Rætt við Hildi Ingólfsdóttur kírópraktor sem opnaði nýlega stofu á Akranesi

Kírópraktorar eru menntaðir til að greina, meðhöndla og fyrirbyggja vandamál í liðum, vöðvum og taugum fólks. Kírópraktorar eru löggilt heilbrigðisstétt á Íslandi og hefur kírópraktík þróast mjög á undanförnum áratugum og eru kírópraktorar stétt sem býr yfir mikilli þekkingu á helsta viðfangsefni sínu, stoðkerfisvandamálum. Á Íslandi hefur þjónusta kírópraktora verið í boði síðan 1977. Hildur Ingólfsdóttir opnaði nýverið kírópraktor stofu á Akranesi sem ber heitið Akranes kírópraktík og er stofan staðsett á Kirkjubraut 28 á 2. hæð. Akranes kírópraktík sérhæfir sig í stoðkerfisvandamálum og er fyrir alla aldurshópa.

Hildur kom við á skrifstofu Skessuhorns í síðustu viku og ræddi við blaðamann. Hún er að eigin sögn sveitastelpa og er ættuð að norðan frá Laugum í Reykjadal sem er þéttbýliskjarni í Þingeyjarsveit. „Ég hóf nám í íþróttafræði á Laugarvatni eftir stúdentsprófið og lauk þar BS námi á þremur árum. Þar kynntist ég kærastanum mínum, Sigurdóri Ísak sem er ættaður úr Borgarnesi, þannig að þetta nám var ekki alveg til einskis! Eftir það vorum við eitt ár í bænum þar sem ég var að kenna í hóptímum í World Class og var aðeins í einkaþjálfun samhliða því. Svo var pælingin hvað við ættum að gera næst, mér fannst íþróttafræðin áhugaverð en mig langaði alltaf meira að hjálpa fólki. Þá fór ég að skoða með nám í kírópraktík en hafði aldrei tekið það skref að hugsa meira út í það nám. En þarna ákvað ég að gera eitthvað í þessu og fór í mastersnám í kírópraktík í Bournemouth í Bretlandi.“

Erfitt nám

Hildur segir að þar sem hún hafði lokið við íþróttafræðina hafi hún fengið fyrsta árið metið en var alls í fjögur ár úti. „Þetta var yndislegur og skemmtilegur tími. Þetta er háskólabær á suðurströndinni og við Ísak fórum saman þangað. Á meðan ég var í námi var hann að vinna á tælenskum veitingastað og var barþjónn þar. Síðasta árið mitt fór hann heim til Íslands og ég var eftir úti þannig að við vorum í fjarbúð í eitt ár.“ Hildur segir að námið hafi verið mun erfiðara en hún bjóst við. „Fyrstu tvö árin eru nánast bara læknisfræði þar sem þú ert að læra líffærafræði og sjúkdómafræði. Þú þarft þann grunn því ef þú færð til að mynda einstakling í meðferð til þín þá þarftu að vita til dæmis hvort þú eigir að senda viðkomandi í frekari rannsókn hjá lækni eða hvort sé í lagi að þú haldir áfram meðferð. Fyrsta árið fór mest í að komast í gegnum þetta allt saman, allt námsefnið var á ensku og nýr staður og nýir kennarar. Fyrstu tvö árin voru meira svona bóklegt og þau voru mjög krefjandi en eftir það var þetta meira verklegt. Síðasta árið er í rauninni bara starfsnám þar sem þú ert að skila nokkrum bóklegum áföngum með en ert í svona skólaklíník þar sem þú ert að stíga þín fyrstu skref í að hitta fólk en samt með kennara til handleiðslu og til að hjálpa þér.“

En hvað er kírópraktor í stuttu máli? „Hnykkmeðferð er til að vinna í stoðkerfisverkjum. Við erum að reyna að losa um liði sem eru fastir, annað hvort út frá bólgum eða skriðum í liðum og reynum að koma aftur réttri hreyfigetu í hryggjarliðina. Við erum að vinna aðallega með hryggjarsúluna og það er einnig fólk sem kemur til okkar sem á við vandamál að stríða í öxlum, mjöðmum og hnjám. Við reynum að finna rót vandans og oft hjálpar að opna fyrir brjóst, bak og herðar og það kannski hjálpar öxlunum. Sama ef það er skekkja í mjöðmum þá getur það haft áhrif á hné og ökkla þannig að þetta getur verið mismunandi. Þá erum við einnig að skoða börn og þeirra hreyfigetu. Eins og hvort þau hafa orðið fyrir áfalli í fæðingu, hvort þau eigi erfitt með að sitja í bílstól eða að ná þessum þroskastigum eins og að setjast og ganga.“

