Á fundi sveitarstjórnar Borgarbyggðar síðastliðinn fimmtudag var umræða um það umhverfisslys að fjöldi frjórra eldislaxa hefur sloppið úr sjókví í Patreksfirði og leitar nú upp í laxveiðiár m.a. í Borgarbyggð. Tvær bókanir um málið voru lagðar fram og ganga þær mjög misjafnlega langt.

Bókun meirihlutans

Davíð Sigurðsson sveitarstjórnarfulltrúi Framsóknarflokks lagði fram eftirfarandi bókun fyrir hönd meirihluta sveitarstjórnar:

„Um Borgarbyggð renna margar af bestu laxveiðiám landsins. Veiðihlunnindi er undirstaða verðmætis fjölmargra jarða og nýting þeirra veitir fjölda fólks atvinnu í sveitarfélaginu. Að fjöldi frjórra laxa hafi sloppið úr sjókví Arctic Fish í Patreksfirði og gangi í laxveiðiár er mikið áhyggjuefni fyrir íslenska laxastofna en einnig þá uppbyggingu sem sjókvíaeldinu hefur fylgt, ekki síst í brothættum byggðum.

Atvinnulíf á grundvelli náttúruauðlinda þarf að byggja á trausti. Fyrirtæki sem staðin eru að því að standa ekki undir trausti þurfa að bregðast hratt við til að endurheimta traustið, lágmarka tjón og bæta það tjón sem verður. Þá er ljóst eftirlit með greininni hefur beðið hnekki.

Mikilvægt er að forðast að stofna til átaka milli atvinnugreina og byggðarlaga. Hagsmunir byggðar um land allt eru að nýting náttúruauðlinda sé með sjálfbærum hætti og að hvert og eitt svæði geti nýtt sína styrkleika. Það verður þó að tryggja að það sé gert án þess að valda umhverfi og atvinnulífi annars staðar óbætanlegu tjóni.“

Önnu bókun frá fulltrúa minnihlutans

Thelma Harðardóttir sveitarstjórnarfulltrúi VG, lagði eftirfarandi bókun fram fyrir hönd minnihluta sveitarstjórnar:

„Borgarbyggð er afar rík af laxveiðiám og í aldaraðir hafa bændur á svæðinu búið við þá auðlind í sátt við náttúruna. Þá hefur sveitarfélagið sjálft tekjur af veiðirétt sínum á nokkrum svæðum innan sveitarfélagsins. Veiðihlunnindi laxveiðiáa er undirstaða verðmætis fjölda jarða og nýting þeirra veitir fjölda fólks atvinnu í sveitarfélaginu. Jarðeigendur hafa varið óhemju tíma og fjármunum til uppbyggingar og markaðssetningar veiðihlunninda. Að frjóir laxar úr sjókvíaeldi hafi sloppið og syndi upp í laxveiðiár er grafalvarlegt. Fyrir lífríkið, laxastofninn og líffræðilegan fjölbreytileika er tjónið ómetanlegt. Aukinheldur er þetta aðför gegn þeirri atvinnugrein sem styrkir búsetu á dreifbýlum svæðum um land allt. Í mörg ár hefur verið varað við hraðri uppbygginu laxeldis í sjó og þeim afleiðingum sem það kynni að valda. Þá hefur eftirlit með greininni ekki vaxið í takt við það og er því enganvegin í stakk búið til að sinna því eftirliti sem þörf er á samkvæmt úttekt ríkisendurskoðunar á stjórnsýslu tengdri fiskeldi. Að frjóir sjókvíaeldislaxar myndu sleppa úr kvíunum var þvi löngu fyrirsjáanlegt og mun endurtaka sig verði ekkert aðhafst. Minnihlutinn skorar á matvælaráðherra og ríkisstjórn Íslands að tryggja umgjörð og eftirlit með sjókvíaeldi þannig að tryggt verði að slysasleppingar muni ekki eiga sér stað framvegis. Ef ekki tekst að tryggja lágmörkun umhverfisáhrifa af eldinu þá þarf að banna eldi í opnum kvíum í sjó.“

Lögðu fram tvær bókanir um umhverfisslys í sjókvíaeldi