Á fundi fræðslunefndar Borgarbyggðar 31. október síðastliðinum var til umræðu samstarf sveitarfélagsins við Hvalfjarðarsveit á sviði barnaverndamála, en mennta- og barnamálaráðuneytið gerir nú ríkari kröfur til sveitarfélaga á sviði barnaverndarþjónustu. Ákveðið hefur verið að horfa til samstarfs við fleiri sveitarfélög til að uppfylla þær kröfur sem barnamálaráðuneytið hefur sett ásamt því að skoða bakvaktafyrirkomulag í barnaverndarþjónustu sveitarfélagsins.

,,Um síðustu áramót fengu Borgarbyggð og Hvalfjarðvarsveit undanþágu frá mennta- og barnamálaráðuneytinu er snéri að viðmiði varðandi fjölda íbúa þegar kemur að umdæmi barnaverndarþjónustu. Í svarbréfi frá ráðuneytinu kom fram að á næsta ári yrðu gerðar ríkari kröfur og að sveitarfélögin þyrftu að sýna fram á að þau hafi leitað eftir samstarfi um barnaverndarþjónustu í stærri umdæmum. Í ljósi þessa er verið að horfa til samstarfs annars vegar við barnaverndarþjónustu Snæfellinga sem telur sveitarfélögin Snæfellsbæ, Eyja- og Miklaholtshrepp, Grundarfjörð og svo Stykkishólm, og hins vegar við Akranes. Fyrir liggur að Akraneskaupstaður uppfyllir þau skilyrði er fjallað er um, en ljóst er að minni sveitarfélög á Vesturlandi þurfi að taka upp sameiginlega barnaverndarþjónustu svo skilyrði séu uppfyllt,“ segir í fundargerð.

Auk þess að skoða samstarf við önnur sveitarfélög skoðar Borgarbyggð einnig að innleiða svokallað bakvaktarfyrirkomulag hjá barnavernd sveitarfélagsins. Þá myndi bakvakt vera starfandi utan hefðbundins vinnutíma en með slíku fyrirkomulagi væri hægt að styðja betur við uppbyggingu á barnaverndarþjónustu á svæðinu, er kemur fram í fundargerð. Drög að slíkri þjónustu hafa verið kynnt fyrir velferðarnefnd og byggðarráði sem hafa vísað erindinu áfram til samþykktar hjá sveitarstjórn.

Breytingar fyrirhugaðar á uppbyggingu barnaverndarþjónustu