Fyrsta umferð Gettu betur hófst í gærkvöldi í Ríkisútvarpinu með fjórum viðureignum. Fjölbrautaskólinn í Breiðholti, Fjölbrautaskóli Suðurlands, Fjölbrautaskóli Vesturlands á Akranesi og Menntaskólinn á Ísafirði komust áfram í næstu umferð keppninnar.

Fjölbrautaskólinn við Ármúla laut í lægra haldi fyrir Fjölbrautaskólanum í Breiðholti, 21 – 23. Fjölbrautaskóli Suðurlands vann Borgarholtsskóla, 35 – 15. Fjölbrautaskóli Vesturlands á Akranesi vann Fjölbrautaskóla Suðurnesja, 16 – 12, og Menntaskólinn á Ísafirði vann Menntaskólann á Egilsstöðum, 29 – 13.

Kristinn Óli Haraldsson er nýr spyrill keppninnar og tekur við af Kristjönu Arnarsdóttur sem hefur verið spyrill í þáttunum frá árinu 2018. Dómarar og spurningahöfundar eru einnig nýir en þau eru Helga Margrét Höskuldsdóttir, Vilhjálmur B. Bragason og Sigurlaugur Ingólfsson. Fyrirrennarar þeirra voru Jóhann Alfreð Kristinsson og Laufey Haraldsdóttir sem höfðu setið við dómaraborðið síðustu þrjú ár.

25 skólar taka þátt að þessu sinni og því situr Menntaskólinn í Reykjavík, ríkjandi handhafi hljóðnemans, hjá í fyrstu umferð. Skólarnir átta sem komust í 8-liða úrslit keppninnar á síðasta ári geta ekki dregist saman í fyrstu umferð.

Fyrstu umferð lýkur á miðvikudag og sigurliðin komast áfram í aðra umferð sem verður 17. og 18. janúar. Sjónvarpsútsendingar hefjast 8. febrúar en þættirnir verða í beinni útsendingu á RÚV á fimmtudögum þennan veturinn. Hinir tveir framhaldsskólarnir á Vesturlandi; FSN í Grundarfirði og Menntaskóli Borgarfjarðar, eru ekki þátttakendur að þessu sinni.

FVA komst áfram í Gettu betur