Verkfræðistofan Efla opnaði formlega um áramótin starfsstöð á Vesturlandi. Orri Jónsson, starfsmaður EFLU á Hvanneyri, verður svæðisstjóri á Vesturlandi. Fyrir er Efla með starfsstöðvar í Reykjanesbæ, á Suðurlandi, Austurlandi, Norðurlandi og Vestfjörðum.

Undanfarin fjögur ár hefur Efla verið með skrifstofu á Hvanneyri og hafa umsvifin á svæðinu aukist jöfnum höndum þann tíma. „Með því að opna formlega starfsstöð á Vesturlandi er ætlun Eflu að festa sig varanlega í sessi á svæðinu. Bæði fyrir viðskiptavini og fyrir áhugasama framtíðarstarfsmenn sem hafa kannski ekki haft greiðan aðgang að tækifærum til þess að vinna við tæknimenntuð störf í dreifðari byggðum Vesturlands,“ segir Orri og bætir við að ætlunin sé að byggja enn meira upp starfsemina á Vesturlandi og að þetta sé hluti af þeirri vegferð.

Þessi viðbót á að auðvelda aðgengi viðskiptavina Eflu á Vesturlandi að starfsfólki fyrirtækisins. „Efla er stærsta verkfræðistofa landsins og býr yfir ótrúlega fjölbreyttri þekkingu og færni. Með bættu aðgengi að starfsfólki í nærumhverfinu eykst jafnframt aðgengi að öllum teymum Eflu í heild sama hvar sem þau starfa,“ útskýrir Orri. „Að sama skapi verða þjónustan og samskiptin persónulegri. Í smærri samfélögum þar sem allir þekkja alla verður þjónustan ávallt frábrugðin því sem tíðkast t.d. á höfuðborgarsvæðinu. Maður veit aldrei hvenær maður á von á því að lenda í samtali úti í bæ um verkefnin sem í gangi eru. Það er bæði heillandi en á sama tíma krefjandi áskorun,“ segir Orri.

Fyrst um sinn verður ekki um eiginlega skrifstofu að ræða heldur verður starfsfólk Eflu dreift um Vesturland eftir því sem hentar. Því verður hægt að finna starfsfólk fyrirtækisins á nokkrum svæðum á Vesturlandi. Auk starfsstöðvarinnar á Hvanneyri verður t.a.m. aðsetur í Grundarfirði og í Breið, nýsköpunarsetri á Akranesi.

Efla eykur þjónustu á Vesturlandi