Áttunda umferðin í 1. deild karla í körfuknattleik var spiluð í gærkvöldi þar sem Vesturlandsliðin Snæfell og ÍA unnu sigra á meðan Skallagrímur þurfti að sætta sig við tap.

Snæfell úr Stykkishólmi batt enda á sex leikja taphrinu þegar þeir tóku á móti liði Selfoss og unnu leikinn með ellefu stiga mun, lokatölur 91:80 fyrir Snæfelli. Jafnt var á með liðunum í fyrri hálfleik og staðan 46:47 fyrir Selfossi. Baráttan hélt áfram í þriðja leikhluta og þegar honum lauk var munurinn á liðunum þrjú stig, staðan 72:69 heimamönnum í vil. Snæfellingar voru síðan sterkari í síðasta fjórðung og unnu að lokum öruggan sigur. Jaeden King var allt í öllu hjá Snæfelli og skoraði alls 47 stig, Samuel Burt var með 16 stig og Eyþór Lár Bárðarson með 11 stig.

Skagamenn tóku á móti Ármanni en fyrir leik var ÍA í 7. sæti með sex stig á meðan Ármann var í 11. sæti með tvö stig. Leikurinn var nokkuð jafn í fyrsta leikhluta en þegar tvær mínútur voru eftir af honum í stöðunni 20:18 má segja að leiðir hafi skilið. Skotnýting Skagamanna í fyrri hálfleik var virkilega góð á meðan Ármenningar áttu erfitt uppdráttar sóknarlega. Það var svo í þriðja leikhluta sem heimamenn gerðu endanlega út um leikinn, leikhlutinn fór 25-10 fyrir ÍA og síðasti leikhluti var í raun bara formsatriði fyrir liðin að klára. Lokatölur leiksins 94:67 og öruggur sigur ÍA. Hjá ÍA var Aamondae Coleman með tvöfalda tvennu en hann var stigahæstur á vellinum með 21 stig auk þess að taka 10 fráköst, Srdan Stojanovic var með 16 stig og Styrmir Jónasson með 14 stig.

Eftir góðan sigur á toppliði Fjölnis í síðustu umferð var Skallagrímsmönnum skellt niður á jörðina þegar þeir mættu ÍR í Breiðholtinu. ÍR-ingar voru miklu betri í fyrri hálfleik og leiddu með fimmtán stigum, 38:23. Jafnt var á með liðunum í þriðja leikhluta en í síðasta fjórðungi náðu gestirnir að gera betur og unnu hann 16-25 sem dugði þó ekki til, lokatölur 77:71 fyrir ÍR. Marinó Þór Pálmason var stigahæstur hjá Skallagrími með 21 stig, Darius Banks var með 18 stig og Björgvin Hafþór Ríkharðsson með 11 stig.

KR og ÍR eru í tveimur efstu sætunum með 14 stig og Fjölnir, Sindri og Þróttur Vogum koma næst með 12 stig. ÍA og Skallagrímur eru í 6.-7. sæti með 8 stig, Snæfell, Þór Akureyri og Selfoss eru með 4 stig og tvö neðstu liðin eru Hrunamenn og Ármann með 2 stig.

Í næstu umferð sem er sú næstsíðasta fyrir jólafrí mætast Skallagrímur og ÍA í sannkölluðum Vesturlandsslag í Fjósinu í Borgarnesi. Snæfell fer hins vegar á Flúðir og mætir Hrunamönnum. Leikirnir fara fram næsta föstudag og hefjast klukkan 19.15.

Langþráður sigur Snæfells, ÍA vann Ármann en Skallarnir töpuðu