Leist best á Akranes

Hildur útskrifaðist árið 2021 og hefur því starfað við greinina í rúm tvö ár. Hún vann tvö ár í Kírópraktor Lindum í Kópavogi en hver var ástæðan fyrir því að hún ákvað að koma á Akranes? „Við Sigurdór Ísak vorum að velta þessu fyrir okkur og komumst að þeirri niðurstöðu að Reykjavík hentaði okkur ekki og þá fórum við að skoða í kringum okkur. Selfoss, Hveragerði, Akranes eða Borgarnes komu öll til greina en eftir að hafa skoðað þetta betur leist okkur best á Akranes. Við erum bæði mikið tengd íþróttum og á Akranesi er mikið íþróttasamfélag og mikil uppbygging í gangi. Þetta er miðsvæðis, stutt að skreppa í bæinn, í Borgarnes eða norður þannig að þetta hentar mjög vel. Hér var engin kírópraktorstofa fyrir þannig að tækifærin voru til staðar og við tókum þá ákvörðun að setjast hér að.“

Hverjir eru að koma til þín í meðferð og hvað er aðallega að hrjá þá? „Þetta er mikið skrifstofufólk sem hreyfir sig lítið og situr í slæmri líkamsstöðu þannig að í rauninni koma þessir álagspunktar á hrygginn þegar fólk er í rangri líkamsstöðu í kyrrstöðu í langan tíma. Langalgengustu vandamálin hjá skrifstofufólki eru herðarnar, axlirnar, hálsinn, höfuðverkir og vöðvabólga í herðum og einnig mjóbaksverkir. Svo ertu með þá sem eru í líkamlega krefjandi vinnu eins og þeir sem eru að bogra og lyfta þungum hlutum og þá myndast slit í líkamanum með tímanum og þá koma oft krónískir verkir.“

Frábært fyrir alla

Hildur segir einnig að almennt geti allir komið til kírópraktora til að láta hnykkja sig en auðvitað fari fyrsti tíminn alltaf í það að skoða sjúkrasöguna og fara vel í bakgrunninn hjá viðkomandi einstaklingi. „Því ef einstaklingur er með alvarlega beinþynningu þá þurfum við að vita það áður en við förum að hnykkja. En þá er oft hægt að nota öðruvísi aðferðir, mýkri aðferðir og síðan eru kannski einstaklingar sem eru með mjög slæma gigt, krabbamein eða aðra alvarlega sjúkdóma og þá þurfum við alltaf að taka það inn í. Þess vegna getur fyrsti tíminn oft verið langur og þess vegna förum við vel yfir að hreyfigreina og skoða líkamann því að það er ekkert endilega sniðugt fyrir alla að fara í alvöru meðferð. En almennt ef það eru engir undirliggjandi sjúkdómar þá er þetta frábært fyrir alla að koma. Þetta eru oft fyrirbyggjandi aðferðir og betra að koma fyrr heldur en seinna til að fá lausn á vandanum.“

En er vont að láta hnykkja sig? „Almennt er það ekki en ef þú kemur inn mjög verkjaður þá getur þetta verið óþægilegt og þess vegna byrjum við mjög rólega. Fólki bregður kannski aðeins fyrst þegar brakar í líkamanum og ef það hefur ekki prófað þetta áður en það geta verið smá óþægindi ef það eru miklir verkir og bólgur til staðar.“

Gefandi að geta hjálpað

Ertu með einhver tilfelli sem þú getur sagt frá þar sem þú hefur getað hjálpað fólki á einhvern hátt? „Ég hef hitt alveg ótrúlega mikið af góðu og skemmtilegu fólki í gegnum starfið og ég væri ekki að þessu nema hversu gefandi það er að geta hjálpað. Rúsínan í pylsuendanum er síðan að sjá fólkið sitt ná þeim markmiðum sem það setti sér í byrjun. Það er erfitt að koma með eitthvað eitt dæmi en þegar ég lít til baka þá hugsa ég um konuna sem komst aftur á vinnumarkað eftir að hafa þjáðst af verkjum í mörg ár. Strákinn sem lenti í slysi á mjóbaki en komst síðan í landsliðshóp í sinni íþrótt. Eða barnið sem grét alla daga, átti erfitt með að sitja í bílstól, liggja á maganum eða nærast almennilega og síðan breytast í glatt barn.“

