Laust fyrir klukkan 15 í dag varð alvarlegt bílslys á Vesturlandsvegi í Melasveit, ekki fjarri Skipanesi. Vegurinn hefur verið lokaður síðan og löng bílaröð hefur myndast beggja vegna slysstaðarins. Samkvæmt frétt Vísis voru þrír slasaðir og var þyrla Landhelgisgæslunnar send á svæðið. Auk þess eru fjölmargir viðbragðsaðilar frá Borgarnesi og Akranesi á vettvangi.

UPPFÆRT Kl. 16:08:

Haft er eftir Ásmundi Kr Ásmundssyni yfirlögregluþjóni á fréttavef RÚV að þrír hafi verið í tveimur bílum sem rákust saman á þjóðveginum. Þyrla Landhelgisgæslunnar flaug með tvo hinna slösuðu á Landspítalann í Fossvogi en einn var fluttur með sjúkrabíl á Sjúkrahúsið á Akranesi. Margra kílómetra röð bíla er ennþá beggja vegna slysstaðarins. Hægt er að aka hjáleið um Svínadal og yfir Dragháls, en reikna má með að vegurinn verði lokaður eitthvað frameftir degi.