Rýnt í fjárhagsáætlun Akraneskaupstaðar og þriggja ára áætlun

Fjárhagsáætlun Akraneskaupstaðar fyrir næsta ár og þriggja ára áætlun var lögð fram til fyrri umræðu í bæjarstjórn síðastliðinn þriðjudag. Í upphafi kynningar sagði Haraldur Benediktsson bæjarstjóri að sókn væri í samfélaginu á Akranesi og gert væri ráð fyrir jafnvægi í rekstri á árunum 2023 og 2024, en 102 milljóna króna tap varð á rekstri bæjarsjóðs árið 2022.

„Tækifæri eru til uppbyggingar og þróunar í sveitarfélaginu en ástæða er til að vera varfærin svo sem vegna stöðu heimsmála, þungs fjármagnsmarkaðar og óvissu í kjarasamningum. Gert er ráð fyrir áframhaldandi fjölgun íbúa og að innviðir haldi í við aukna eftirspurn eftir þjónustu.“ Þá sagði Haraldur að meðal helstu áskorana fyrir árið 2024 væri að mikið uppbyggingarskeið íbúðahúsnæði væri framundan en að gatnagerð og skipulag tryggði gott framboð lóða. Unnið væri markvisst að samstarfi við fyrirtæki um aðsetur á Akranesi og uppbyggingu þar sem koma mun fram í eflingu atvinnulífs. Sagði hann mikinn áhuga vera meðal fjárfesta á uppbyggingu í bæjarfélaginu en ástand efnahagsmála væri þar hindrun. Þá sagði Haraldur að áfangi hefði náðst í framtíðarsýn um uppbyggingu á Jaðarsbökkum, skipulagsvinna færi að hefjast. Á næsta ári mun einnig hefjast vinna við deiliskipulag Breiðarinnar og batt bæjarstjóri vonir við innkomu nýrra fyrirtækja í skjóli Þróunarfélagsins Breiðar. Verulegt fjármagn er áætlað í viðhald bygginga t.d. Grundaskóla, Brekkubæjarskóla og íþróttahússins við Vesturgötu. Þá er búið að bjóða út innanhússframkvæmdir við nýtt íþróttahús á Jaðarsbökkum. Undirbúningur lóðar fyrir nýja samfélagsmiðstöð er í fullum gangi og áframhaldandi vinna í þágu farsældar barna.

Útsvar óbreytt en gjaldskrár hækka

Álagt útsvar verður óbreytt, eða 14,74%, vegna launa ársins 2024. Breyting verður á sorphirðu á næsta ári og munu sorpgjöld fyrir hverja íbúð, miðað við tvær sorptunnur, verða 19.256 krónur í sorphreinsunargjald og 16.422 krónur í sorpeyðingargjald. Almennar þjónustugjaldskrár hækka um næstu áramót um 7%, nema að sérstök ákvörðun verði tekin um einstaka gjaldskrár.

Í fjárhagsáætlun kemur fram að áætlað er að rekstrartekjur á næsta ári verði rétt tæpir 12 milljarðar króna og hækki um 6,5% frá yfirstandandi ári. Í þriggja ára áætlun er gert ráð fyrir að 6,7% hækkun verði að meðaltali á tekjum á tímabilinu 2023 til 2027 og endi í rúmlega 14 milljörðum króna árið 2027. Fjárhagsáætlun næsta árs og þriggja ára áætlun gerir ráð fyrir tekjuafgangi öll árin, en tap upp á 1,33% varð á rekstri Akraneskaupstaðar árið 2022 eins og fyrr segir. Í útkomuspá fyrir yfirstandi ár er gert ráð fyrir 148 milljóna króna hagnaði af rekstri bæjarsjóðs. Samanlögð rekstrarafkoma spátímabilsins (2024-2027) er jákvæð sem nemur 366 m.kr.

Lántaka eykst

Áætlað er að eiginfjárhlutfall Akraneskaupstaðar í árslok 2023 verði 49%. Á spátímabilinu mun eiginfjárhlutfall styrkjast og nema 45% í árslok 2027. Langtímaskuldir voru í árslok 2022 alls 770 m.kr. en talsverðar lántökur eru í áætlun fyrir árin 2024 og 2027. Áætlað er að langtímaskuldir verði 4.400 m.kr. í árslok 2024 og 6.056 m.kr. í árslok 2027. Þessar auknu skuldir helgast af því að bæjarsjóður mun ráðast í fyrrgreind fjárfestingaverkefni á næstu árum, þ.e endurbætur á 1. hæð Brekkubæjarskóla, áframhald byggingar íþróttahúss á Jaðarsbökkum, endurbætur á íþróttahúsinu við Vesturgötu og endurbætur og stækkun C álmu Grundaskóla.

Auknar tekjur Akraneskaupstaðar og gert ráð fyrir afgangi af rekstri

Rýnt í fjárhagsáætlun Akraneskaupstaðar og þriggja ára áætlun

Rýnt í fjárhagsáætlun Akraneskaupstaðar og þriggja ára áætlun