Seinni partinn í gær var innflutningsboð Landmælinga Íslands haldið í nýju húsnæði stofnunarinnar að Smiðjuvöllum 28 á Akranesi. Þar gátu boðsgestir skoðað hina nýju vinnuaðstöðu og þá möguleika sem í henni felast.

Gunnar H. Kristinsson forstjóri Landmælinga bauð gesti velkomna og sagði að nýja húsnæðið væri talsvert ólíkt því sem þau voru í áður á Stillholtinu. Það var 1500 fermetrar en hér væru þau í sex hundruð fermetrum. Efri hæðin er 470 fermetrar og 130 fermetra geymslurými er á neðri hæðinni. „Þessi breyting á stærð er ekki eingöngu vegna þess að okkur hefur fækkað úr 35 í 23 starfsmenn heldur er það einnig vegna þess að starfsemin hefur breyst. Við erum hætt að prenta kort, framkalla filmur og stækka myndir þannig að plássþörfin hefur breyst og svo hefur tæknin aðeins hjálpað til. Bæði eru tölvuskjáirnir orðnir miklu þynnri og það er ekkert tölvukerfi á staðnum, það er allt í skýinu.“

*Gunnar forstjóri, Guðlaugur Þór og Haraldur voru hæstánægðir með nýju aðstöðuna.*

Myndi aldrei vilja fara til baka

Gunnar sagði varðandi nýja húsnæðið að þeir hefðu farið af stað með það að innrétta eins og ríkið lagði skyldur á þeirra herðar. „Við fórum af fullum krafti í það en uppgötvuðum það fljótt að það gengur ekki alveg upp fyrir rúmlega 20 manna vinnustað að vera með sjö mismunandi tegundir af vinnurýmum. Það hefði verið allt of dýrt og flókið og við fórum í annað kerfi þar sem við erum með tvær til þrjár tegundir af vinnurýmum og flestir starfsmenn hafa fasta vinnustöð. Það er engin lokuð skrifstofa hér og allir í opnum vinnurýmum og ég verð að viðurkenna það að ég var 20 ár í einkaskrifstofu á Stillholti og ég myndi aldrei vilja fara til baka eftir að hafa prófað þetta. Á þessum stutta tíma sem við höfum verið hérna hefur okkur tekist að skapa svona vinnurými sem ýtir undir það sem við erum að gera á vinnustaðnum. Að koma saman til að eiga samskipti og vinna saman og það er að ganga vel upp.“

Gunnar sagði einnig að það að flytja svona stofnun eins og Landmælingar væri talsvert mikið verk og út af loftgæðavandamálum á gamla staðnum þá var tekin sú ákvörðun að ekkert færi með á nýja staðinn sem þyrfti ekki nauðsynlega að koma með. „Við skiluðum öllum gögnum sem við gátum á Þjóðskjalasafnið, flokkuðum og hentum alveg gríðarlegu magni af rusli, pappír og öðru sem engin þörf var á að geyma. Við seldum og gáfum húsgögn, hillur og annað slíkt og öðru var hent. Það eina sem við tókum með okkur var tölvubúnaðurinn, skjáir, lyklaborð og mýs en allt annað er nýtt.“

Að lokum þakkaði Gunnar arkitektinum Hallgrími Friðgeirssyni fyrir innréttinguna að skrifstofuhúsnæðinu sem hefði tekist mjög vel og sparað bæði mikinn tíma og peninga. Þá fékk Gísli Kristófersson eigandi og byggingameistari hússins þakkir fyrir mikinn velvilja og einstaka þjónustulund. „Ég vil einnig þakka starfsfólki Landmælinga fyrir þetta mikla verk sem var að flytja stofnunina og einnig fyrir mikið langlundargeð í gamla húsnæðinu. Við horfum á nýja húsnæðið sem einn vinnustað, allt húsið er okkar vinnustaður og að við séum hérna sem ein heild. Við lítum þannig á að okkar vinnustöð sé vinnustaður fyrir ríkisstarfsmenn og það sé opið fyrir þá sem eru búsettir á Akranesi eða nærsveitum. Þetta er staður sem þau geta komið á og fundið góða aðstöðu og unnið með einstaklega góðum vinnufélögum.“

Öryggishlutverkið seint ofmetið

Guðlaugur Þór Þór Þórðarson umhverfis- orku og loftslagsráðherra tók næstur til máls og var á léttu nótunum í sinni ræðu. Hann rifjaði upp ferðir sínar með Akraborginni þar sem hann lagði sig yfirleitt í svefnrýminu og svaf eins og ungabarn. Hann talaði síðan um mikilvægi Landmælinga og hvað stofnunin skiptir miklu máli þegar kemur að öryggi landsmanna. „Öryggishlutverkið verður seint ofmetið og við finnum fyrir því núna þegar við erum að horfa á þennan óróa á Reykjanesi hvað það er mikilvægt að við séum með eins góðar upplýsingar og við getum þegar kemur að náttúruvá. Þess vegna fórum við í þessa vegferð að sameina ríkisstofnanir því við vildum nýta mannauðinn sem allra best þegar kemur að því að sinna þessum grunngildum okkar að vernda náttúruna, vakta náttúruvánna og huga að loftslagsmálum. Það verður vonandi ekki langt í það að þessi stofnun verði hluti að stærri og öflugri stofnun þar sem frumvarp um sameiningu Landmælinga, Náttúrufræðistofnunar og Rannsóknarstofnunar við Mývatn liggur fyrir þinginu.“

Guðlaugur Þór sagði léttur að lokum að einhver gæti sagt að Akranes væri kannski ekki lengur mikil landsbyggð en það væri góður staður fyrir opinber störf. „Eins og allir vita er Akranes þekkt fyrir knattspyrnu og sömuleiðis sjávarútveg og því er maður enn að velta því fyrir sér af hverju þið réðuð bónda sem bæjarstjóra sem hvorki kann fótbolta eða hefur nokkurn tímann farið á sjó.“

*Eddi Lár spilaði ljúfa tóna fyrir gesti.*

*Feðgarnir Gísli Kristófersson og Georg Gíslason, eigendur Smiðjuvalla 28.*

Vekjum athygli á okkur

Umræddur bæjarstjóri, Haraldur Benediktsson, var síðastur á mælendaskrá og sagði hann að opinber störf á Akranesi væru þó nokkur en það væru alltaf ákveðin togstreita að halda í þau. „Ég trúi því að með opnun á þessum vinnustað þá höfum við farið í ákveðinn sóknarleik. Ég veit hug ráðherrans til þess að horfa til Akraness um staðsetningu starfa og það er ósköp freistandi að taka umræðu um opinber störf og staðsetningu þeirra en við lifum á miklum breytingatímum. Tímarnir hafa breyst og þessi staðsetning starfa er orðin allt önnur í dag. Það sem skiptir meira máli er að geta búið góða starfsaðstöðu og þá er það lykilþátturinn, að við getum boðið aðstöðuna og síðan er það okkar sem við höldum utan um bæjarfélagið að vekja athygli á okkur og hvað sé gott að búa hér. Það er margt sem er með okkur í þeim efnum og við trúum því að svo sé og viljum taka utan um það. En auðvitað er þetta barátta alla daga og ekkert gerist af sjálfu sér. Því gleðst ég mjög yfir þessum áfanga sem við erum að fagna hér í dag,“ sagði Haraldur Benediktsson bæjarstjóri.

Að þessu loknu var boðið upp á veitingar, gestir gátu skoðað húsnæðið og tekið gott spjall.

Opnun á nýju húsnæði Landmælinga á Akranesi