Jón Arnar Sverrisson og Arnar Símonarson giftu sig við hátíðlega athöfn í Dalvíkurkirkju í sumar á sjálfan þjóðhátíðardaginn, 17 júní. Brúðkaupsferðin var þó ekki farin í kjölfar sameiningar þeirra, þar sem báðir voru fastir í vinnu og verkefnum hvers konar. Í haust gafst svo tækifæri til að fagna þessum merka áfanga loksins og völdu þeir strákarnir heldur óvenjulega ferð, því þeir ákváðu að heimsækja eyjuna Madeira, sem liggur norðan við Kanaríeyjar. Þessi eyja er sérstök á margan hátt, loftslag þar er milt og þægilegt, hún er sérlega gróðursæl enda oft nefnd eyja hins eilífa vors eða blómaeyjan fljótandi. Áður en þeir héldu til Madeira dvöldu þeir í sól og sælu í nokkra daga á eyjunni Tenerife.

Blaðamaður Skessuhorns hitti þá Nonna og Adda í stuttu spjalli fyrir skemmstu og fékk aðeins að heyra af upplifun þeirra þá daga sem þeir dvöldu á eynni í brúðkaupsferð sinni, sem var samtals níu dagar.

Jón segir að dvöl þeirra á Tenerife hafi einungis verið hvíld fyrir hina einu sönnu brúðkaupsferð. „Við flugum beint til Madeira frá Tenerife og flugið var einungis um klukkustund að lengd. Það var stórkostlegt að koma til Madeira, eyjan er talvert brött, byggðin slitrótt og meira að segja er flugvöllurinn byggður á stöplum út í sjó.“ Arnar tekur við: „Við fengum dásamlegar móttökur strax frá komu og frá fólkinu almennt, eyjaskeggjarnir sýndu háttvísi, kurteisi og alúð í öllum samskiptum. Við mættum ekki öðru en ljúfmennsku og það var allt gert fyrir okkur til að ferðin væri okkur sem ljúfust og eftirminnileg.”

Að sjálfsögðu keyptu þeir sér dæmigerðar húfur frá eyjunni.

Eyjan kom mikið á óvart
Jón kemur inn á það að eyjan sé eldfjallaeyja en óvirk og er nokkur brött með háum fjöllum, skörðum, giljum og skorningum. „Það var sérstakt að koma inn að eyjunni með flugi því flugbrautin er byggð á stöplum út í sjó. Við vorum búnir að búa okkur undir þessar aðstæður en svo sannarlega kom svo eyjan mikið á óvart. Flugvöllurinn á Madeira heitir eftir hinum fræga fótboltamanni Christiano Ronaldo, en hann er fæddur þar og uppalinn. Við dvöldum þessar níu nætur á fallegu og mjög svo sérstöku hóteli sem ber nafnið Sentido Galomar. Ég hafði gengið frá pöntun á hótelið sem ég fann á netinu en það er staðsett niður við strönd í litlum bæ sem heitir Canico. Hótelið er frekar nýlegt en byggt upp á gömlum grunni þar sem hafði verið frægt hótel áður fyrr sem ríka og fræga fólkið frá Portúgal heimsótti. Hótelið státar því að vera „grænt“ hótel og er eitt af fjórum bestu í allri Portúgal hvað það varðar. Við völdum þetta hótel sérstaklega vegna þessa.“

Arnar segir að hótelið hafi komið skemmtilega á óvart, áhersla var lögð á kyrrð og rólegheit. „Þarna voru mest pör og áhersla lögð á heilsueflandi þætti og jákvæðan lífsstíl. Hægt var að fara í nudd, sána, synda í sjóblandaðri sundlaug, kafa, og fara út á kajak og sitthvað fleira. Hótelið var byggt utan í kletti alveg fremst á brúninni með Atlantshafið fyrir framan, með allt sitt sjónarspil, hvítfryssandi öldur, steina og sandfjörur, útsýnið var óviðjafnanlegt.“ Jón segir að þeir hafi fengið dásamlegt veður þennan tíma. „Stundum rigndi smá en það var oftast stutt og sólin skein í heiði á ný, við fórum í langar og góðar gönguferðir um nágrennið, skoðuðum gróður, byggingar og horfðum á fjölbreytt mannlífið. Fyrir mig var þetta sérstök upplifun þar sem ég er garðyrkjufræðingur og þarna komst ég í tæri við gróður með einstökum hætti.“

