medium

large

thumbnail

1536x1536

small

custom-size

Skógarstrandarvegur ekinn í sumarblíðunni

Klassart með tónleika í Hallgrímskirkju á sunnudaginn

Skátafélagið Örninn fór á landsmót

2048x2048

Vítaverður framúrakstur

Allt frá saumnálum til hjólastóla til í Dísubúð

Tveir árekstrar í vikunni

core/paragraph

Miðbæjarsamtökin Akratorg og Akraneskaupstaður ætla að blása í hátíðarlúðra næstu tvær helgar á Akratorgi og vera með jólamarkað fyrir íbúa Akraness og nágrennis. Opið verður á milli klukkan 13-18 bæði laugardag og sunnudag. Í tilkynningu vegna viðburðarins segir: „Hvar er betra að láta jólaandann hellast yfir sig en í heimabyggð? Hvernig hljómar rölt niður í miðbæ, heitt súkkulaði og vöfflur, glögg og ilmurinn af ristuðum möndlum á meðan þú og þín versla fallegar jólagjafir?“

Tinna Steindórsdóttir frá Miðbæjarsamtökunum er ein af skipuleggjendum jólamarkaðarins sem haldinn verður í gamla Landsbankahúsinu og blaðamaður heyrði í henni hljóðið um þennan viðburð. Tinna segir að það hafi verið mjög mikill áhugi á Akranesi undanfarin ár að vera með jólastemningu í hjarta bæjarins og yfirleitt hefur það verið duglegt fólk í bænum sem hefur sett upp litla jólamarkaði með sínum vörum. „En það sem er öðruvísi núna er að Miðbæjarsamtökin voru svo heppin að fá mikinn meðbyr frá Akraneskaupstað með sér í ár. Í fyrra var markaður í gömlu Nínu sem var markaður sem allir gátu verið með en hann verður ekki þar núna vegna framkvæmda. Fólk gat leigt bás og selt sína vöru og boðið upp á kaffi og vöfflur. Þá var svo mikil jólastemning að það var ófært á markaðinn í nokkra daga því það var brjálað veður og mikill snjór!“ &nbsp;

Fyrst og fremst rekið með styrkjum

Tinna segir að Vera Líndal hjá Akraneskaupstað hefði haft samband við Miðbæjarsamtökin til að athuga hvort þau væru til í samstarf sem þau voru öll aldeilis til í. „Gamla Landsbankahúsið er í eigu kaupstaðarins og við fengum afnot af því fyrir markaðinn. Vera Líndal hefur einnig verið með okkur í skipulagningu og haldið utan um þetta, komið með ferskar hugmyndir og hvernig hægt sé að útfæra hlutina. Þetta er fyrst og fremst rekið með styrkjum sem Miðbæjarsamtökin eru að fá frá góðum fyrirtækjum hér í bæ sem hafa verið svo elskuleg að aðstoða okkur og þá stendur bærinn einnig straum af kostnaði. Þetta er í fyrsta skipti sem þetta er svona stórt í sniðum og við vildum hafa það þannig að básarnir væru fríir í ár til þess að fá inn sem flesta og til að sýna að þetta sé hægt. Markaðurinn verður í gamla Landsbankahúsinu að miklu leyti en okkur langar líka að vera með tjald fyrir utan og vera með kaffihúsastemningu á torginu. En við búum á Íslandi og þurfum að vera með plan B og ef það verður vont veður þýðir það að þá verður allt inni en það skýrist þegar nær dregur. Mest af öllu langar okkur að búa til svona lítil básahús eins og eru í jólaþorpinu í Hafnarfirði eða Kaupmannahöfn en það verður vonandi seinna.“

Tinna segir að Miðbæjarsamtökin ætli sér að halda þennan jólamarkað a.m.k. næstu þrjú árin og að vonandi verði það til þess að Jólatorgið festist í sessi hérna hjá okkur Akurnesingum og verði að okkar eigin jólahefð. „Þetta er stórt verkefni og að mestu unnið í sjálfboðavinnu, en við gerum þetta allavega þrisvar sama hvað, en hvað verður eftir það ræðst auðvitað af því hversu vel viðburðurinn er sóttur. Þetta er ekki fullreynt fyrr en í þriðja sinn að mínu mati, við erum bjartsýnt fólk og mikil jólabörn og trúum ekki öðru en að öll fjölmenni á þennan jólalega viðburð og styðji við verslun, list og fjáraflanir og hjálpi okkur að skapa líf og stemningu í miðbænum.“

