Kaupfélag Borgfirðinga orðið 120 ára

Í gær varð Kaupfélag Borgfirðinga 120 ára. Félagið var stofnað í Deildartungu 4. janúar 1904 að tilhlutan Framfarafélags Borgfirðinga, sem stofnað hafði verið árið áður. Félagið hefur allar götur frá stofnun gegnt þýðingarmiklu hlutverki í héraði og í byrjun 8. áratugarins var það ellefta stærsta fyrirtæki landsins. Tímamótanna minntist kaupfélagsfólk með að bjóða í kaffi og köku í verslunarhúsinu við Egilsholt 1 á sjálfan afmælisdaginn. Fjölmenni gerði sér ferð til að fagna tímamótanna og var þröng á þingi um tíma. Tilboð voru á ýmsu í versluninni í tilefni dagsins og fyrrum starfsmenn, þeir Jómundur Hjörleifsson á Heggstöðum og Vigfús Friðriksson, Fúsi Fljótsdælingur, komu og sáu um kökuskurð og spjall við gesti. Það var Sigrún Halla Gísladóttir formaður stjórnar KB sem setti samkomuna og bauð gesti velkomna.

Í dag rekur Kaupfélagið búrekstrardeild við Egilsholti 1 í Borgarnesi en á og rekur einnig þónokkrar fasteignir, bæði í eigu KB og dótturfélagsins Borgarlands. Þá hefur KB undanfarin ár tekið þátt í rekstri matvöruverslana á landsvísu sem einn af eigendum Samkaupa.

*Sigrún Halla Gísladóttir formaður stjórnar KB bauð gesti velkomna.*

*Mest starfsemi KB er í verslun félagsins við Egilsholt en auk þess er rekstur fasteigna og eignarhlutur í Samkaupum veigamiklir þættir í rekstrinum.*

*Jómundur skenkir Guðmundi Hallgrímssyni fyrstu sneiðinni af afmæliskökunni.*

*Stefán Broddi Guðjónsson sveitarstjóri færði kaupfélaginu blómvönd. Sigrún Halla tók við honum.*

*Jói og Fúsi í kökuskurðinum og komið að þeim Halldóri Bjarnasyni og Grétari Reynissyni að fá sneið.*

*Haukur Júl og Gunna Fjeldsted stinga saman nefjum.*

*Guðbrandur á Staðarhrauni, Eggert á Hofsstöðum og Sveinn á Vatnshömrum.*

*Guðmundur ráðsmaður og Jóhann á Steinum.*

*Þórhallur frá Grímarsstöðum og Torfi á Gilstreymi.*

Gréta Sigríður Einarsdóttir fréttamaður RÚV á Vesturlandi og Vestfjörðum fangaði stemninguna og sagði frá viðburðinum í tíu fréttum í gærkvöldi.

*Svipmynd yfir verslunina. Fremst á mynd eru fráfarandi og núverandi formenn stjórnar KB, þær Sigrún Halla og Guðrún á Glitstöðum.*

Fjölmenni fagnaði afmæli elsta fyrirtækis héraðsins – Myndasyrpa

Kaupfélag Borgfirðinga orðið 120 ára

Kaupfélag Borgfirðinga orðið 120 ára