Félag sauðfjárbænda í Dalasýslu stóð að venju fyrir Haustfagnaði um liðna helgi en það hefur um árabil tíðkast í tengslum við veturnætur eða fyrsta vetrardag. Þar var farið yfir það bitastæðasta í sauðfjárræktinni á svæðinu.

Haustfagnaðurinn hófst á lambhrútasýningu norðan varnargirðingar sem sker sýsluna í tvö varnarhólf. Það voru þau Monica og Harald bændur að Svarfhóli í Laxárdal sem buðu þar gestum og hrútum heim. Þau hafa meðal annars verið að byggja við fjárhúsin hjá sér og bæta aðstöðuna með myndarbrag en þau eru með eitt stærsta fjárbúið í Dalasýslu. Að Svarfhóli komu til sýningar 50 lambhrútar en gestirnir talsvert fleiri, nokkuð á annað hundraðið.

Að kvöldi föstudags var síðan blásið til sviðaveislu en hún var endurvakin að góðum sið en hún hafði ekki verið haldin síðan fyrir kórónuveirufaraldurinn. Veislan var haldin að Laugum í Sælingsdal í góðu samstarfi við rekstraraðila Dalahótels sem hafa endurvakið heilsársstarfsemi á staðnum. Á boðstólum voru ný, söltuð og reykt svið. Óhætt er að segja að viðtökurnar á þessum rómaða viðburði Dalamanna hafi verið góðar en vel á þriðja hundrað manns áttu þar góða kvöldstund við góðan mat og skemmtun söngglöðu félaganna Stefáns Helga Stefánssonar og Davíðs Ólafssonar en einnig stigu á svið Ragnar Ingi Aðalsteinsson, sérfræðingur í vísum og bragfræði og eftirherman gamankunna Jóhannes Kristjánsson. Loks var dansleikur með vestlensku hljómsveitinni Meginstreymi.

Á laugardeginum var lambhrútasýning sunnan varnargirðingar en þar buðu þau Þorbjörn og Ragnheiður að Harrastöðum heim í fjárhúsin sem alþekkt eru fyrir einstakan snyrtileika. Rúmlega 30 hrútar voru til sýningar þar en fjölmennt var á sýninguna líkt og daginn áður. Úrslit hrútasýninganna tveggja og afhending annarra verðlauna fyrir góðan árangur í sauðfjárrækt voru síðan kunngjörð á uppskeruhátíð sauðfjárbænda í Dalasýslu laugardagskvöldið í Dalabúð í Búðardal. Þar var ekki síðri matarveisla en kvöldið áður á sviðaveislunni en boðið var upp á grillað lambalæri með tilheyrandi ásamt eftirrétti enda sauðfjárbændur vel að veislunni komnir eftir haustannirnar en sláturtíð er nú lokið.

Veitt voru verðlaun fyrir bestu fimm vetra ærnar samkvæmt skýrsluhaldi en þar bar sigur úr býtum ærin 18-037 frá Sauðafelli í Miðdölum en hún hefur BLUP einkunn upp á 113,4, einlembd gemlingsárið, þrílembd veturgömul og ætið fjórlembd eftir það eða þrisvar sinnum.

Best dæmda gimbralamb Dalsýslu haustið 2023 reyndist vera lamb númer 172 frá Klifmýri á Skarðsströnd en hún var dæmd 4. október með 39 mm bakvöðva með bestu einkunn fyrir lögun, fituþykkt á baki 3,7 mm, einkunnina 9,5 fyrir frampart, 19 fyrir læri og 8,5 fyrir ull.

sla

Spenntir áhorfendur á hrútasýningu meðal annarra Ingibjörg á Spágilsstöðum, Steinunn á Leiðólfsstöðum og Bjargey á Skerðingsstöðum.

Jón Viðar lítur á og metur bestu hrútana í Dalasýslu haustið 2023.

Það mátti sjá margar flottar lopapeysur á viðburðum sauðfjárbænda í Dölum síðastliðna helgi, sumar vísuðu til bæjarnúmers en aðrar með hreinum og beinum starfstitlum.

Haldið í hluta af bestu mislitu hrútunum sem komu til sýningar að Svarfhóli.

Anja Mager og Lárus Birgir ráðunautar lögðu dóm á bestu og frambærilegustu lambhrútana í Dalasýslu.

Það var hrútur númer 11 frá Kringlu sem þótti besti lambhrútur Dalasýslu haustið 2023. Hann mældist með 36 mm bakvöðva, 4,5 fyrir lögun, 4,1 mm fituþykkt á baki og 108 í legg. Fyrri stigun hans var 8-9-9,5-9,5-9,5-19-8,5-8-9 = 90 stig, í stuttu máli fyrir þá sem ekki hafa lagt fyrir sig hrútadóma er um glæsilegan grip að ræða.

Veitt verðlaun fyrir bestu fimm vetra ærnar. Tvær bestu voru frá Sauðafelli en einnig fengu verðlaun ær frá Gillastöðum, Rauðbarðaholti og Kjarlaksvöllum.

Veitt verðlaun fyrir best dæmdu gimbrar haustsins en sú hlutskarpasta var frá Klifmýri sem Rúnar Hermannsson bóndi þar tók við viðurkenningu og bikar fyrir. Aðrar gimbrar sem fengu verðlaun voru frá Háafelli, Geirshlíð og Geirmundarstöðum.

Besti kollótti hrútur sýninganna var nr. 1029 frá Svarfhóli. Þar á eftir voru hrútar frá Stóra-Múla, Skörðum, Hornsstöðum og aftur Svarfhóli.

Af mislitum og ferhyrndum hrútum skaraði hrútur nr. 249 frá Rauðbarðarholti fram úr og hlaut fyrsta sætið í þeim flokki. Þar á eftir voru hrútar frá Sauðafelli, Skörðum, Svarfhóli og Háafelli.

Margir gestir nutu góðs matar á uppskeruhátíð sauðfjárbænda í Dölum um leið og farið var yfir góðan árangur í ræktunarstarfinu.

Í flokki hvítra hyrndra hrúta var bestur nr. 11 frá Kringlu sem systkinin Jóel og Nadía tóku á móti verðlaunum fyrir. Í öðru og fimmta sæti voru hrútar frá Rauðbarðaholti og í þriðja og fjórða sæti voru hrútar frá Stóra-Vatnshorni.

Haustfagnaður sauðfjárbænda í Dölum – myndasyrpa