Umhverfis- og landbúnaðarnefnd Borgarbyggðar samþykkti á fundi sínum í liðinni viku ályktun sem um leið er ákall til yfirvalda vegna alvarlegrar stöðu landbúnaðar á Íslandi og bágra starfsskilyrða í greininni. Ályktunin er svohljóðandi í heild sinni:

„Umhverfis- og landbúnaðarnefnd Borgarbyggðar hvetur matvælaráðherra, ríkisstjórnina og þingmenn alla til að bregðast við alvarlegri stöðu landbúnaðar. Framtíð landbúnaðar og innlendrar matvælaframleiðslu er í hættu eins og bent hefur verið á um langt skeið. Hækkun aðfanga t.d. vegna stríðsátaka, heimsfaraldurs og hækkandi fjármagnskostnaðar spila þar stóran þátt. Bændur hafa lagt sig fram um að hagræða með ýmsum ráðum og gera breytingar á framleiðslu. Nú er svo komið að lengra verður ekki gengið. Ljóst er að staða margra framleiðanda er mjög tvísýn um þessar mundir og útlit fyrir að mörg bú stefni í þrot. Breytingar á reglugerðum og lagaumhverfi síðustu ár er lúta að aðbúnaði hefur knúið kúabændur til að fara í tugmilljóna fjárfestingar með tilheyrandi fjármagnskostnaði. Í slíku umhverfi blasir við að nýliðun verður ógerleg sem er grafalvarleg staða. Sauðfjárbændur hafa jafnframt þurft að glíma við erfið rekstrarskilyrði sem hefur leitt til fækkunar í þeirra starfsgrein.

Innlend matvælaframleiðsla gegnir gríðarlega miklu máli þegar kemur að fæðuöryggi þjóðarinnar ásamt því að vera hryggjarstykki í því að tryggja búsetu í dreifðum byggðum. Í stjórnarsáttmála ríkisstjórnarinnar er kveðið á um metnaðarfull markmið er lúta að auknu hlutfalli innlendra matvæla, fæðuöryggi og eflingu innlendrar framleiðslu. Það eru vonbrigði að þau áform birtast ekki í fyrirliggjandi fjármálaáætlun ríkisins.

Bændasamtök Ísland hafa gefið út að um 9.400 – 12.200 milljarðar þurfi að koma til svo landbúnaður geti staðið undir rekstrarlegum skuldbindingum og launagreiðslugetu árið 2023. Þá er mikilvægt að markmið búvörulaga er lúta að kjörum þeirra sem starfa í landbúnaði séu í samræmi við kjör annarra stétta. Jafnframt ber ríkisvaldinu að framfylgja þeim skuldbindingum sem koma fram í búvörulögum þar sem kveðið er á um að tryggja bændum viðunandi starfsskilyrði á móti skuldbindingum bænda til að framleiða landbúnaðarafurðir.

Mikil sóknarfæri eru í íslenskri matvælaframleiðslu hvort sem litið er til garðyrkju, kornræktar eða hefðbundinnar framleiðslu með búfénað. Mikilvægt er að stutt verði við íslenska framleiðslu með sýnilegum hætti og brugðist við þeim vanda sem blasir við strax.“

Senda ákall til stjórnvalda vegna bágrar stöðu bænda