Samantekt af því helsta sem gerðist í íþróttum á Vesturlandi árið 2023 og fjallað var um á íþróttasíðum Skessuhorns á árinu.

Siggi Tomm Íslandsmeistari

Síðustu helgina í janúar fór fram Íslandsmót öldunga í pílukasti í Pílusetrinu að Tangarhöfða í Reykjavík og voru alls 30 keppendur skráðir til leiks. Skagamaðurinn Sigurður Tómasson frá Pílufélagi Akraness var sigurvegari í karlaflokki og er því Íslandsmeistari í öldungaflokki í pílu árið 2023. Fram kom á vef Pílusambands Íslands að Siggi Tomm hafi átt stórkostlegt mót en hann sigraði í öllum fimm leikjum sínum í riðlakeppninni með aðeins einn tapaðan leik, 15:1 Spilamennska Sigga átti bara eftir að verða betri því hann tapaði ekki legg í 16 manna, 8 manna og í undanúrslitum. Í úrslitaleiknum fékk Siggi loksins mótspyrnu því eftir stórkostlegt oddaleikseinvígi við Guðjón Hauksson, stóð Siggi uppi sem sigurvegari 5-4 og þar með Íslandsmeistari öldunga 2023. Um miðjan nóvember stóðu Siggi og Gunnar H. Ólafsson svo uppi sem sigurvegarar í tvímenningi á Íslandsmóti félagsliða í pílu.

Kristín atkvæðamikil á árinu

Í lok janúar fóru fram Reykjavíkurleikarnir (RIG) í kraftlyftingum. Þar varð Borgfirðingurinn Kristín Þórhallsdóttir í efsta sæti. Hún lauk keppni með 565 kg í samanlögðu, 107 stigum og sigri hvort sem litið var til kvennaflokksins eins eða allra keppenda. Kristín keppti í maí á Íslandsmeistaramótinu í klassískri réttstöðulyftu en var að þessu sinni í +84 kg opnum flokki kvenna sem er þyngdarflokkur fyrir ofan þann flokk sem hún keppir vanalega í. Hún sigraði í þessum þyngdarflokki og tókst að setja Íslandsmet í öllum sínum þremur lyftum. Serían hennar var 221 kg, 230 kg og 240 kg, en 240 kg er þyngsta lyfta sem íslensk kona hefur lyft í réttstöðulyftu. Heimsmeistaramótið í klassískum lyftingum fór fram í St. Julians á Möltu um miðjan júní og hlaut Kristín silfurverðlaun á mótinu fyrir samanlagðan árangur í -84 kg flokki. Hún lyfti 210 kg í hnébeygju og hlaut brons í þeirri grein en einnig hreppti hún brons í bekkpressu þegar hún lyfti 125 kg og sló þá í leiðinni Íslandsmet. Í réttstöðulyftu lyfti hún 230 kg en á vef Kraftlyfingasambands Íslands segir að samanlagður árangur hennar hafi verið 565 kg sem skilaði henni silfrinu á sterkasta heimsmeistaramóti í klassískum kraftlyftingum frá upphafi. Kristín keppti síðan í desember á Evrópumeistaramótinu í klassískum kraftlyftingum sem fram fór í Tartu í Eistlandi og kom heim hlaðin af verðlaunapeningum. Kristín keppti í –84 kg flokki og byrjaði á því að lyfta 215 kg í hnébeygju og hlaut silfurverðlaun í þeirri grein. Í bekkpressu vann hún til bronsverðlauna með 117,5 kg lyftu og í réttstöðulyftu fór hún upp með 220 kg. Samanlagt lyfti hún 552,5 kg og hlaut bronsverðlaun fyrir samanlagðan árangur.

Fimm titlar til GFD

Guðbjört Lóa Þorgrímsdóttir sigraði tvöfalt á Bikarglímu Íslands sem fór fram laugardaginn 18. febrúar, en hún sigraði í +65 kg flokki og í opnum flokki kvenna. Þórarinn Páll Þórarinsson varð bikarmeistari 14 ára stráka og Mikael Hall Valdimarsson tók þar þriðja sætið. Benóní Meldal Kristjánsson varð bikarmeistari 15 ára stráka og Alexandra Agla Jónsdóttir landaði bikarmeistaratitli í flokki 13 ára stelpna. Aðalheiður Rós Unnsteinsdóttir, Embla Dís Björgvinsdóttir og Mirco Minicucci voru öll í 2. sæti í sínum flokkum.

