Tíunda umferð 1. deildar karla í körfuknattleik fór fram í gærkvöldi þar sem Vesturlandsliðin þrjú þurftu að sætta sig við tap og eru leikmenn liðanna nú komnir í jólafrí.

Skagamenn tóku á móti KR á Jaðarsbökkum og úr varð fjörugur og skemmtilegur leikur. ÍA var tíu stigum yfir eftir fyrsta leikhluta, 23:13, en KR-ingar komu til baka í öðrum leikhluta og náðu að minnka muninn í tvö stig fyrir hálfleik, staðan 39:37 ÍA í vil.

Heimamenn voru sterkari í þriðja leikhluta og voru komnir með ellefu stiga forskot, 67:56, fyrir fjórða og síðasta fjórðung. En í honum sýndu Vesturbæingar mátt sinn og megin og hreinlega röðuðu niður körfum á meðan Skagamenn voru alls ekki að hitta vel. Lokatölur 77:84 fyrir KR í leik sem bauð upp á mikla skemmtun fyrir þá fjölmörgu áhorfendur sem mættu á leikinn og fyrir hina sem horfðu á leikinn á ÍATV.

Í Stykkishólmi tók Snæfell á móti Þrótti úr Vogum og var mikil spenna nánast allan leikinn. Heimamenn í Snæfelli voru einu stigi eftir fyrsta leikhluta, 26:25, en gestirnir úr Vogunum voru sterkari í öðrum leikhluta og leiddu með sex stigum í hálfleik, 51:57.

Þróttur jók við forystuna í þriðja leikhluta og var kominn með ellefu stiga forskot fyrir síðasta fjórðunginn, staðan 74:85 og Snæfell í alls ekki góðum málum. En þeir neituðu að gefast upp, söxuðu hægt og rólega niður forskot gestanna en það dugði því miður ekki til. Þróttur hafði sigur að lokum og treysti stöðu sína í efri hlutanum, lokatölur 101:104 fyrir Þrótti.

Það var ansi sveiflukenndur leikur hjá Ármanni og Skallagrími sem fram fór í Laugardalshöllinni. Ármann hafði mikla yfirburði í fyrsta fjórðung og staðan hálf ótrúleg, 27:8 fyrir heimamönnum. Skallarnir sneru dæminu aðeins við í öðrum leikhluta og höfðu náð að minnka muninn niður í átta stig, staðan 40:32 Ármanni í hag í hálfleik.

Ármenningar voru betri í þriðja leikhluta og voru komnir með ansi örugga forystu fyrir lokahlutann, staðan 62:47 og Skallagrímsmenn allls ekki líklegir. Það var og því Ármann vann öruggan sigur á gestunum, lokatölur 74:61 fyrir Ármanni.

Staðan í deildinni er þannig að ÍR er í efsta sætinu með 18 stig, Fjölnir, Sindri og KR koma næst með 16 stig, Þróttur Vogum er í fimmta sæti með 14 stig og Skallagrímur er í því sjötta með 10 stig. ÍA er í sjöunda sæti með 8 stig, Þór Akureyri er síðan með 6 stig og fjögur neðstu liðin sem eru öll með fjögur stig eru Selfoss, Hrunamenn, Ármann og Snæfell.

Næsta umferð verður föstudaginn 5. janúar þar sem Skallagrímur mætir Þór Akureyri, Sindri og Snæfell eigast við fyrir austan og Selfoss og ÍA syðra. Allir leikirnir hefjast klukkan 19.15.

Ekki gott kvöld hjá Vesturlandsliðunum í körfunni