Sitja ekki eins og rækja

Hildur segir að í langflestum tilfellum fái hún til sín einstaklinga sem eru búnir að vanrækja skrokkinn yfir langan tíma og líkaminn er farinn að segja stopp, hingað og ekki lengra. „Ég legg mikið upp úr því að fólk taki ábyrgð á eigin líkama og hugsi um kírópraktík sem hjálpartæki til að koma sér af stað og til að snúa við blaðinu en ekki töfralausn þar sem eitt brak muni breyta síðustu 10-20 árum. Við vinnum að þessu saman og setjum upp meðferðarplan með heimavinnu. Sem geta verið æfingar, breytt svefnstaða og vinnuaðstaða. Laga ósiði eins og ég segi stundum sem eru t.d. að krossleggja fætur, tylla í annan fótinn, liggja á maganum, rétta frekar úr baki og öxlum. Sitja ekki eins og rækja eða horfa á símann með höfuðið alveg bogið fram. Við þurfum að hugsa um hryggheilsu alveg eins og við hugsum um tannheilsu. Þetta er bara rútína sem þarf að venja sig á.“

Hildur segir í framhaldi af þessu að flestir sem koma til kírópraktors séu með svipuð vandamál en stundum sjái hún ótrúlega hluti sem erfitt er að útskýra og segir hér frá því þegar hún var með konu í meðferð fyrir um tveimur árum síðan sem er með PCOS sjúkdóminn. Til að fræða lesendur þá stendur PCOS fyrir Polycystic Ovarian Syndrom eða fjölblöðrueggjastokkaheilkenni á íslensku. Einkum eru það þrír þættir sem tilheyra heilkenninu en það eru óreglulegar blæðingar, einkennandi útlit á eggjastokkum við ómskoðun og merki um aukin androgen hormónaáhrif á húð og hárvöxt. Orsök þessara breytinga eru talin vera genatengdar erfðabreytingar. Hjá fullorðnum konum eru fyrstu merki um heilkennið oft erfiðleikar við að verða þungaðar eða óútskýrð þyngdaraukning en hjá unglingsstúlkum geta það verið stopular eða jafnvel engar blæðingar. Einkenni eru mjög mismunandi milli einstaklinga.

Of skrýtið til að vera bara tilviljun

„Mig langar að taka það fram að konan kom ekki í meðferð út af PCOS heldur út af verkjum í brjóstbaki. Eftir að ég hnykkti konuna í fyrsta skipti þá sagði hún mér að næsta dag hefði hún farið á frussandi túr, Það var eins og allt hefði bara opnast. Hún spurði hvort kírópraktík gæti haft áhrif á þetta. Ég sagði að það væri erfitt að segja til um það því líkaminn er svo ótrúlega flókinn og erfitt sé að rannsaka svona lagað en ég fræddi hana þó um að við geymum allt taugakerfið í hryggjarsúlunni og eina leiðin fyrir heilann til að senda skilaboð til líkamans er með taugunum sem ferðast niður hrygginn. Þegar taugakerfið fær ekki að starfa sem allra best þá tölum við um skerta taugastarfsemi, það getur verið vegna þess að bólgur, vefir eða annað þrýstir á taugar. Markmiðið með hnykkingu er að leyfa kerfinu að starfa sem allra best og stundum eins og mögulega í hennar tilfelli hafði það góð áhrif. Við köllum það „jákvæðar afleiðingar“ þegar kerfið fær að starfa almennilega. En á sama tíma þá er aldrei hægt að ábyrgjast að meðferð hjálpi til með PCOS og ófrjósemi. Svo nokkru seinna fékk ég aftur konu til mín sem kom út af stoðkerfisverkjum og hafði ekki farið á blæðingar í rúm tvö ár. Hún sagði nákvæmlega sömu sögu og allt kerfið fór í gang. Það var ekki fyrr en þriðja manneskjan kom til mín með svipaða sögu að ég hugsaði: Þetta er of skrýtið til að vera bara tilviljun.“

En svona að lokum, hvernig hafa viðtökurnar verið? „Ég opnaði fyrir einum og hálfum mánuði og kannski ekki mikið að marka en hingað til hafa viðtökurnar verið alveg frábærar. Það vantaði augljóslega þessa þjónustu hér og ég hef fengið marga til mín sem voru í meðferð í Reykjavík og eru fegnir að þurfa ekki lengur að keyra á milli. Þá er einnig miklu auðveldara að skjótast úr vinnu til mín þegar stofan er á Akranesi.“ Spurð hvort hún sé ekki bjartsýn fyrir komandi tímum svarar Hildur: „Verður maður ekki að vera það?“

Stofan er staðsett á 2. hæð við Kirkjubraut 28 á Akranesi.

„Langaði alltaf meira að hjálpa fólki“

Rætt við Hildi Ingólfsdóttur kírópraktor sem opnaði nýlega stofu á Akranesi

Rætt við Hildi Ingólfsdóttur kírópraktor sem opnaði nýlega stofu á Akranesi