Út er komin skýrsla um fýsileika sameiningar háskólanna á Akureyri og Bifröst

Út er komin skýrsla um fýsileika sameiningar Háskólans á Akureyri og Háskólans á Bifröst. Hún var unnin í framhaldi af viljayfirlýsingu háskóla-, iðnaðar- og nýsköpunarráðherra og háskólanna tveggja frá því í september. Við sameiningu skólanna yrði til nýr skóli með höfuðstöðvar á Akureyri, starfsstöð í Borgarnesi og starfsstöð í Reykjavík. Samkvæmt því leggst allt skólastarf af á Bifröst, en þar hefur skóli verið starfræktur allar götur frá 1955.

Í skýrslunni er kynnt möguleg sviðsmynd fyrir skipulag nýs háskóla á grunni skólanna tveggja. „Talið er að með því að sameina krafta, styrkleika og sérfræðiþekkingu háskólanna yrði til nýr og samkeppnishæfari skóli jafnt hérlendis sem og á alþjóðavettvangi, sem myndi styrkja til muna háskólamenntun á Íslandi. Þá myndi sameinaður skóli jafnframt styrkja samkeppnisstöðu Íslands í síbreytilegum heimi. Kröftugur, sameinaður háskóli með höfuðstöðvar á Akureyri og miðstöðvar eða samstarf um allt land myndi styrkja landsbyggðina í heild og fjölga tækifærum til náms utan höfuðborgarsvæðisins, ekki síst í gegnum aukna möguleika á fjölbreyttu fjarnámi,“ segir í tilkynningu frá ráðuneytinu.

,,Það er ekki annað hægt en að vera bjartsýn þegar blásið er til sóknar eins og gert er í skýrslu um mögulega sameiningu Háskólans á Akureyri og Háskólans á Bifröst. Ef allt gengur að óskum munum við sjá næst stærsta háskóla landsins verða til sem settur er saman af skólum sem hafa verið leiðandi í fjarnámi og sterkir á landsbyggðinni,” segir Áslaug Arna Sigurbjörnsdóttir, háskóla-, iðnaðar- og nýsköpunarráðherra.

3.500 nemendur

Sameinaður háskóli yrði svipaður að stærð og Háskólinn í Reykjavík m.t.t. nemendafjölda, eða um 3.500 nemendur. „Nýr háskóli gæti orðið til þess að styrkja frekar samstarf sem þessir skólar hafa við háskólasetur og miðstöðvar í öllum landsfjórðungum. Með sameiningu væri blásið til sóknar á landsbyggðinni með auknum gæðum, aukinni þjónustu og auknum rannsóknum,“ segir Áslaug Arna.

Ákvörðun fyrir febrúarlok

Stýrihópur sem vann skýrsluna var skipaður þremur fulltrúum úr hvorum skóla undir leiðsögn Aðalsteins Leifssonar, fyrrverandi ríkissáttasemjara. Fram kemur í tilkynningu að hópurinn átti virk samtöl við starfsfólk, nemendur og aðra velunnara háskólanna við gerð hennar. „Fram undan er umræða um skýrsluna í háskólaráðum beggja háskóla og áframhaldandi samtal við starfsfólk, nemendur, sveitarstjórnir, ráðuneyti háskólamála og aðra hagsmunaaðila áður en ákvarðanir verða teknar um möguleg næstu skref í átt til sameiningar.“ Loks segir: „Stýrihópurinn telur farsælast að tillaga um sameininguna komi fram fyrir lok febrúar 2024, þannig að það liggi fyrir hvert framtíðarskipulag Háskólans á Akureyri og Háskólans á Bifröst verður áður en nemendur sækja um skólavist á haustönn 2024 en gert er ráð fyrir að opnað verði fyrir umsóknir 1. mars 2024.“

Hér má sjá skýrsluna um mat á fýsileika sameiningar Háskólans á Akureyri og Háskólans á Bifröst

Sameining skólanna talin styrkja háskólamenntun í landinu

Út er komin skýrsla um fýsileika sameiningar háskólanna á Akureyri og Bifröst

Út er komin skýrsla um fýsileika sameiningar háskólanna á Akureyri og Bifröst