Skallagrímur rétt missti af sæti

Í lok mars og í apríl lauk keppnistímabilinu hjá körfuknattleiksliðunum á Vesturlandi. Skallagrímur og Hamar mættust í einvígi um sæti í Subway deild karla þar sem hart var barist. Hamar hafði sigur að lokum í einvíginu, 3-2, og fór upp ásamt Álftanesi en Skallarnir sátu eftir með sárt ennið. Skagamenn enduðu í 7. til 8. sæti ásamt Ármanni með 22 stig sem var mikil bæting frá tímabilinu á undan. Kvennalið Snæfells tapaði í einvígi á móti Þór Akureyri um sæti í Subway deild kvenna en fékk síðan óvænt sæti í deildinni um haustið eftir að lið ÍR dró sig úr keppni. Karlalið Snæfells komst upp í fyrstu deild eftir sigur á Vestra og því ljóst að þrjú lið af Vesturlandi myndu spila í deildinni á næsta tímabili.

Guðjón Ingi sigurvegari í Bakgarðshlaupinu

Skagamaðurinn Guðjón Ingi Sigurðsson var sigurvegari í hlaupakeppninni Bakgarður 101 sem fram fór í Öskjuhlíð í Reykjavík í lok apríl. Bakgarður 101 er systurkeppni Bakgarðs Náttúruhlaupa sem fer fram í Heiðmörk í september ár hvert. 150 manns hófu keppni í hlaupinu þar til einn stóð eftir. Guðjón hljóp alls 207,7 km en hann hljóp 31 hring, var í 31 klukkustund að ljúka við þessa vegalengd og stóð að lokum uppi sem sigurvegari. Keppnin var með hefðbundnu sniði bakgarðshlaupa og fer eftir ákveðinni uppsetningu og reglum. Hlaupinn var rúmlega 6,7 km hringur á hverjum klukkutíma. Sá sem hleypur flesta hringi er sá eini sem klárar hlaupið og stendur uppi sem sigurvegari. Til að klára hlaupið verður viðkomandi að klára síðasta hringinn einn. Eftir hvern hring gátu keppendur notað tímann sem var eftir af klukkutímanum til að hvílast og undirbúa sig fyrir næsta hring. Guðjón var í harðri baráttu undir lokin við hlauparann Kristin Gunnar sem var að glíma við meiðsli í hné í síðustu hringjunum og Guðjón hafði síðan betur sem þýddi að hann hafði unnið bakgarðshlaupið 2023. Ótrúleg seigla í kappanum en alls hljóp hann á þessum tíma tæp fimm maraþon.

Vestlendingar hlutskarpir á garpamóti

Opna Íslandsmeistaramótið í garpasundi fór fram dagana 5. til 6. maí í Sundlaug Kópavogs. Vel á annað hundrað keppendur 25 ára og eldri skráðu sig til leiks frá ellefu félögum. Bæði Sundfélag Akraness og Sunddeild Skallagríms í Borgarnesi áttu fulltrúa á mótinu, og er óhætt að segja að Vestlendingarnir hafi náð glæsilegum árangri með samtals 28 gullverðlaun. Mikil sundhefð er í báðum þessum félögum og því virkilega gaman að sjá svona mikið líf í garpasundhópunum, bæði á Akranesi og í Borgarnesi.

Skallagrímur Íslandsmeistari í minnibolta

Fyrstu helgina í maí fór fram fjórða og síðasta umferðin í minnibolta tíu ára stúlkna á Íslandsmótinu í körfuknattleik og var leikið á Flúðum. Lið Skallagríms úr Borgarnesi gerði sér lítið fyrir og tryggði sér Íslandsmeistaratitilinn með sigri á Grindavík, 29:15, í úrslitaleik A-riðils. Glæsilega gert hjá þessum ungu og efnilegu stúlkum og ljóst að framtíðin er björt í kvennaboltanum í Borgarnesi.

