Rætt við atvinnuflugmanninn Ástþór Ými hjá Icelandair

Skagamaðurinn Ástþór Ýmir Alexandersson hefur síðasta árið starfað sem flugmaður hjá Icelandair í innanlandsfluginu. Áður starfaði hann hjá Ryanair og gerði út frá Dublin. Ástþór segir að áhugi fyrir flugi og flugvélum hefði byrjað snemma. „Eftir því sem foreldrar mínar sögðu mér þá varð ég mjög ungur áhugasamur um flug. Þau sögðust muna eftir því þegar ég var að keppa með ÍA á Skagamótinu sem þá hét og var í marki að ef flugvél flaug yfir þá fór ég strax að fylgjast með henni og gleymdi því að ég stóð í markinu sem gat auðvitað verið mjög bagalegt ef andstæðingarnir voru í sókn.“

*Ástþór Ýmir ásamt unnustu sinni Telmu Rut Sigurðardóttur.*

Flugnámið

Ástþór er fæddur 1999 og tvítugur að aldri lét hann drauminn rætast þegar hann hóf flugnám árið 2019 hjá flugskólanum Keili. Fluttist hann þá til Innri-Njarðvíkur og lauk náminu 22 ára gamall, í apríl 2021. „Ég var í náminu á Covid-tímabilinu og það hafði auðvitað áhrif þannig að námið tók aðeins lengri tíma út af hinum ýmsu takmörkunum sem fylgdu faraldrinum. Námið samanstóð af bóklegum og verklegum þáttum og til að ljúka því sem atvinnuflugmaður þurfti ég að skila um 180 flugtímum. Auk flugnámsins bætti ég við mig réttindum sem flugkennari. Á þeim tíma sem ég lauk flugnáminu stóð Covid-faraldurinn sem hæst og fá flugfélög að ráða til sín nýja flugmenn þar sem flugumferð var þá í algjöru lágmarki.“

Hjá Ryanair í Dublin

Ástþór segir að þegar svo að Ryanair auglýsti eftir flugmönnum hafi hann slegið til og sótt um. „Eftir að hafa gengið í gegnum umsóknarferlið hjá Ryanair var mér boðin staða flugmanns hjá þeim með aðsetur í Dublin á Írlandi. Þjálfunin fór fram á East Midlands flugvellinum í Bretlandi og tók um þrjá mánuði. Ég flutti því til Bretlands til smábæjar sem heitir Castle Donington, sem er skammt frá flugvellinum, á meðan á þjálfuninni stóð. Að henni lokinni flutti ég svo til Dublin. Húsnæði er ekki á hverju strái þar og það endaði þannig að ég leigði herbergi hjá eldri hjónum þann tíma sem ég var í Dublin. Telma Rut Sigurðardóttir unnusta mín, sem einnig er af Skaganum, sýndi þessu flugbrölti mínu mikinn skilning og studdi mig vel en eins og gefur að skilja vorum við í fjarsambandi á meðan á þessu stóð en auðvitað leitaði hugurinn alltaf heim. Ryanair flýgur á um 90 áfangastaði út frá Dublin. Ég flaug á þessum tíma víðs vegar um Evrópu í skemmri og lengri ferðir, m.a. suður til Spánar og austur til Grikklands. Ryanair notaði einungis Boeing 737-800 og Boeing 737 MAX vélar sem ég flaug mikið á meðan ég var í Dublin. Þetta var talsverð útilega en góður skóli. Þarna öðlaðist ég dýrmæta reynslu sem hjálpaði mér að taka næstu skref en það var alltaf draumurinn að komast að hjá Icelandair.“

Að sjá landið okkar úr lofti

Ástþór sneri síðan heim til Íslands að nýju og réði sig til Icelandair þegar fyrirtækið auglýsti lausar stöður flugmanna í innanlandsfluginu snemma á árinu 2023. „Þá byrjaði ég að fljúga á áfangastaði félagsins hérna heima. Ég hafði það alltaf sem markmið að komast að hjá Icelandair. Það er alveg einstaklega skemmtilegt að fljúga hérna innanlands. Icelandair er frábær vinnustaður og þar ríkir góður starfsandi,“ segir Ástþór.

