Stykkishólmsdeild Noræna félagsins veitti í gær Eyrbyggjasögufélaginu styrk til refilsaumsverkefnis félagsins sem formlega verður hleypt af stokkunum næstkomandi laugardag í Þjóðgarðsmiðstöðinni á Hellissandi, kl. 14 með fjölbreyttri dagskrá.

Stjórn Stykkishólmsdeildar Norræna félagsins, Sólborg Olga Bjarnadóttir gjaldkeri, Sigurlína Sigurbjörnsdóttir ritari og fráfarandi formaður Þórhildur Pálsdóttir veittu styrkinn á Fosshótel Stykkishólmi og það var ritari Eyrbyggjasögufélagsins, Anna Sigríður Melsteð, sem tók á móti honum fyrir hönd stjórnar. Anna þakkaði fyrir styrkinn og í máli hennar kom fram að kostnaður við verkefnið er umtalsverður og er þessa dagana verið að ganga frá samningi við hönnuð refilsins, svo allir styrkir koma að góðum notum.

Eitt útsaumsspor

Refilsaumur er saumgerð sem dregur nafn sitt af orðinu refill. Reflar voru skrautleg tjöld úr ull eða líni sem höfð voru til þess að tjalda innan bæði kirkjur og híbýli fólks fyrr á tíð. Refilsaumur er aðeins eitt útsaumsspora sem notuð voru á miðöldum og er afbrigði af útsaumi sem nefndur er lagður saumur. Þessi meistaraverk íslenskrar miðaldalistar voru unnin af listfengum konum sem bjuggu yfir þekkingu og þjálfun í vefnaði og útsaumi.

Kvenfélögin koma að verkefninu

Þekktasti refillinn er hinn franski Baeyeux refill. Hér á Íslandi hefur refill með efnivið úr Njálssögu og Vatnsdælasögu verið hannaðir og saumaðir og nú stendur til að setja í gang refilgerð með myndskreytingum og sögum úr Eyrbyggjusögu. Hugmyndin var kynnt fyrir öllum kvenfélögum á Snæfellsnesi síðastliðið vor. Kvenfélögin eru sjö talsins, en þau munu koma að framkvæmd saumaskaparins við refilinn hvert í sinni sveit. Það eru Kvenfélag Hellissands, Kvenfélag Ólafsvíkur, Kvenvélagið Björk í Helgafellssveit, Kvenfélagið Hringurinn Stykkishólmi, Kvenfélagið Liljan Eyja- og Miklaholtshreppi, Kvenfélagið Gleym mér ei Grundarfirði og Kvenfélagið Sigurvon Staðarsveit. Til stendur að sýna refilinn, þegar þar að kemur, um allt Snæfellsnes og verður þannig til nokkurskonar refilslóð á söguslóðum Eyrbyggjusögu á Snæfellsnesi.

Kynnt á laugardaginn

Hönnuður refilsins er Kristín Ragna Gunnarsdóttir myndlistarmaður og rithöfundur en hún hannaði einnig Njálurefil og Vatnsdælarefil. Torfi Tulinius prófessor í miðaldabókmenntum við Háskóla Íslands, vinnur að drögum að handriti sýningar um Eyrbyggju og efnisþáttum sem endurspeglast í refilsaumnum.

Á laugardaginn verður viðburður á vegum Eyrbyggjasögufélagsins í Þjóðgarðsmiðstöðinni á Hellissandi þar sem Torfi, Kristín og Sæmundur Kristjánsson koma fram og verða m.a. sýnd fyrstu drög að teikningum á reflinum. Þess má geta að sama dag verður opnuð stærsta sýning ársins á 160 ára afmæli Þjóðminjasafnsins þar sem öll íslensk refilklæði, sem varðveist hafa, verða sýnd í fyrsta sinn saman.

Eyrbyggjurefill hlaut í gær styrk