Vann til gullverðlauna í keilu

Jóhanna Nína Karlsdóttir úr ÍA gerði sér lítið fyrir og vann til gullverðlauna í A-flokki kvenna á fyrstu Íslandsleikum Special Olympics í keilu en mótið fór fram í Egilshöll dagana 23. og 24. maí. Keppendur á mótinu voru 36. Þar af voru 33 úr Ösp, tveir úr ÍR auk Jóhönnu Nínu frá ÍA.

Sóttu verðlaun fyrir línuklifur

Skagaklifrarar gerðu góða ferð í höfuðborgina í byrjun júní þegar bikarmeistaramót í línuklifri fór fram í Miðgarði í Garðabæ. Skagafólkið sótti tvenn gullverðlaun og ein silfurverðlaun á mótið. Beníta Líf Palladóttir kom, sá og sigraði í B-flokki kvenna með flottri frammistöðu og tók verðskuldað gull en hún náði hæsta punkti keppenda í úrslitaleið mótsins. Sylvía Þórðardóttir sigraði í A-flokki kvenna eftir æsispennandi keppni og hafnaði einnig í öðru sæti í Opnum flokki kvenna (fullorðinsflokki) á eftir Veru Bakker, sem sigraði örugglega í flokknum.

Yngstur í sögunni til að spila og skora fyrir ÍA

Knattspyrnumaðurinn Daniel Ingi Jóhannesson varð yngsti leikmaður í sögu Knattspyrnufélags ÍA til að skora mark fyrir lið sitt. Hann er sömuleiðis yngsti leikmaður sögunnar til að spila fyrir félagið. Markið sem Daniel Ingi skoraði var gegn liði Ægis í Þorlákshöfn í júní og var sömuleiðis eina mark leiksins og því sérlega mikilvægt. Fram að þessu hafði Arnar Gunnlaugsson verið yngstur til að skora mark fyrir ÍA, en hann var mánuði eldri en Daniel Ingi þegar hann gerði það. Markið skoraði Arnar í leik á móti Keflavík í júnílok 1989, eða fyrir rétt tæpum 34 árum.

Guðrún Karitas setti meistaramótsmet

Meistaramót Íslands í frjálsum íþróttum fór fram í lok júlí á ÍR vellinum í Skógarseli í Breiðholti. Meistaramótið sem var það 97. í röðinni er hápunktur sumarsins og var allt besta frjálsíþróttafólk landsins skráð til leiks. Guðrún Karitas Hallgrímsdóttir sleggjukastari frá Vatnshömrum í Andakíl sem keppir fyrir ÍR setti meistaramótsmet þegar hún stórbætti metið í sleggjukasti kvenna er hún kastaði 65,21 metra en fyrra metið átti Íslandsmethafinn Elísabet Rut Rúnarsdóttir (ÍR), 62,30m frá síðasta ári. Þetta var rétt við besta árangur Guðrúnar en hún á best 65,42m. Í öðru sæti var fyrrum Íslandsmethafinn Vigdís Jónsdóttir (ÍR) sem kastaði lengst 60,81m. Í þriðja sæti var hin unga og efnilega Birna Jóna Sverrisdóttir (UÍA) með kasti upp á 47,31m.

Sæmilegt gengi knattspyrnuliða

Keppni í neðri deildum á Íslandsmótinu í knattspyrnu lauk um miðjan september. Víkingur Ólafsvík endaði í 5. sæti í 2. deild karla og Kári frá Akranesi í 5. sæti í 3. deild. Skallagrímur úr Borgarnesi varð í 8. sæti í 4. deild og Reynir Hellissandi lauk leik í 8. sæti í A-riðli 5. deildar.