Hann segir að það að sjá fallega landið okkar úr lofti við hinar ýmsu aðstæður og árstíðir eru bara forréttindi. „Við fljúgum einnig áætlunarferðir og leiguflug til Grænlands, alls á fimm áfangastaði; Kulusuk, Constable Point, Narsarsuaq, Nuuk og Ilulissat. „Auk sérferða með hópa til annarra staða þá hef ég flogið til Bergen í Noregi og nýlega var farið með hóp til Dublin. Ég var flugmaður í þeirri ferð og kom því aftur á kunnuglegar slóðir. Félagið notar De Havilland Canada DHC-8-200 og 400 vélar í innanlandsfluginu, en þessar vélar kallast í daglegu tali „Dash-8“. 200 vélin er minni og tekur 37 farþega en kosturinn við þessar vélar er að þær þurfa stuttar flugbrautir sem getur hentað vel í Grænlandsfluginu og á Ísafirði. 400 vélin er stærri og flýgur talsvert hraðar en 200 vélin. Hún rúmar 76 farþega og er notuð á Akureyri og Egilsstaði, sem og í lengri flug þar sem lengd flugbrautarinnar er nægileg.“

*Mynd tekin á leið til Ísafjarðar. Þarna er Akranes fremst á mynd og Akrafjall, Hvalfjörður, Grunnifjörður, Hafnarfjall og til vinstri glittir í Borgarnes.*

Allt upp í sex flug á dag

Áður en Ástþór hóf að fljúga Dash vélunum fór hann til Svíþjóðar í þjálfun á flugvélarnar og tók hún tvo mánuði. Í áhöfn þessara véla eru flugstjóri og flugmaður og á stærri vélunum eru tveir flugþjónar eða -freyjur en einn eða ein á minni vélunum. Ástþór segir að það sé ákveðinn ferill sem er tekinn fyrir hvert flug.

„Fyrir flugið er farið yfir öll þau atriði sem nauðsynlegt er að skoða fyrir hvert flug; veðurspár og aðrar flugupplýsingar. Hver áhöfn getur farið allt að sex flug á dag. Á Íslandi þar sem allra veðra er von, er samt ekki mjög mikið um að flugi sé aflýst. Samt eru mánuðir eins og janúar og febrúar stundum erfiðir. Það er á stöðum eins og á Ísafirði þar sem lítið má út af bregða til þess að flugi sé aflýst. Þrátt fyrir að mest sé flogið á sömu staðina á landinu þá er starfið mjög fjölbreytt og má segja að hjá mér fari saman atvinnan og áhugamálið. Flugmenn segja oft að þeir séu að fara að fljúga í stað þess að segja að þeir séu að fara í vinnuna.“

Golfið, tæki og tól á áhugasviðinu

Ástþór sem er Skagamaður í húð og hár, er sonur Alexanders Eiríkssonar og Önnu Júlíu Þorgeirsdóttur og ólst hann upp á Akranesi. „Fyrir utan fjölskylduna þá á ég mína bestu vini á Akranesi, sem voru skólafélagar mínir í gegnum grunnskóla og fjölbrautaskólann á Akranesi og svo í gegnum fótboltann en ég lék með ÍA í yngri flokkunum upp í 2. flokk.

Ég er mikið í golfinu á sumrin og hef mjög gaman af þeirri íþrótt. Ég hef alltaf haft gaman af tækjum og tólum og þegar ég fer á Skagann tek ég oft í gröfu eða traktor hjá „gamla“ en ég tók flestöll vinnuvélaréttindi meðfram flugnáminu,“ segir Ástþór Ýmir Alexandersson að lokum.

*Á Egilsstaðaflugvelli í snjómuggu í byrjun desember.*

Flugáhuginn vaknaði snemma

Rætt við atvinnuflugmanninn Ástþór Ými hjá Icelandair

Rætt við atvinnuflugmanninn Ástþór Ými hjá Icelandair