Nýverið hlaut Sementsverksmiðjan umhverfisvottun samkvæmt alþjóðlega staðlinum ISO 14001. Staðallinn setur fram skýran ramma um hvernig eigi að viðhalda og stjórna umhverfisstjórnunarkerfi í starfsemi fyrirtækja sem vinna markvisst að því að draga úr neikvæðum umhverfisáhrifum. Innleiðing á umhverfisstjórnunarkerfi er umfangsmikið ferli og í mörg horn að líta enda markmið vottunarinnar að koma á bæði vöktun og stýringu á umhverfisþáttum sem tengjast rekstrinum.

„Það skiptir okkur miklu máli að vera með vottað umhverfisstjórnunarkerfi, enda mikill metnaður hjá starfsfólki og eigendum fyrirtækisins að vera sífellt að bæta árangur í umhverfismálum. Umhverfisvottunin veitir okkur aðhald og stuðning til að greina, stýra og lágmarka áhættuna af því að starfsemi Sementsverksmiðjunnar valdi neikvæðum umhverfisáhrifum. Í því felst m.a. að við fylgjumst sérstaklega vel með fyrirkomulagi á löndun sements frá skipi yfir í síló og höfum gripið til fjölþættra aðgerða til að koma í veg fyrir hugsanleg óhöpp tengt því,“ segir Gunnar H. Sigurðsson, framkvæmdastjóri Sementsverksmiðjunnar.

„Fyrirtækið vinnur eftir umhverfisstefnu, mælir og fylgist með kolefnisspori starfseminnar og hefur sett fram skýr markmið um að draga enn frekar úr losun gróðurhúsalofttegunda frá starfseminni næstu misserin. ISO 14001 vottunin staðfestir einnig metnaðarfullt starf sem unnið er að í umhverfismálum og veitir jafnframt aðhald um að áætlanir og verklagsreglum sé fylgt eftir. Áður hafði Sementsverksmiðjan hlotið vottun á gæðakerfi skv. ISO 9001 og stjórnkerfi um heilbrigði og öryggi á vinnustað sem uppfyllir kröfur ISO 45001. Árlega fer fram úttekt þar sem farið er yfir frammistöðu og markvirkni stjórnkerfanna,“ segir í tilkynningu.

Sementsverksmiðjan hlýtur umhverfisvottun