Hátt í 200 manns tóku þátt í 1. umferð ÍPS deildarinnar sem haldin var á Bullseye og í aðstöðu Píludeildar Þórs síðasta sunnudag. Var þetta stærsta mót sem Íslenska Pílukastsambandið hefur haldið frá því það var stofnað. Samtals var keppt í 24 deildum, 16 í RVK og 8 á Akureyri og ljóst er að íþróttin heldur áfram að vaxa og dafna.

Nýtt fyrirkomulag efstu deildar var kynnt og ný deild, Kristalsdeildin, leit dagsins ljós en þar keppa 12 bestu pílukastarar landsins hverju sinni þar sem útsláttarfyrirkomulag var prófað eftir leiki í riðlakeppni og tókst það með ágætum. Líklegt þykir að gulldeildir RVK og NA fá sama fyrirkomulag en stjórn ÍPS mun koma saman á næstu dögum og ákveða hvort það verði sett á fyrir 2. umferð.

Sigurvegari Kristalsdeildar var Grindvíkingurinn Alexander Þorvaldsson sem sigraði Harald Birgisson úr PFK 6-0 í úrslitaleiknum. Alexander var með hæsta meðaltal allra, 75,69 og átti 117 sem hæsta útskot.

Á Akureyri var það Vopnfirðingurinn Dilyan Kolev sem kom sá og sigraði Gulldeild NA og er því búinn að tryggja sér sæti í Kristalsdeild í 2. umferð. Hann var í harðri baráttu við Skagfirðinginn Arnar Geir Hjartarson og Þórsarann Óskar Jónasson um sigurinn og endaði Dilyan með 7 sigra af 8 og dugði það honum til sigurs í deildinni. Dilyan var með hæsta meðaltal allra í NA hluta deildarinnar, 65,13 og átti 106 sem hæsta útskot.

Skagamaðurinn Gunni Hó bar sigur úr býtum í Plastdeildinni en hann var valinn á dögunum ásamt félaga sínum úr Pílufélagi Akraness, Sigga Tomm, í 28 manna úrtakshóp fyrir næsta landsliðsverkefni Íslands í pílukasti. Það er Norðurlandamótið sem verður haldið á Íslandi dagana 23.-25. maí næstkomandi.

Næst á dagskrá ÍPS er Íslandsmót öldunga 50+ á laugardaginn þar sem Siggi Tomm og Stefán Bjarki Ólafsson eru skráðir til leiks frá PFA og RIG 2024 verður síðan dagana 26.-27. janúar.

Gunni Hó vann sigur í Plastdeildinni í pílu