Drífa vann tvöfalt á HM öldunga

Skagakonan Drífa Harðardóttir tók þátt um miðjan september í heimsmeistaramóti öldunga í badminton sem haldið var í Jeonjy í Kóreu. Mótið er haldið annað hvert ár en Drífa var tvöfaldur heimsmeistari frá síðasta móti í tvíliðaleik og tvenndarleik. Drífu var raðað númer eitt í styrkleika á mótinu í báðum greinum en hún tók þátt í tvíliðaleik með Gry Uhrenholt Hermansen í flokki +40 ára og í tvenndarleik með Jesper Thomsen í flokki +45 ára en þau eru bæði frá Danmörku. Það er skemmst frá því að segja að Drífa náði að verja báða sína titla en úrslitaleikirnir fóru fram á sunnudegi að morgni til á kóreskum tíma. Í úrslitum í tvenndarleik mættu þau Drífa og Jesper þeim Hosemari Fujimoto og Tomoko Hinoishi frá Japan og unnu í tveimur lotum, 21-18 og 21-11. Drífa og Gry báru síðan sigurorð af Tiina Kahler og Jessicu Willems frá Þýskalandi í tveimur lotum, 21-12 og 21-9. Drífa er því tvöfaldur heimsmeistari öldunga í badminton 2023 sem er glæsilegur árangur. Hún býr í Danmörku og hefur alla tíð spilað undir merkjum ÍA en æfir með liði Hvidovre í Danaveldi.

Mikill fögnuður á Akranesi

Skagamenn höfðu ríka ástæðu til að fagna um miðjan september þegar síðasta umferðin fór fram í Lengjudeild karla og 2. deild kvenna í knattspyrnu. Karla- og kvennalið ÍA voru í eldlínunni og fóru leikar þannig að bæði lið fóru upp um deild eftir stóra sigra í lokaleikjum sínum á móti Gróttu og Álftanesi. Karlaliðið leikur í Bestu deildinni á ný á næstu leiktíð og konurnar í Lengjudeildinni sem er næst efsta deild.

Áttu góðu gengi að fagna

Skagafólki í keilunni gekk vel á Íslandsmóti para sem fram fór um miðjan október. Íslandsmeistarar urðu Ísak Birkir Sævarsson ÍA og Katrín Fjóla Bragadóttir KFR og í öðru sæti urðu Steinunn Inga Guðmundsdóttir og Magnús Sigurjón Guðmundsson ÍA. Ísak og Katrín settu nokkur Íslandsmet. Í einum leik 526 stig og 1.410 í þremur leikjum. Auk þess að spila sinn annan 300-leik, sem er jöfnun á heimsmeti, sló Ísak 13 ára gamalt Íslandsmet í þremur leikjum er hann spilaði 827. Í byrjun nóvember tóku þeir Ísak Birkir og Magnús Sigurjón þátt á Íslandsmótinu í tvímenningi og komu heim með silfurpening um hálsinn.

Sundfólk ÍA gerði góða hluti á Íslandsmótinu

Tólf sundmenn frá ÍA tóku þátt á Íslands- og unglingameistaramótinu í sundi sem fór fram í Hafnarfirði í byrjun nóvember. Á mótinu voru 184 keppendur frá 15 félögum. Þrír Íslandsmeistaratitlar komu í hús hjá ÍA og átta unglingameistaratitlar. Samtals voru þetta ellefu gull, tólf silfur og ellefu brons yfir helgina. Einnig voru sett þrjú íslensk unglingamet, tíu Akranesmet, tvö náðu í A-landslið og ein í unglingalandslið. Einar Margeir Ágústsson varð Íslandsmeistari í 100 metra fjórsundi á nýju íslensku unglingameti og Sunna Arnfinnsdóttir varð Íslandsmeistari í 200 m flugsundi og 200 m baksundi. Einar Margeir tók síðan þátt á Evrópumeistaramóti fullorðinna í 25 metra laug sem fram fór í desember. Þess má geta að hann er fyrsti sundmaðurinn úr röðum ÍA sem tekur þátt á Evrópumeistaramóti fullorðinna síðan Ingi Þór Jónsson tók þátt árið 1981.

Alexander Örn kraftlyftingakarl ársins

Skagamaðurinn Alexander Örn Kárason var valinn Kraftlyftingakarl ársins af Kraftlyftingasambandi Íslands 20. desember síðastliðinn. Alexander Örn hlaut nafnbótina í fyrsta sinn en hann er 25 ára gamall og keppir fyrir Kraftlyftingadeild Breiðabliks. Alexander sem keppir í klassískum kraftlyftingum í –93 kg flokki vann til bronsverðlauna á Vestur–Evrópumótinu. Þá varð hann Íslandsmeistari á árinu, setti fjölmörg Íslandsmet og náði hæsta stigaárangri íslenskra karla frá upphafi í klassískum kraftlyftingum.

Íþróttaannáll ársins 2023