Annar þáttur útsláttarkeppni Idol söngkeppninnar fór fram á föstudagskvöldið í Idolhöllinni að Fossaleyni og var sýndur í beinni útsendingu á Stöð 2. Uppselt var í sal á annað úrslitakvöldið eins og það fyrsta en um 500 manns komast að í salnum. Þema kvöldsins í þættinum var 80’s lög eða lög frá níunda áratugnum.

Sex keppendur standa nú eftir og keppast um það að verða næsta Idolstjarna Íslands. Af þeim eru tveir af Vesturlandi; Björgvin Þór Þórarinsson og Jóna Margrét Guðmundsdóttir. Spennan magnast og ljóst að keppnin verður harðari með hverri vikunni sem líður. Þegar niðurstaðan úr símakosningunni var kynnt á föstudagskvöldið kom í ljós að það var söngkonan Birgitta Ólafsdóttir sem þurfti að taka pokann sinn. Hún flutti lagið Holding Out for a Hero sem Bonnie Tyler samdi fyrir myndina Footloose.

Í þætti kvöldsins söng Jóna Margrét lagið Alone í flutningi Heart og vakti mikla athygli fyrir kraftmikinn söng og góða sviðsframkomu. Björgvin Þór flutti Careless Whisper með George Michael og kom dómurum rækilega á óvart með að spila á saxófón í laginu og vakti mikla lukku. Í síðasta blaði Skessuhorns var ranglega sagt frá að Björgvin Þór hefði endað í einu af þremur neðstu sætunum í fyrsta þættinum en svo var aldeilis ekki og leiðréttist það hér með. Hins vegar var Jóna Margrét ein af þremur neðstu síðasta föstudag en komst áfram ásamt Ólafi Jóhanni.

Nú eru sex keppendur eftir í Idolinu og það eru þau Elísabet, Stefán Óli, Ólafur Jóhann, Jóna Margrét, Björgvin Þór og Anna Fanney. Næsta úrslitakvöld fer fram næstkomandi föstudagskvöld og að sjálfsögðu í beinni útsendingu á Stöð 2. Þá verður Hollywood þema og spreyta þátttakendur sig á lögum úr bandarískum bíómyndum.

Björgvin Þór og Jóna Margrét komust áfram í Idol