Á rakarastofu Hinriks verður fyrirtækið Kölski með mátun á jakkafötum og skeggsnyrtisett, bindi og slaufur verða til sölu fyrir karlmenn á öllum aldri. Við gamla Landsbankahúsið verða íþróttafélög og skátarnir með heitt súkkulaði og veitingar, ýmiss girnilegur matur á boðstólum og Norðanfiskur og 10. bekkir grunnskólanna verða með bás með glæsilegum jólamat að akurnesískum sið. Kristbjörg sem er með skúrinn á Heiðarbrautinni verður með retro jólavöru og Tinna Royal verður með glaða og skemmtilega jólaskrautið sitt.

Tinna segir að aðaltilgangurinn með þessu sé fyrst og fremst að fá jólin hingað heim á Skagann, geta rölt niður á torg og fundið jólaskapið í sínum heimabæ með fólkinu sínu. „Það er eitthvað fyrir alla, allt frá níu mánaða til 99 ára. Þá er einnig tilgangurinn að efla fyrirtæki, verslun og þjónustu hérna í bænum. „Það þarf ekki að fara út fyrir bæjarmörkin til þess að gera eitthvað jólalegt og versla jólagjafir. Það er svo miklu meira í boði hérna en fólk gerir sér grein fyrir og okkur langar bara að leggja okkar af mörkum til þess að kynna það fyrir fólki. Hver vill ekki sleppa við umferðina í höfuðborginni og nota frekar tímann í að jóla sig upp bara hér heima?“

Gjafir sem fást ekki hvar sem er

Mikil fjölbreytni verður í sölubásum og hægt verður t.d. að kaupa góðgæti fyrir jólamatinn; reyktan og grafinn lax, jólasíld og gæsapylsur svo eitthvað sé nefnt. Þeir sem leita að einhverju í jólapakkana geta fundið sérstæðar gjafir sem fást ekki hvar sem er, ýmsa list, handgerðar vörur, skart, skrautmuni og heimilisvöru. „Það virðist vera að við höfum hitt á einhvern hárréttan tímapunkt með þetta í ár því það er alveg sama hvert við höfum leitað, það er mjög mikill meðbyr og allir mjög jákvæðir og til í að taka þátt í þessu með okkur. Fólk er held ég kannski farið að versla aðeins öðruvísi. Það er að breytast mjög mikið verslunarmenningin á Íslandi að því leytinu til að fólk er farið að panta meira á netinu, klára jólagjafainnkaupin fyrr og þegar það fer niður í bæ í desember þá er það kannski fyrst og fremst að leita að stemningu og upplifun. Þegar ég var lítil var Þorláksmessa brjálaðasti dagurinn! Unnið fullan vinnudag, svo skatan, jólatréð upp og svo rokið út að kaupa allar jólagjafirnar og allir hálf meðvitundarlausir á aðfangadag. Í dag er fólk kannski búið að versla flest á svörtum föstudegi eða netmánudegi og þráir bara kósýheit og afslöppun í desember.“

Tinna hvetur Skagamenn og nærsveitunga að kíkja í miðbæinn næstu tvær helgar og upplifa jólastemningu eins og hún gerist best. „Ef fólk vill að eitthvað sé um að vera í bænum þá verður það einfaldlega að mæta. Við mælum velgengnina á því hvað margir mæta og hversu mikið líf myndast í kringum þetta. Því meira líf og fjör, því meiri líkur eru á að þetta verði að föstum viðburði næstu árin og það er von okkar og trú að svo verði.“

Að lokum vill hún senda innilegar þakkir til þeirra fyrirtækja sem lögðu sitt að mörkum til þess að Jólatorgið 2023 gæti orðið að veruleika. „Þið vitið hver þið eruð!“ segir Tinna Steindórsdóttir um leið og hún þeytist aftur út um hurðina á leiðinni niður á torg að undirbúa jólalegasta jólamarkað norðan Alpafjalla!

Fréttaveita Vesturlands

Jólamarkaður og stemning á Akratorgi tvær næstu helgar