Meistaraflokkur kvenna í blaki hjá Ungmennafélagi Grundarfjarðar eru í 1. sæti í fjórðu deild Blaksambands Íslands. Þær drógust gegn 2. deildar liði Aftureldingar í Kjörísbikar kvenna og voru svo heppnar að fá heimaleik. Sá leikur var spilaður í íþróttahúsi Grundarfjarðar á miðvikudaginn.

Bæði lið mættu vel stemmd til leiks en heimakonur þó ívið stemmdari því að þær voru komnar í 6-0 í fyrstu hrinu áður en gestirnir náðu fyrsta stiginu. Mikil stemning var á áhorfendapöllum enda þó nokkur tími liðinn frá því að UMFG gat boðið upp á heimaleik í íþróttahúsinu.

Fyrsta hrinan endaði 25-16 heimakonum í vil en þær héldu forystunni alla hrinuna. Í annarri hrinu mættu gestirnir mun einbeittari til leiks og endaði hún 17-25 Aftureldingu í vil og leikar því jafnir 1-1. Í þriðju hrinu tóku gestirnir öll völd eftir jafna byrjun og enduðu á að sigra 13-25 og komust því í 2-1 forystu í leiknum. Stelpurnar í UMFG voru því komnar með bakið upp við vegg fyrir fjórðu hrinu og urðu hreinlega að vinna hana til að ná fram oddahrinu. Þær byrjuðu af miklum krafti og komust í 6-0 áður en gestirnir náðu svo að minnka muninn í 6-5. Hrinan var nokkuð jöfn eftir þetta en UMFG náði að knýja fram oddahrinu með 25-18 sigri og jafna þar með metin í 2-2.

Því miður fyrir baráttuglaðar heimastelpur mættu Aftureldingarkonur grimmar til leiks í oddahrinunni og sigldu sigrinum heim með 15 stigum á móti 8 stigum heimastelpna og sigruðu þar með leikinn 3-2 og tryggðu sig áfram í næstu umferð Kjörísbikarsins.

Stelpurnar í UMFG geta þó gengið stoltar frá þessum leik því þær sýndu góða baráttu og góð tilþrif í þessum æsispennandi leik.

UMFG úr leik í bikarnum