Þeir voru vel sóttir jólatónleikarnir „Er líða fer að jólum“ sem haldnir voru í Dalabúð í Búðardal laugardaginn 9. desember. Þetta er í annað sinn sem tónleikarnir eru haldnir en að baki þeim stendur fjölskyldan á Skerðingsstöðum í Hvammssveit ásamt góðum vinum. „Viðtökurnar í fyrra þegar við héldum þessa tónleika í fyrsta skipti voru framar björtustu vonum en þá komu um 230 manns. Í ár bættist síðan heilmikill fjöldi við en það voru tæplega 290 manns í sæti. Rúmlega uppselt eins og sagt er því við þurftum að fara á milli félagsheimila hérna til að ná í fleiri stóla og það var lítið sem ekkert pláss eftir í salnum,“ segir Alexandra Rut Jónsdóttir frá Skerðingsstöðum sem stóð að tónleikunum í samtali við Skessuhorn.

Tónleikagestum leyndist ekki metnaðurinn þegar komið var í salinn en sviðsmyndin minnti helst á að gestirnir væru komnir inn í stofu í heimahúsi, við notalegan arineld og jólaljós. Tónleikarnir þóttu síðan góðir og eflaust hefur Dalamönnum þótt gott að njóta tónlistar beint úr héraði á aðventunni en helgina áður hafði kórinn Hljómbrot einnig haldið aðventuhátíð þar sem flutt voru jólalög, þar á meðal nýtt jólalag tileinkað Dölunum. Lagaval var fjölbreytt allt frá rónasöngnum „Sögu úr Reykjavík“ upp í hin hátíðlegustu jólalög.

Alexandra segir að í grunninn hafi verið um sama hóp að ræða sem stóð að tónleikunum og í fyrra. „Við vorum þarna að syngja systkinin; ég, Ragnheiður Hulda, Sigurdís Katla og Ólafur Oddur ásamt foreldrum okkar Jóni Agli og Bjargey. Síðan söng líka Unnur Sigurðardóttir, systir mömmu frá Stóra-Kálfalæk á Mýrum og Ólöf Bogadóttir, dóttir hennar. Í hljómsveitinni voru síðan líkt og í fyrra bræðurnir Kristján Ingi og Steinþór Logi frá Stórholti í Saurbæ og bræðurnir Ingvar Kristján og Guðmundur Sveinn frá Þorbergsstöðum í Laxárdal. Síðan kom til liðs við okkur til viðbótar Hörður Hjartarson frá Vífilsdal í Hörðudal.

Aðspurð hvort tónleikarnir séu orðnir að árlegri hefð segir Alexandra: „Þrátt fyrir að á bakvið svona tónleika liggi mikil vinna og þetta sé síður en svo hrist fram úr erminni þá eru viðtökurnar slíkar að okkar ánægja drífur okkur áfram. Það er því stefnt að því að halda þá aftur að ári. Sá stuðningur og styrkir sem við hljótum til verkefnisins hjálpa okkur einnig mikið,“ en tónleikarnir voru styrktir af Menningarmálaverkefnasjóði Dalabyggðar, Uppbyggingarsjóði Vesturlands, Frumkvæðissjóði DalaAuðs og MS – Búðardal. „Okkur hlakkar til að bjóða íbúum hér upp á nýja og skemmtilega tónleika á næstu aðventu og vonandi sjáum við sem flesta aftur þá,“ segir Alexandra að lokum.

Jólatónleikar heimamanna vel sóttir