Ekki margir ferðamenn
Arnar nefnir einnig að á eyjunni sé enginn massatúrismi, og þeir urðu ekki varir við marga ferðamenn en þeir fóru meðal annars og heimsóttu Nunnudalinn Curral das Freiras, eftir að hafa fengið ábendingar um að skoða hann. „Það var frábær upplifun, þrátt fyrir að við færum í ellefu hundruð metra hæð, þar sem voru afar djúp gljúfur og gilskorningar og há fjöll á alla kanta en það var algjörlega þess virði. Í Nunnudalnum var undirbúningur fyrir kastaníuhátíð á fullu en það er árleg hátíð á hverju hausti. Ég hefði alls ekki viljað missa af þessu. Við heimsóttum líka höfuðstaðinn Funchal, borgin er ekki mjög stór og í henni búa einungis um hundrað þúsund manns. Borgin er byggð frá sjó og upp í hlíð til tveggja átta. Við vorum yfir okkur hrifnir af borginni og fegurð hennar.“ Einn daginn tóku þeir kláf frá höfninni upp í 600 metra hæð yfir borgina til að heimsækja frægan garð, Monte Palace Tropical Garden, sem áður tilheyrði kastala. „Þetta er algjör lystigarður með fullt af listaverkum og fallegri hönnun, en auk þess geymir garðurinn plöntur frá öllum heimshornum.”

Jón segir að lokum að þeir hafi ætlað að taka bílaleigubíl og keyra um eyjuna en voru svo ekki alveg að treysta sér í það. „Eyjan er svo svakalega brött og maður er ekki alveg með aðstæður á hreinu. Þess í stað lærðum við bara á strætókerfið sem var mjög auðvelt og hægt að komast um alla eyjuna á þægilegan hátt.“ Jón Arnar og Arnar segjast báðir ætla aftur til Madeira og skoða hana betur, þeim fannst eyjan dásamlegur staður, falleg og gott að sækja heim.

Skessuhorn fékk góðfúslega leyfi til að kíkja í myndaalbúmið frá ferðinni til Madeira og sjón er sögu ríkari.

vaks/ Ljósm. úr einkasafni

Hótelið Sentido Galomar er byggt utan í snarbratta kletta og einungis framhlið er á því. Það er á sex hæðum.

Risastytta af Cristo Rei, Jesús Kristi, upp á hæð og þangað lá stígur með snarbrattar hlíðar beggja vegna. „Ég lét mig hafa það að ganga þetta á meðan aðrir horfðu úr fjarlægð,“ segir Jón Arnar.

„Fundum mjög svo gamalt hús upp í Nunnudalnum sem þarfnast umhyggju. Vorum alveg til í að kaupa það og gera upp en verst hvað það er bratt og erfitt að komast þangað.“

Fyrir utan kastalann í hitabeltisgarðinum ofan við borgina. Arnar sæmir sér vel á tröppunum.

Í Nunnudalnum Curral das Freiras, var verið að undirbúa hina árlegu kastaníuhátið. Allt skreytt hátt og lágt.

Eyjan er mjög græn og falleg með fjölbreyttum gróðri og fallegum görðum, þetta er úr einum þeirra í miðri Funchal borg.

Ansi notalegt og fallegt útsýni síðla kvölds.

Flugvöllurinn á Madeira heitir eftir fótboltastjörnunni Christiano Ronaldo en hann er fæddur á eyjunni. Í anddyrinu er meira að segja brjóststytta af honum.

Brúðkaupsferð Adda og Nonna til Madeira