Í hádeginu í gær mætti Gunnar Þór Garðarsson framkvæmdastjóri málmendurvinnslufyrirtækisins Furu á skrifstofu Borgarbyggðar. Tilefnið var að færa góðgerðarsamtökunum Samhugur í Borgarbyggð gjöf sem nemur eitt þúsund krónum af hverju tonni af brotajárni sem fyrirtækið safnaði í sveitarfélaginu í haust. Alls var að sögn Gunnars safnað rétt tæplega 200 tonnum af málmum og sorpi til endurvinnslu frá 37 lögbýlum í sveitarfélaginu. Farið var á þá bæi sem þess óskuðu með krana og trailer flutningabíl og tekin stærri og minni tæki og annar málmur til endurvinnslu. Allt var flutt í flokkunarstöð fyrirtækisins í Hafnarfirði og í framhaldinu flutt út til endurvinnslu.