Rætt við Fríðu Birnu Þráinsdóttur eigandi reksturs Esjuskálans í Baulunni

Fríða Birna Þráinsdóttir hefur rekið Esjuskálann á Kjalarnesi frá árinu 2019 ásamt fjölskyldu sinni, en þau tóku fyrir einu og hálfu ári síðan við rekstri vegasjoppunnar Baulunnar sem er við þjóðveg 1 í Borgarfirði. Húsnæðið er í eigu Orkunnar en Esjuskálinn gerði samning um veitingarekstur í húsnæðinu til tveggja ára. Blaðamaður settist niður með Fríðu í liðinni viku og fékk að forvitnast um gengi rekstursins hingað til.

Fyrsta verk að bæta ímynd
Hvernig hefur reksturinn gengið frá því þið tókuð við? ,,Þegar við komum hingað hafði lítið verið hér um að vera og reksturinn ekki mjög góður. Þetta er eitthvað sem ég einsetti mér að bæta og ég held það hafi tekist vel. Fólk er í dag almennt mjög ánægt en það hefur mikil vinna farið í að efla starfsemina og ná upp kúnnahópi. Við þurftum að byrja á því að þrífa húsnæðið vel, skipuleggja hvað þyrfti að bæta, auka vöruúrval og leggja metnað í að vera með góðan mat. Við fengum fyrirtæki í reikningsviðskipti, t.d. erum við með mikið af félagasamtökum sem eiga bústaði hér í kring sem kaupa hér gas en hér er bæði hægt að versla smellugas og skrúfugas. Svo eru vörubílstjórar orðnir duglegir að koma við því hér er góður matur og gott viðmót. Þetta vindur upp á sig þegar gott orðspor fer að spyrjast út,“ segir Fríða brosmild.

Allir velkomnir
,,Leiðsögufólk í túristarútum er einnig farið að stoppa hér út af góðu viðmóti og þægilegu umhverfi en svo er líka auðveldara að halda utan um hópa í minna umhverfi. Eins hafa íþróttahópar verið að koma hingað og borða en hér er þrjátíu manna salur og enn fleiri sem komast fyrir þegar útisvæðið er opið á sumrin. Hingað eru allir velkomnir en hér eru t.d. ekki lengur hlið fyrir klósettum eins og var, Baulan er fyrir alla. Við höfum verið að reyna að stíla enn meira inn á hópa upp á síðkastið og erum núna að fara af stað með það að smyrja nesti fyrir hópa sem eru á ferðalögum,“ segir Fríða.

Pakkaumferð
Þú hefur bætt við alls kyns þjónustu hingað sem væntanlega dregur að fleiri viðskiptavini? ,,Já, hér er lítið apótek, við erum með Sodastream hylki og ekki langt síðan að Dropp þjónusta bættist við. Það virkar þannig að pakkarnir koma í Esjuskálann á Kjalarnes og á hverjum morgni tek ég þá með hingað. Á Kjalarnesi er ég með Dropp, Póstinn, DHL og Eimskip svo okkur fannst við þurfa að bæta þessa þjónustu hér en það er aldrei að vita nema hér eigi eftir að bætast við fleiri slíkir þjónustuaðilar. Vegna þessa kemur núna hingað fólk sem hefur kannski ekki komið hingað inn lengi, þá sér viðkomandi vöruúrval og hvaða breytingar hafa átt sér stað, þess vegna er aldrei að vita nema viðkomandi eigi eftir að koma við seinna.

Við erum dugleg að hlusta á hvað viðskiptavinurinn vill og reynum að koma til móts við það sem þörf er fyrir hverju sinni. Matseðillinn er t.d. í stöðugri þróun en ég er nýbúin að bæta við hann núna,“ segir Fríða.

Skyldustopp í Esjuskálanum/Baulu
Hvernig hefur verið að fá starfsfólk hingað í vinnu? ,,Það hefur kannski verið erfiðasti þátturinn. Ég hef samt verið mjög heppin og fengið fólk sem er í skóla á Hvanneyri ásamt því að deila starfsfólki aðeins með hótelinu á Varmalandi, sem er rosalega notalegt. Ég hef líka verið með fólk héðan úr sveitinni og einhverja sem hafa búið á Kjalarnesi eða á Akranesi sem fá þá far með mér til og frá vinnu.“

Hvernig er að keyra svona mikið á milli? ,,Ég er Húnvetningur en hef búið á Kjalarnesi í 28 ár og alltaf unnið í Reykjavík. Mér finnst miklu betra að keyra í Borgarfjörðinn en í áttina að umferðinni í bænum. Þetta eru 60 km og auðvitað misjafnt eftir umferð og veðri hvernig aksturinn gengur en heilt yfir er þetta minnsta mál,“ segir Fríða og bætir við að það sé gott að taka stefnuna í áttina að Húnavatnssýslunum í morgunsárið. ,,Ég flutti að heiman 19 ára en pabbi býr enn á Laugarbakka og ég fæ alla Húnvetninga til mín. Ég segi við alla að hér sé skyldustopp, sumir fá samviskubit og koma við með afsakanir fyrir því að hafa ekki stoppað á leiðinni fyrr um daginn. Ég hef þess vegna aðeins minnkað notkunina á orðinu skyldustoppi svo ég sé nú ekki að búa til samviskubit hjá fólki,“ segir Fríða og hlær.

