Þorsteinsmótið í bridds var haldið í gær í Logalandi í Borgarfirði. Mótið er eins og kunnugt er minningarmót um Þorstein Pétursson kennara frá Hömrum sem um árabil beitti sér fyrir framgangi briddsíþróttarinnar í héraði. Þorsteinsmót er að venju langstærsta briddsmót í landshlutanum og mögulega einnig utan höfuðborgarsvæðisins. Þátttaka á mótinu var góð, en 48 pör tóku þátt. Spiluð voru 44 spil. Flestir komu spilarar af höfuðborgarsvæðinu. Veitt voru verðlaun fyrir fjögur efstu sætin, en einnig nokkur aukaverðlaun.