Jól

Hefur þú einhvern tímann velt því fyrir þér hvað þetta litla orð er magnað. Ég loka augunum, hugsa um töfraorðið jól og ég sé fyrir mér ótal myndir, heyri tónlist, finn lykt og það hellast yfir tilfinningar af ýmsu tagi. Þegar jólin fara að nálgast, förum við að finna fyrir jólaandanum og það er eins og einhver sérstök eftirvænting og gleði liggi í loftinu. Við förum að undirbúa þessa gleðihátíð sem jólin eru svo sannarlega og eyðum oft löngum tíma í þann undirbúning til að allt verði eins og við viljum hafa það og við náum að fanga jólaandann. Jólandanum tekst alltaf að fá það besta út úr okkur öllum, við erum tilbúnari til að hjálpa hvert öðru, við hlæjum meira, göngum stundum raulandi um göturnar og heilsum fólki sem á vegi okkar verður með brosi á vör. Þegar við hugsum um jól er það gjarnan andi liðinna jóla sem kemur upp í hugann og þó að undirbúningur fyrir jólahátíðina hafi breyst gegnum árin er samt alltaf til staðar þessi kitlandi eftirvænting aðventunnar.

Á uppvaxtarárum mínum vestur á Tálknafirði fólst undirbúningur jólanna, sem var mest á herðum móður minnar, meðal annars í því að húsið var gert hreint hátt og lágt, jólafötin á okkur systkinin voru saumuð, jólagjafir annað hvort keyptar eða útbúnar heima og svo var það besta. Einn daginn barst úr eldhúsinu indæll ilmur af jólakökum og í eldhúsinu lágu bökunarplötur um öll borð með smákökum sem bráðnuðu í munni. Mamma stóð við bakarofninn og úr útvarpinu hljómaði söngurinn hans Hauks Morthens, Jólin jólin alls staðar og hjarta mitt fylltist af kyrrð, öryggi og gleði. Ég sé líka fyrir mér uppljómaða og skreytta stofuna þegar hún var opnuð rétt fyrir klukkan sex á aðfangadag eftir að hafa verið læst frá því á Þorláksmessu og hvað það var spennandi að horfa á alla pakkana sem lágu undir jólatrénu og tilhlökkunin yfir því að fá að opna þá varð öllum öðrum tilfinningum yfirsterkari. Þessar myndir eru óendanlega dýrmætar ásamt svo ótal mörgum öðrum frá fyrri tíð. Þegar ég hóf að skipuleggja og halda jól sjálf fyrir og með minni fjölskyldu voru það alls konar myndir, góðar og gleðilegar tilfinningar og upplifanir frá æskunni sem reynt var að endurskapa og haldið fast í allar hefðir hvað varðar undirbúning og sjálft jólahaldið og er svo að mörgu leyti enn. Nýrri minningar tengjast því að njóta samvista við fjölskylduna um jólin og þá sérstaklega barnabörnin og finna þeirra einlægu eftirvæntingu og gleði yfir jólahátíðinni.

Þó að hefðin skipti mig og marga fleiri miklu máli í jólahaldinu kalla ytri aðstæður oft á breytingar á þeim hefðum og upplifun okkar af aðventu og jólum. Nýir staðir kalla á breytingar. Það er ekki hægt að setja jólaskrautið á sömu gömlu staðina eða upplifa sams konar atburði með sama fólkinu. Jólin breytast líka þegar ástvinir hverfa á braut og við getum ekki lengur notið samvista við þá á jólunum og það er svo að söknuðurinn eftir þeim verður oftast erfiðastur á þessum árstíma. Jólahefðirnar breytast smátt og smátt og nýir siðir og myndir verða að ómissandi þáttum í því að skapa jólandann í hug og hjarta

Á aðventunni eru það ekki bara siðir og venjur sem tengjast jólahaldi heima fyrir sem skipta máli. Það tilheyrir einnig að sækja ýmsa viðburði í aðdraganda jóla. Nú á aðventunni hefur ýmislegt verið á dagskrá í Snæfellsbæ sem er ómissandi að sækja í mínum jólaundirbúningi og hjálpar til við að kveikja á eftirvæntingunni og jólaandanum. Hægt var að njóta jólatónlistar sem heimamenn og gestir færðu okkur á jólatónleikum, rithöfundar komu í heimsókn og lásu úr bókum sínum, í kirkjunni var aðventukvöld og aðventugleði var haldin þar sem fyrirtæki og félagasamtök tóku á móti íbúum sem nutu þess að rölta milli staða í skammdegismyrkrinu sem allir keppast við að lýsa upp með jólaljósum. Allir þessir viðburðir eru nú þegar komnir í minningabankann og munu veita gleði þegar hugsað verður til baka næstu jól.

Sem betur fer eiga flestir ánægjulegar minningar frá ótal liðnum jólum en þó ekki allir. Ef þú þekkir einhverja sem eiga ekki góðar minningar eða kvíða jólunum af einhverjum ástæðum gætir þú lagt þitt af mörkum, hvort sem er með því að veita andlega eða veraldlega aðstoð, til að skapa þeim jólaminningar sem veita gleði í framtíðinni þegar þessi jól eru liðin og lifa bara í minningunni. Mundu að það er andi þessara jóla sem verður andi liðinna jóla í framtíðinni og að það er núið sem verður að minningum og við viljum öll eiga ánægjulegar minningar til að ylja okkur við í framtíðinni. Höfum það í huga þannig að þegar við lokum augunum og hugsum um töfraorðið jól geti hjarta okkar fyllst af kyrrð og gleði.

Sendi öllum mínar bestu óskir um gleðiríka jólahátíð og að nýtt ár færi ykkur heill og hamingju með mörgum góðum og gefandi samverustundum með vinum og fjölskyldu.

Með bestu kveðjum úr Snæfellsbæ,

Katrín Aðalheiður Magnúsdóttir

Ólafsvík

Kveðjur úr héraði – Jólakveðja úr Snæfellsbæ

Jól

Jól