Voru þrisvar sinnum beðin fyrir reksturinn
Hvernig æxlaðist það að þið ákváðuð að taka við rekstrinum í Baulu? ,,Ég hafði keyrt mikið hér í gegn en aldrei kynnst samfélaginu svo ég vissi ekki mikið út í hvað við værum að fara. Það var aðeins gengið á eftir okkur en við sögðum já í þriðja skiptið sem við vorum beðin um að taka hér við.

Þeir sem hafa starfað hér vita hvernig aðstæður voru en hér var mjór hringstigi niður í kjallara sem þurfti að fara til að sækja vörur. Margir hafa sagt að þeir séu ónýtir í skrokknum eftir að hafa unnið hér, svo þegar við vorum beðin um að taka við rekstrinum fórum við fram á það að fá hingað vörulyftu til að koma vörunum úr kjallaranum og í búðina. Við fengum það í gegn í þriðja skiptið sem við vorum beðin um að taka við og það er þvílíkur munur,“ segir Fríða.

Sólin skín alltaf í Baulu
Hvernig hefur reksturinn gengið? ,,Það er mikill munur á rekstrinum um sumar og um vetur en við þurfum að finna leiðir til að auka tekjurnar á veturna. Ég sé fyrir mér að halda einhverja samkomu eða skemmtikvöld til að koma til móts við það. Við höfum haldið sumarhátíð síðustu tvö sumur sem hefur gengið mjög vel svo ég sé ekkert því til fyrirstöðu að geta gert eitthvað svipað á veturna, t.d. pöb quiz eða bingó.

Fyrir utan það að veturinn truflar mig aðeins, þá er þetta stór húseining og dýr rekstrareining. Sorphirðugjöld og rafmagn er dýrara hér. Á Kjalarnesi er húsnæðið minna og hægt að vera einn á vakt, hér þarf ég að hafa lágmark tvo eða þrjá starfsmenn í húsi og þess vegna ömurlegt ef lítið er að gera.

Hleðslustöðvarnar og útisvæðið er eitthvað sem fólk sækir í. Á sumrin bíður fólk oft eftir sætum svo þá myndi mig ekki veita af því að stækka veitingasalinn. Sumarið og haustið í ár voru betri en á síðasta ári svo ég bind vonir við að veturinn verði betri í ár líka. Í fyrra datt reksturinn strax niður eftir að réttir kláruðust en núna hélt traffíkin áfram fram í nóvember. Veðrið hefur náttúrulega áhrif, fólk er meira á ferðinni ef veðrið er gott en í Borgarfirði er alltaf gott veður og sólin skín alltaf hér í Baulu.

Margir úr sveitinni hafa komið til að spyrja mig hvort við verðum ekki áfram, en ég svara því að þetta sé allt í vinnslu. Ég vil endilega taka það fram að það er rosalega gott að vinna með Orkunni. Þeir eru mjög samvinnuþýðir og þægilegir í viðmóti,“ segir Fríða.

Hefur hauk í horni
Hvernig upplifir þú að koma inn í þetta samfélag í Borgarfirðinum? ,,Borgfirðingar hafa tekið okkur rosalega vel. Í byrjun var fólk smá skeptískt því reksturinn hafði gengið illa undanfarin ár. Núna segir fólk að ef Fríða og fjölskylda ná ekki að halda þessu gangandi getur það enginn. Við höfum unnið mikið í því að byggja upp traust til Borgfirðinga t.d. með góðgerðarstarfi. Sem dæmi má nefna að allar dósir sem koma hingað í hús fara beint til Björgunarsveitarinnar Heiðars. Við styrkjum björgunarsveitina því verulega og á móti hef ég hauk í horni því ef eitthvað kemur upp á, þá hringi ég eitt símtal og ég er ekki einu sinni spurð að því hvað mig vantar, alltaf kemur einhver um hæl og aðstoðar. Ég dýrka fólkið hér í kring en allir reynast mér vel og ég finn fyrir væntumþykju. Fólk er líka duglegt að hrósa okkur, sem gerir mikið fyrir reksturinn.“

Þakklát samfélaginu
Eitthvað að lokum? ,,Ég er þakklát fyrir móttökurnar og hvað fólk er almennt jákvætt út í starfsemina. Það er mikið verkefni að reka þetta og ef ég held áfram sé ég fyrir mér að geta hlúð enn betur að því sem ég er nú þegar með. Þegar maður tekur við gömlu er ýmislegt komið á tíma en ég hef verið rosaleg heppin að hér í sveitinni eru píparar og rafvirkjar sem allir eru tilbúnir að vinna fyrir mig með litlum fyrirvara. Þegar maður er í rekstri og eitthvað kemur upp á þarf maður að koma hlutum í lag ekki seinna en núna og ég mæti alltaf velvild sem er yndislegt. Mér líður vel hérna og hér er gott fólk,“ segir Fríða hlýlega að lokum.

sþ

Vegur og metur kosti og galla áframhaldandi reksturs í Baulu

Rætt við Fríðu Birnu Þráinsdóttur eigandi reksturs Esjuskálans í Baulunni

Rætt við Fríðu Birnu Þráinsdóttur eigandi reksturs Esjuskálans í Baulunni