Körfuknattleikslið Snæfells endaði í öðru sæti á síðustu leiktíð í 2. deild karla og komst þar með upp í fyrstu deildina eftir nokkurt hlé. Blaðamaður Skessuhorns heyrði í Gunnlaugi Smárasyni sem er þjálfari liðsins eins og í fyrra og segir hann að undirbúningstímabilið hefði byrjað vikuna eftir verslunarmannahelgina. Erlendu leikmennirnir hefðu mætt í byrjun september þannig að liðið væri búið að æfa í mánuð með fullan mannskap. En hvernig hefur gengið að safna í lið fyrir komandi átök í vetur? „Það hefur gengið vel að safna liði, auðvitað er erfitt að „plata“ menn út á land sem eru ekki fæddir eða með tengingu við Stykkishólm. Það eru ekki allir sem fatta hversu mikið Hólmurinn heillar en það kemur, ég hef mikla trú á því.“