Farið yfir veiðina í helstu ám Vesturlands

„Veiðin gekk vel hjá okkur í sumar. Það veiddust 146 laxar og 231 bleikja. Auk þess veiddust nokkrir eldislaxar,“ sagði Sæmundur Kristjánsson þegar við spurðum um Hvolsá og Staðarhólsá í Dölum og hvernig veiðin gekk í sumar. En skrítið sumar er nú á enda í veiðinni, hægt var að veiða ýmsar tegundir í ánum eins og hnúðlaxa, eldislaxa og auðvitað venjulega laxa sem oft hefur verið meira af en í sumar.

*Villi Naglbýtur við veiðar í Fáskrúð í Dölum.*

„Það veiddust 49 laxar og hellingur af sjóbirtingi,“ sagði Trausti Bjarnason á Á á Skarðsströnd, þegar við spurðum um Krossá og hann bætti við: „Við lokuðum laxastiganum og sluppum við fá þessa helv…. eldislaxa upp í ána hjá okkur.“

Búðardalsá gaf 53 laxa í sumar. Auk þess veiddust hnúðlaxar og eldislaxar. Flekkudalsá á Fellsströnd gaf 80 laxa.

,,Það veiddust 73 laxar hjá okkur í Fáskrúð í sumar, það voru erfiðar aðstæður lengi vel í sumar,“ sagði Arnór Björnsson er við spurðum um loka tölurnar þar.

Lokatalan í Laxá í Dölum var 601 lax og Haukadalsá gaf 373 laxa, en oft hefur veiðst betur á þessum slóðum en í sumar. Eitthvað veiddist í Efri Haukadalsá af laxi og bleikju.

„Við fengum nokkra laxa í Miðá í Dölum undir lokin en áin endaði víst í 143 löxum og hellingur af bleikju kom á land,“ sagði veiðimaður sem var þar undir það síðasta að renna fyrir fisk.

Hörðudalsá í Dölum gaf mest af bleikju en líka laxa, allavega gaf áin 300 fiska í sumar.

Straumfjarðará á Snæfellsnesi gaf 345 laxa og Haffjarðará 905, sem er heldur betri veiði en fyrir ári síðan.

„Hítará gaf 426 laxa og það er bara fín veiði,“ sagði Haraldur Eiríksson um Hítará á Mýrum.

„Jú, ég fékk nokkra laxa í Langá í sumar en lokatala var 709 laxar og bleikjur á efsta svæðinu,“ sagði Jógvan Hansen um þetta sumar við Langá.

Norðurá í Borgarfirði endaði í 1.087 laxa veiði þetta sumarið og Þverá og Kjarará í Borgarfirði í 1.306 löxum. ,,Grímsá endaði 697 löxum og Skuggi skilaði 77 löxum,“ sagði Jón Þór Júlíusson er við spurðum stöðuna.

Flókadalsá í Borgarfirði endaði í 248 löxum.

,,Andakílsá endaði í 170 löxum, fengum nokkra undir það síðasta,“ sagði veiðimaður sem renndi fyrir fisk í Andakílsá í sumar.

Gljúfurá í Borgarfirði gaf 182 laxa og eitthvað af silungi.

,,Brennan gaf 122 laxa og helling af silungi, Straumarnir gáfu 192 laxa og mikið af silungi,“ sagði okkar maður á staðnum um loka tölurnar.

Reykjadalsá í Borgarfirði gaf 51 lax í sumar, 5 urriða og eina bleikju.

„Það var mikið af fiski í Laxá í Leirársveit í sumar en áin endaði 516 löxum,“ sagði okkar maður við Laxá í Leirársveit. Og í Leirá í sömu sveit veiddust allavega 20 laxar og hellingur af silungi, sumir vel vænir.

Silungsveiðin gekk ágætlega víða á svæðinu í sumar. Hraunsfjörðurinn gaf vel, vötnin víða eins og Hlíðarvatn, Langavatn og Hreðavatn skiluðu veiðimönnum í soðið. Vatnasvæði Lýsu gaf nokkra laxa og helling af bleikju og urriða. Veiðin á Arnarvatnsheiði var góð í sumar samkvæmt okkar upplýsingum.

*Fyrsti fiskurinn úr Skugga í Borgarfirði.*

Stórskrítið veiðisumar á enda runnið og ýmsar tegundir í boði í ánum

Farið yfir veiðina í helstu ám Vesturlands

Farið yfir veiðina í helstu ám Vesturlands