Rætt við kennarann, blómaskreytinn og tónlistarmanninn Heimir Eyvindarson sem nýlega hóf störf sem skólastjóri við grunn- og tónlistarskólann í Stykkishólmi

Heimir Eyvindarson er nýráðinn skólastjóri Grunnskóla Stykkishólms og Tónlistarskóla Stykkishólms. Heimir er Sunnlendingur að uppruna og býr í Hveragerði ásamt eiginkonu sinni Söndru Sigurðardóttur og börnum þeirra. Hann er hvað þekktastur fyrir hljómborðsleik í hljómsveitinni Á móti sól en hann semur einnig flest lög sveitarinnar ásamt því að vera lærður blómaskreytir frá Garðyrkjuskólanum. Blaðamaður Skessuhorns hitti Heimi á skrifstofu hans í Grunnskóla Stykkishólms á dögunum og fékk að forvitnast um sögu hans.

Vill fá flatkökur oftar
Heimir fæddist í Reykjavík og ólst upp í Flóanum, austan Selfoss. ,,Mamma var úr Flóanum og pabbi úr Biskupstungum svo ég ólst upp hér og þar á Suðurlandi. Ég gekk í skóla í Hveragerði og fór þaðan í Fjölbrautaskóla Suðurlands á Selfossi. Ég hef búið lengst af á Selfossi og í Hveragerði þar sem ég bý í raun enn, ég er í fjarbúð og keyri heim um helgar. Við fjölskyldan vorum tvístígandi með það hvort við ættum að flytja strax, en ákváðum að það væri skynsamlegra að prófa þetta aðeins fyrst. Möguleikinn að flytja hingað er samt alltaf opinn. Bærinn er fallegur og það er góður andi yfir því litla sem ég hef fengið að kynnast mannlífinu utan skóla. Eina kvörtunin hingað til er sú að ég væri til í að fá flatkökur oftar í Bónus, að öðru leyti líður mér vel,“ segir Heimir og hlær.

Pabbi þurfti að ljúga
Um ellefu ára aldur hóf Heimir píanónám og var það fyrir sakir hvatvísi föður hans. ,,Pabbi er mikill listamaður og mjög hvatvís en mamma var jarðbundin húsmóðir. Hún sagði yfirleitt ekki mikið þegar hann birtist með ýmsa hluti sem honum datt í hug að kaupa á mínum uppvaxtarárum. Einn daginn birtist hann með píanó, ég man ekki nákvæmlega viðbrögðin hjá mömmu en hann lenti í smá vandræðum og þurfti að ljúga því að hann væri búinn að skrá mig í tónlistarnám. Það var þannig sem ég endaði á píanóinu en kennarinn minn hét Einar Markússon og var vinur pabba. Einar kenndi mér margt sem ég bý að enn í dag, hann var mikill snillingur. Hann fylgdi aðalnámskránni takmarkað svo ég er ekki útlærður píanisti en get með góðu móti kallað mig hljómborðsleikara. Þannig að það var alveg óvart að ég fór út í tónlist og ég er ævinlega þakklátur fyrir þessa hvatvísi í pabba,“ segir Heimir sem hélt sig við píanónámið þangað til hann hóf nám við Fjölbrautaskóla Suðurlands.

Leiddist óvart út í kennslu
Hvað sástu fyrir þér að verða þegar þú yrðir eldri? ,,Ég sá alltaf fyrir mér að verða tónlistarmaður, fljótlega eftir bílprófsaldurinn var ég ákveðinn í því. Ég var sex ár í fjölbraut og kláraði 29 einingar á þeim tíma, ég var ekki mikið með hugann við námið,“ segir Heimir sem á þeim tíma spilaði með hinum ýmsu hljómsveitum.

,,Ég er reyndar lærður blómaskreytir en ég lærði við Garðyrkjuskólann í Ölfusi og útskrifaðist þaðan 1996. Mamma stofnaði blómabúð árið 1992 þar sem ég starfaði sem blómaskreytir í tíu ár. Við stofnuðum svo Á móti sól í kringum 1995 og gáfum út fyrstu plötuna 1997. Ég hætti í blómabransanum upp úr aldamótum þegar fór að vera mikið að gera hjá hljómsveitinni en þá lifði ég af tónlistinni í nokkur ár eða þangað til ég var plataður í kennslu. Gítarleikari hljómsveitarinnar, Sævar Þór Helgason, er skólastjóri í Hveragerði í dag en á þessum tíma plataði hann mig til að leysa sig af á meðan hann fór í fæðingarorlof. Síðan þá hef ég verið að kenna en ég fann það þarna að kennslan var það sem hafði alltaf vantað í líf mitt. Þrátt fyrir að vera ekki með stúdentspróf komst ég sem betur fer inn í Kennaraháskólann. Ég var með góð meðmæli og með sérskólapróf úr Garðyrkjuskólanum, en ég held þetta væri ekki hægt í dag.“

