Farið yfir stöðu sveitarfélaganna í innleiðingu nýs flokkunarkerfis

Um síðustu áramót varð sveitarfélögum á landinu skylt að flokka sorp í fjóra aðskilda flokka, þ.e. pappa og pappír, plast, lífrænan úrgang og almennt sorp. Sveitarfélögin eru komin mislangt í innleiðingu kerfisins. Blaðamaður Skessuhorns hafði samband við Hrefnu Bryndísi Jónsdóttur, framkvæmdarstjóra Sorpurðunar Vesturlands hf., til að fá yfirsýn yfir stöðu sveitarfélaganna á Vesturlandi við innleiðingu fjórðu tunnunnar.

Stykkishólmur byrjaði fyrst sveitarfélaga á Vesturlandi að flokka úrgang þegar þriggja tunnu flokkunarkerfið var innleitt á sínum tíma. Í dag eru Stykkishólmur og Borgarbyggð einu sveitarfélögin sem hafa tekið fjórðu tunnuna í gagnið hér í landshlutanum. Hvalfjarðarsveit hefur lengi flokkað í þrjá flokka en á enn eftir að innleiða fjórðu tunnuna.

Akraneskaupstaður, Eyja- og Miklaholtshreppur og Snæfellsbær hafa enn ekki innleitt nýja söfnunarkerfið og hafa ekki ennþá hafið flokkun á lífrænu sorpi frá heimilum. Sigurbörg Ottesen, oddviti Eyja- og Miklaholtshrepps, segir í samtali við Skessuhorn að unnið sé að innleiðingunni um þessar mundir í samstarfi við ráðgjafafyrirtækið Environice.

,,Akraneskaupstaður ætlar í sama söfnunarkerfi og höfuðborgarsvæðið og verða þá tvískiptar tunnur við sérbýli. Það er eina sveitarfélagið sem ætlar að taka það kerfi upp á Vesturlandi, svo vitað sé,“ segir Hrefna en skipulags- og umhverfissvið Akraneskaupstaðar segir að stefnt sé á útboð á breytingum og sorphirðu í næsta mánuði og að breytingar verði gerðar næsta vor. ,,Grundarfjarðarbær og Snæfellsbær vinna sameiginlega að útboði sorphirðu hjá sér um þessar mundir. Ég veit ekki hvenær þessi útboðsgögn fara í loftið en vinna við útboðsgagnagerð er hafin,“ segir Hrefna. ,,Sveitarfélög á landinu sem hafa verið að bjóða út sorphirðu eru að lenda í miklum hækkunum en svo virðist sem talsverðar hækkanir séu framundan á hirðingu úrgangs á landsvísu. Frést hefur af sveitarfélögum, sem hafa boðið út sorphirðu sína standa uppi með 60%-100% hækkun. Bæði er orðið meira mál að safna þegar flokkarnir eru orðnir fleiri, vinnan er orðin umfangsmeiri og eldsneytisverð kemur líka þarna inn í sem og aðrir rekstrarþættir sem hafa hækkað mikið vegna efnahagsaðstæðna,“ segir Hrefna. ,,Einnig má nefna að allar umbúðir bera nú orðið úrvinnslugjald og með góðri flokkun íbúa ættu sveitarfélögin að ná tekjum úr Úrvinnslusjóði í gegnum framlengda framleiðendaábyrgð en þá lækkar sorphirðugjaldið sem íbúarnir greiða. Flokkun endurvinnsluefna er þess vegna mikilvæg til að koma á móti hærri söfnunargjöldum. Rekstraraðilar sveitarfélaganna velta þessum miklu hækkunum mikið fyrir sér þessa dagana þar sem þær eru allar greiddar úr vösum íbúa,“ segir Hrefna.

Sorpurðun Vesturlands hf. rekur urðunarstað í Fíflholtum á Mýrum. Urðunarstöðin hefur leyfi til að urða allt að 25.000 tonn af úrgangi á ári. Á þessu ári hefur urðunin þó dregist saman. ,,Magn urðunar í Fíflholtum hefur dregist saman um 12% á þessu ári, sem er mjög gleðilegt. Það er markmið allra sveitarfélaga að minnka magn til urðunar og vonandi náum við enn meiri árangri með bættri flokkun sveitarfélaga og atvinnulífs,“ segir Hrefna að lokum.

Urðun á Vesturlandi hefur dregist saman um tólf prósent

Farið yfir stöðu sveitarfélaganna í innleiðingu nýs flokkunarkerfis

Farið yfir stöðu sveitarfélaganna í innleiðingu nýs flokkunarkerfis