Sunnudaginn 8. október sl. var haldið upp á 130 ára afmæli Innra-Hólmskirkju og því fagnað að nú hafa verið gerðar gagngerar endurbætur á kirkjunni. Kirkjan var upprunalega vígð árið 1892. Hún hefur nú fengið verðskuldað viðhald og aðhlynningu sem velunnarar hafa styrkt og sóknarnefnd ásamt fleirum haft umsjón með.

Þessum tímamótum var fagnað og kirkjan formlega tekin í notkun að nýju við hátíðarmessu í kirkjunni. Biskup Íslands, frú Agnes M. Sigurðardóttir, vísiteraði söfnuðinn og prédikaði í messunni. Prestar í Garða- og Saurbæjarprestakalli þjónuðu fyrir altari, en það eru þau sr. Þráinn Haraldsson, sr. Ólöf Margrét Snorradóttir og sr. Þóra Björg Sigurðardóttir. Kór Saurbæjarprestakalls söng og Zsuzsanna Budai lék á orgelið og stjórnaði söng. Meðhjálpari var Ragnheiður Guðmundsdóttir.

Biskup Íslands kom meðal annars inn á það í prédikun sinni hve mikil menningarverðmæti væru í gömlum kirkjum landsins og ekki síður hve mikil tengsl fólk á við kirkjuna sína, sem sést vel á framkvæmdum sem þessum.

Eftir messu var boðið í kirkjukaffi í félagsheimilinu Miðgarði og mátti þar sjá myndir af ástandi kirkjunnar áður en framkvæmdir hófust og hvernig verkinu miðaði áfram.

Eins og fram hefur komið í umfjöllun Skessuhorns var það hópur fermingarbarna ársins 1963 sem átti frumkvæðið að endurbótum á kirkjunni og höfðu þau umsjón með þeim ásamt sóknarnefndinni. Einstaklingar og fyrirtæki styrktu endurbæturnar með frjálsum framlögum og þá hefur sóknarnefndin verið með jólamarkað undanfarin ár og rann allur ágóðinn til framkvæmdanna. Húsafriðunarsjóður, Jöfnunarsjóður sókna og Hvalfjarðarsveit veittu einnig styrki til þessara endurbóta.

*Prestar Garða- og Saurbæjarprestakalls ásamt biskupi.*

*Sóknarnefndin þakkaði fulltrúum hins fræga ´63 fermingarárgangs þeirra framlag.*

*Ragnheiður Guðmundsdóttir sagði frá tildrögum þess að ráðist var í endurbæturnar og hvernig þeim miðaði.*

Veglega var haldið upp á kirkjuafmæli í Innra-Hólmi