Varð dönskukennari
Heimir hóf kennaraferilinn við tónlistarkennslu á Selfossi en fór svo að vera með umsjón í níunda bekk í Hveragerði í þrjá mánuði á meðan Sævar gítarleikari Á móti sól kláraði fæðingarorlofið. ,,Þetta gekk bara vel og var svo skemmtilegt að ég fékk að vera áfram. Það var kannski ekki alveg pláss fyrir mig en skólastjórinn vildi hafa mig áfram svo ég gekk í ýmis störf til að byrja með. Ég kenndi á blokkflautu, tók að mér sérkennslu og stærðfræði í tíunda bekk sem ég kunni samt ekki. Í náminu fór ég á kjörsvið erlendra tungumála og varð þess vegna dönskukennari. Árið 2013 varð ég svo deildarstjóri í Hveragerði, þannig að ég hef verið í stjórnun í skólakerfinu í tíu ár,“ segir Heimir.

*Við hljómborðið. Heimir hefur verið hljómborðsleikari hljómsveitarinnar Á móti sól frá upphafi og semur mikið af lögum fyrir hljómsveitina.*

Á móti sól
Hljómsveitin Á móti sól hefur verið starfandi í um 18 ár og gefið út átta plötur en ný plata er væntanleg á næstu vikum. ,,Við tókum einu sinni frí sem ég held við höfum tilkynnt en árið 2009 kom síðasta platan okkar út. Þarna vorum við smá búnir á því og hrunið komið. Seinni plöturnar vorum við að gefa út á eigin vegum, svo síðasta platan var rosalega dýr í framleiðslu. Við höfðum það ekki eins gott og við höfðum haft það, svo við ákváðum að taka smá pásu sem ég held við höfum tilkynnt. Sú pása endaði svo reyndar á því að vera bara tveir mánuðir.

Tveimur eða þremur árum síðar byrjuðum við aftur að taka upp nýja tónlist en við höfum ekki gefið út plötu síðan, bara eitt og eitt lag. Loksins er að koma út plata, sú fyrsta í fjórtán ár, en við kláruðum upptökur um síðustu helgi. Það er kannski mánuður í að við getum gefið hana út.

Við erum ennþá að spila töluvert en við erum orðnir svo gamlir, við viljum ekkert spila of mikið. Að jafnaði spilum við núna einu sinni í mánuði.“ Eruð þið ekki að koma fram á Aldamótatónleikunum vinsælu? ,,Magni hefur bara verið í því, sem er fínt. Þessir aldamótatónleikar gera mikið fyrir tónlistina okkar og eru alveg frábært framtak. Við erum með mikla spilun á gömul lög sem er skemmtileg nostalgía.“

Lagasmíðar
Heimir hefur samið flest lögin fyrir hljómsveitina. ,,Hingað til hef ég samið hvað mest en Magni hefur komið sterkt inn núna síðari árin. Á væntanlegri plötu erum við sennilega með álíka mikið efni. Lengi vel gat ég sagt að ég væri aðal laga- og textahöfundur hljómsveitarinnar,“ segir Heimir.

Hvenær byrjaðiru að semja tónlist? ,,Ég hef ekki velt því mikið fyrir mér en ætli það hafi ekki byrjað þegar ég tók þátt í músiktilraunum með nokkrum strákum þegar ég var 14-15 ára. Þá samdi ég lög og fann að ég gat þetta. Ég fór svo að spila í alls konar sveitaballahljómsveitum þar sem var aldrei planið að gefa út lög, ég hafði þess vegna ekki hvata til þess á því tímabili. Ég hef oft sagt það við strákana í Skítamóral að það var þeim að þakka að Á móti sól fór að gefa út tónlist. Skímó gaf út sína fyrstu plötu árið 1996, þá hugsuðum við að við gætum þetta alveg líka. Við gáfum þess vegna út hræðilega lélega plötu, en við gerðum þetta og sú plata kom okkur á blaðið – og bragðið,“ segir Heimir.

Uppáhalds lögin
Standa einhver lög þér nærri en önnur sem þú hefur samið? ,,Mér þykir vænt um þau öll en það eru þrjú lög sem ég nefni þegar ég er spurður. Í fyrsta lagi er það jólalagið okkar Þegar jólin koma, það er allt svo eftirminnilegt við það lag. Þetta var fyrsta lagið sem Magni söng með okkur í stúdíói en í upphafi vorum við með annan söngvara. Ég man að Magni var fárveikur þegar við tókum þetta upp, í dag myndi hann sennilega ekki mæta svona í hljóðverið. Ég var a.m.k. frekari en hann þennan daginn og hann söng þetta eins og engill. Lagið varð vinsælt og er enn spilað mikið fyrir jól.

