. hæð milli klukkan 13-17.

*Þórunn og Haraldur með hvítlauksflögusaltið.*

Einyrkjar hittust í kaffi á Breið og hvítlauksbændur komu við