Svo er það lagið Hvar sem ég fer, við gáfum það lag út í mars 2006 og það er ennþá spilað reglulega í útvarpi. Okkur þykir öllum vænt um það lag. Við gáfum lagið út og stuttu seinna fór Magni í þáttinn Rockstar Supernova, sem lengdi spilunina og gerði mikið fyrir okkur sem hljómsveit. Það var mikil tíska þegar Magni var í Rockstar að segja að hann væri alltof góður fyrir þetta band en þá var gott fyrir okkur að vera með þetta sterka lag í spilun sem var komið á toppinn áður en hann fór út. Við héldum stóra tónleikaröð þegar Magni kom heim og þá var þetta aðal lagið svo mér þykir vænt um það. Svo verð ég líka að nefna lagið Mínútur sem kom út síðastliðið vor, en það samdi ég til Söndru, konunnar minnar.“

Textarnir kvikna á nóttunni
Þú semur textana líka, hvernig ganga textasmíðarnar fyrir sig? ,,Það hefur breyst mikið, ég er orðinn alltof latur við þetta. Í dag sem ég ekki lag nema mig virkilega langi til þess eða ef ég fæ eitthvað yfir mig. Margir af bestu textunum kvikna þegar ég er að leggjast á koddann á kvöldin. Þá kemur einhver lína sem gerir það að verkum að allt fer af stað. Ég er ekki B týpa, heldur er ég eitthvað mikið neðar í stafrófinu. Þá fer ég oft á rúntinn á næturnar og fer að finna út úr melódíunni við textabrotið, svo er restin af þessu meiri vinna. Þá þarf maður að setjast niður og forma þetta en hugmyndirnar kvikna mest seint á kvöldin,“ segir Heimir.

Að starfa í skapandi umhverfi
Hvernig nýtist svo þessi reynsla inn í starf þitt sem tónlistarskólastjóri? ,,Ég get kallað mig tónlistarmann en hef hingað til ekki komið að rekstri tónlistarskóla, svo það er heilmikið sem ég á eftir að koma mér inní. En ég þekki starfsemi tónlistarskóla vel, hef kennt tónlist og fylgt börnunum mínum í gegnum tónlistarnám. Fyrir mig er þetta stærsta áskorunin í þessu starfi en jafnframt það sem ég var hvað spenntastur fyrir þegar ég sótti um. Í skólastefnu Stykkishólms sem tekin var til endurskoðunar árið 2022 er mikil áhersla lögð á sköpun. Í framhaldi af því er búið að gera skapandi deild innan tónlistarskólans og þar er ég alveg á heimavelli þó ég sé kannski ekki sterkastur á fræðilegu sviði tónlistarinnar,“ segir Heimir.

Hvernig gengur skapandi deild fyrir sig innan tónlistarskólans? ,,Þetta kom frá kennurunum sjálfum en þeir vildu auka fjölbreytnina, svo þetta er bara viðbót við starf skólans. Nemendur eru búnir að stofna nokkrar hljómsveitir og eru að semja en þau fá aðstoð við tónsmíðarnar. Svo eru fagmenn sem kenna í skólanum og geta aðstoðað við það að taka upp og búa til loka afurð.“

Komandi vetur spennandi
Heimir hafði enga tengingu við Stykkishólm þegar hann sótti um starfið en er sagt að hann hafi spilað þar á böllum forðum daga. ,,Við spiluðum svo víða að ég man sjálfur ekki eftir því. Á Nesinu spiluðum við oftast á Grundarfirði en á Vesturlandi spiluðum við aðallega þar og á Akranesi. Mér er sagt að við höfum spilað skólaball á hótelinu hérna í Hólminum einhvern tímann en ég man ekki eftir því. Það heillaði mig í raun hvað mest við starfið að koma alveg nýr inn í aðstæðurnar og taka stökkið. Það er gaman að breyta til og fara út fyrir þægindarammann,“ segir Heimir.

Heimir segist hafa tekið við góðu búi og er spenntur fyrir komandi vetri. ,,Það gerist lítið fyrsta veturinn, það var búið að ganga frá öllum áætlunum áður en ég kom inn. Ég tek hér við góðu búi en nemendur og starfsfólk eru einbeitt í vinnu og hér er góður mórall. Mínar áherslur koma svo síðar, ég legg megin áherslu á að öllum líði vel og að samskipti við börnin séu góð. Skólinn á fyrst og fremst að snúast um þarfir barnanna, við fullorðna fólkið erum hér í hinum ýmsu þjónustustörfum. Ég hef sterkar skoðanir á skólamálum, en hef sagt það við fólkið hérna að mér finnst gaman að skipta um skoðun ef einhver er með rök sem eru betri en mín. Ég er alltaf til í að læra. Ég kem inn í þetta starf með opinn hug og mín grunngildi að leiðarljósi sem eru manngæska, virðing, traust og góð líðan, það gerist ekkert ef þér líður ekki vel,“ segir Heimir að lokum.

*Heimir ásamt Söndru eiginkonu sinni en þau búa í Hveragerði og eru í fjarbúð á meðan Heimir kemur sér inn í starfið í Stykkishólmi.*

,,Kennslan var það sem hafði alltaf vantað í líf mitt“

Rætt við kennarann, blómaskreytinn og tónlistarmanninn Heimir Eyvindarson sem nýlega hóf störf sem skólastjóri við grunn- og tónlistarskólann í Stykkishólmi

Rætt við kennarann, blómaskreytinn og tónlistarmanninn Heimir Eyvindarson sem nýlega hóf störf sem skólastjóri við grunn- og tónlistarskólann í Stykkishólmi